އިނގިރޭސިވިލާތުގައި ކޮވިޑް-19ގެ ކޭސްތައް އިތުރުވާން ފެށުމާއެކު އަނެއްކާ ވެސް ފިޔަވަޅުތައް ވަރުގަދަކޮށްފި

އިނގިރޭސިވިލާތުގައި ކޮވިޑް-19 ގެ ކޭސްތައް އިތުރުވާން ފެށުމާއެކު އާންމު ތަންތަނުގައި އެއްވެ އުޅުމުގައި ފިޔަވަޅުތައް ވަރުގަދަ ކޮށްފިއެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން އެކަން ހާމަކުރައްވަމުން ވިދާޅުވީ ކުރިޔަށް އޮތް ދުވަސްތަކުގައި ކޭސްތައް ފެންނަ މިންވަރު އިތުރު ވެގެންދާނެ ކަމަށް ބެލެވޭތީ އެކަމުން ރައްކާތެރިވުމުގެ ގޮތުން މިހާރުއްސުރެ އަމަލު ކުރަން ޖެހޭ ކަމަށެވެ.

ބޮރިސްގެ އެންމެ އިސް މެޑިކަލް އެޑްވައިޒަރާއެކު ނޫސްވެރިންނާ ބައްދަލު ކުރައްވާ ވާހަކަ ދައްކަވަމުން ވިދާޅުވީ ހަ މީހުންނަށްވުރެ ގިނައިން އެއްވެސް ތާކު ނުތިބެވޭނެ ކަމަށެވެ.

"މިފިޔަވަޅު އަޅަން ނުޖެހޭނެނަމަ ވަރަށް ރަނގަޅު. އެހެންނަމަވެސް ބޮޑުވަޒީރުގެ ހައިސިއްޔަތުން ވައިރަސް ފެތުރުން ކޮންޓްރޯލްކުރުމަށް ކޮންމެހެން ކުރަންޖެހޭ ކަމެއް އަޅަންޖެހޭ ފިޔަވަޅެއް އަޅަންޖެހޭ." ބޮރިސް ވިދާޅުވި އެވެ.

ބޮރިސް ވިދާޅުވީ އަލަށް މި އެކުލަވާލެވުނު ގައިޑްލައިނާ އެއްގޮތަށް އަމަލުކުރޭތޯ ފުލުހުންނާއި ތަންފީޒީ އިދާރާތަކުން ކުރިޢަށް ވުރެ ބޮޑަށް މޮނިޓަރ ކުރަމުން ގެންދާނެ ކަމަށެވެ. ބޮރިސް ވިދާޅުވީ އަލަށް އެޅިގެންދާ ފިޔަވަޅުތަކަކީ ލޮކްޑައުން އަކަށް ދިޔުން ނޫން ކަމަށާއި ދެވަނަ ލޮކްޑައުން އަކުން ގައުމު ސަލާމަތް ކުރުމަށް އަޅަމުންދާ ފިޔަވަޅުތައް ކަމަށެވެ.

ފާއިތުވި ދުވަސްތަކުގައި އިނގިރޭސިވިލާތުގައި ކޭސްތައް ފެންނަ މިންވަރު ވަނީ އިތުރުވާން ފަށާފައެވެ. އެއާއެކު ބޮރިސް މިވަނީ އެގައުމުގައި އެންމެ ގިނަ ކޭސްތައް ފެނުނުއިރު ބޮރިސް އާއި ވަޒީރުން ކޮންމެ ދުވަހަކު ނޫސްވެރިންނާ ބައްދަލު ކުރައްވާ ވާހަކަ ދައްކަވާ ގޮތަށް ބައްދަލުވުމެއް ބާއްވާފައެވެ.

އިނގިރޭސިވިލާތުގެ ޗީފް މެޑިކަލް އޮފިސަރ ކްރިސް ވިޓީ ވިދާޅުވީ އެ ގައުމުގައި މިހާރު ކޭސްތައް އިތުރުވަމުން އަންނަނީ މީގެ ހަތަރު ހަފްތާ ކުރިން ފްރާންސްގައި ކޭސްތައް އިތުރުވަމުން އައިގޮތަށް ކަމަށެވެ. އަދި ބެލްޖިއަމް އަކީ ވެސް މިގޮތަށް ކޭސްތައް އިތުރުވަމުން އައި ގައުމެއް ކަމަށާއި ނަމަވެސް ވައިރަސް ފެތުރުން ކޮންޓްރޯލް ކުރުމަށް އެޅި ފިޔަވަޅުތަކުގެ ސަބަބުން އެކަން ކޮންޓްރޯލް ކުރެވިފައިވާ ކަމަށެވެ.

މީގެއިތުރުން އަލަށް އެޅުނު ފިޔަވަޅުތައް ކުރިޔަށް އޮތް ހަފްތާތަކެއް ވަންދެން ތަންފީޒު ކުރެވެމުންދާނެ ކަމަށާއި އަދި ކުރިއަށް އޮތީ ފިނިމޫސުން ކަމުގައިވުމުން ވައިރަސް ފެތުރުން ހަލުވި ވެގެންދާނެ ކަމަށެވެ.

މުޅި އިނގިރޭސިވިލާތުގައި ޓެސްޓް ކުރެވޭ މިންވަރު މިހާރު ކުރިއަށްވުރެ އިތުރުވެފައި ވީނަމަވެސް އަދި ހޮސްޕިޓަލްތަކުގައި އެޑްމިޓް ކުރެވޭ މިންވަރު ކުރިއާ އަޅާބަލާއިރު މަދު ނަމަވެސް ވައިރަސް ފެތުރުން ކޮންޓްރޯލް ނުކުރެވިދާނެކަމުގެ ބިރު ހީވާ ކަމަށް ކްރިސް ވިދާޅުވިއެވެ. ވަކިން ޚާއްސަކޮށް ޓީނޭޖް ކުދިންނާއި އުމުރުން 20ގެ އަހަރުތައް ގުނަމުންދާ ޒުވާނުންގެ މެދުގައި ކޭސްތައް އިތުރުވަމުން ހިނގައިދާނެ ކަމަށް ކްރިސް ވިދާޅުވިއެވެ.

ހަ މީހުންނަށްވުރެ ގިނައިން އެއް ވަގުތެއްގައި އެއްތާކު ނުތިބެވޭ ގޮތަށް ހެދުމުގެ ކުރިން ހުއްދަ އޮންނަނީ އެންމެ ގިނަ ވެގެން 30 މީހުންނަށް އެއްތާކު ތިބެވޭ ގޮތަށެވެ.

އިނގިރޭސިވިލާތުގައި ބުދަ ދުވަހު 2659 މީހުންނަށް ކޮވިޑް-19 ޖެހިފައިވާއިރު އޭގެކުރީ ދުވަސްކަމުގައިވާ އަންގާރަ ދުވަހު 2460 މީހުންނަށް ވަނީ ކޮވިޑް-19 ޖެހިފައެވެ. ނިމިގެންދިޔަ އޮގަސްޓް މަހު އެ ގައުމުގައި ދުވާލެއްގެ މައްޗަށް ހާހެއްހާ މީހުންނަށް ކޮވިޑް-19 ޖެހިގެން ވަނީ ރިޕޯޓް ކޮށްފައެވެ.

އަލަށް މިއެކުލަވާލެވުނު ގައިޑްލައިނަށް މަސައްކަތް ކުރާ ތަންތަނާއި، ސްކޫލްތަކުގައި އަމަލުކުރަން ނުޖެހޭނެ އެވެ.