ކޮވިޑް-19 ގެ ނުރައްކާތެރިކަން އެކި ޤައުމުތަކަށް ކުރިމަތިވަމުންދާއިރު، އެމެޒޯންއާއި އީބޭފަދަ ސައިޓުތަކުގައި މުދާ ވިއްކާ ފަރާތްތަކުން ހޭންޑް ސެނިޓައިޒަރ ވިއްކާ އަގު ބޮޑުކޮށްފައިވާތީ އެކަމަށް ގިނަ ބައެއްގެ ފާޑުކިއުން އަމާޒުވެއްޖެއެވެ.

ބޭރުގެ މީޑިއާތަކުން ރިޕޯޓްކުރާ ގޮތުން ކޮވިޑް-19 ގެ ބިރުވެރިކަމުގެ ނާޖާއިޖު މަންފާ ހޯދުމަށް ބައެއް ވިޔަފާރިވެރިން ދަނީ ނުއަގުގައި ހޭންޑް ސެނިޓައިޒަރ ފަދަ ޕްރޮޑަކްޓްތައް ވިއްކަމުންނެވެ. އެގޮތުން ބައެއް ވިޔަފާރިވެރިން 600 އެމްއެލްގެ ފުޅިއެއް 99.98 ޕައުންޑަށް ވިއްކަމުންދާއިރު، އަނެއް ބަޔަކު ދަނީ ހަމަ އެ ޕްރޮޑަކްޓް 120 ޕައުންޑަށް ވިއްކައި ވިޔަފާރީގެ މަންފާ ހޯދަމުންނެވެ.

އެކަމާ ގުޅިގެން ވިޔަފާރިތައް ރިވިއު ކުރާ ފަރާތްތަކުން ދަނީ އެކަމަށް ފާޑުކިޔައި، އާންމުންގެ މެދުގައި އުފެދިފައިވާ ބިރުވެރިކަމުގެ ނާޖާއިޖު މަންފާ ހޯދުމަށް ބައެއް ވިޔަފާރިވެރިން މަސައްކަތް ކުރާ ކަމަށްބުނެ އެކަމުގެ ޝަކުވާ ކޮށްފައެވެ.

ކޮވިޑް-19 އިން ރައްކާތެރި ވުމަށް އެޅިދާނެ މުހިއްމު ފިޔަވަޅުތަކުގެ ތެރޭގައި ހޭންޑް ސެނިޓައިޒަރާއި ސައިބޯނި ލައިގެން ރަނގަޅަށް އަތް ދޮވުމާއި، އާންމު ސާފުތާހިރުކަމަށް ސަމާލުވުން ހިމެނޭއިރު، ފާއިތުވި ދުވަސްތަކުގައި އެކި ޤައުމުތަކުގައި އެފަދަ ސާމާނުތަކަށް އޮންނަ ޑިމާންޑް ވަނީ ބޮޑުވެފައެވެ.

އެގޮތުން ދާދިފަހުން މީސްމީޑިއާގައި ވައިރަލްވި ވީޑިއޯއެއްގައި، އޮސްޓްރޭލިއާގެ ސުޕަމާކެޓެއްގެ ތެރޭގައި އެފަދަ ސާމާނުތަކެއް ގަންނަން އުޅުނު ގިނަ އަދަދެއްގެ ބައެއްގެ މެދުގައި ހަމަނުޖެހުންތަކެއް އުފެދޭ މަންޒަރަށް ގިނަ ބައެއްގެ ސަމާލުކަން ވަނީ ލިބިފައެވެ.