ކޮވިޑް-19: މަރުވި މީހުންގެ އަދަދު 11،000 އަށްވުރެ މައްޗަށް، އެންމެ ގިނައީ ޔޫރަޕްގެ ކޭސްތައް

ކޮވިޑް-19 ރޯގާގެ ސަބަބުން މުޅި ދުނިޔެއިން މަރުވި މީހުންގެ އަދަދު 11،000 އަށްވުރެ މައްޗަށް އަރައިފިއެވެ.

ދުނިޔޭގައި މަރުވި މީހުންގެ އަދަދު 11،398 އަށް އަރާފައިވާއިރު ޔޫރަޕްގެ ގައުމުތަކަށް މަރުވި މީހުންގެ އަދަދު އެކަނި ވެސް 5000 އަށް އަރައެވެ. މިއާއެކު މި ބަލި މިހާރު ފެތުރެމުންދާ އާ މަރުކަޒަކަށް ޔޫރަޕްގެ ގައުމުތައް ވަނީ ވެފައެވެ. ޔޫރަޕްގެ ގައުމުތަކުގެ ތެރެއިން އެންމެ ގިނައިން މީހުން މަރުވަމުން ދަނީ އިޓަލީ، ސްޕެއިން އަދި ޖަރުމަންވިލާތުންނެވެ.

ހުކުރު ދުވަހު އެކަނި ވެސް އިޓަލީން ވަނީ 627 މީހުން މި ބަލީގައި މަރުވެފައިވާކަން ހާމަކޮށްފައެވެ. މިއީ ފާއިތުވި ހަތަރު ހަފްތާ ތެރޭގައި އިޓަލީގައި އެންމެ ގިނަ މީހުން މަރުވި ދުވަހެވެ. އަދި މިއާއެކު ޗައިނާއިން މަރުވި މީހުންނަށްވުރެ އިޓަލީގައި މަރުވި މީހުންގެ އަދަދު ވަނީ އިތުރުވެފައެވެ.

މިހާތަނަށް ޗައިނާއިން މަރުވެފައިވަނީ 3255 މީހުންނެވެ. އަދި ހުކުރު ދުވަހު އެގައުމުން މަރުވެފައިވަނީ 7 މީހެކެވެ. ނަމަވެސް އިޓަލީން އެކަނި މަރުވި މީހުންގެ އަދަދު ވަނީ 4032 އަށް ވަނީ އަރާފައެވެ. އަދި ހުކުރު ދުވަހު މަރުވި މީހުންގެ އަދަދު އުޅެނީ 627 ގައެވެ.

ޔޫރަޕްގެ އެހެން ގައުމުތަކަށް ބަލާލައިރު، ސްޕެއިން އިން މިހާތަނަށް 21،571 މީހަކު ބައްޔަށް ޕޮޒިޓިވްވެފައިވާ އިރު ހުކުރު ދުވަހު އެކަނި އެގައުމުން ވަނީ 3494 އައު ކޭސް ރިޕޯޓް ކޮށްފައެވެ. އަދި ހުކުރު ދުވަހު މަރުވި 262 މީހުންނާއެކު އެގައުމުގައި މަރުވި މީހުންގެ ޖުމްލަ އަދަދު ވަނީ 1093 އަށް އަރާފައެވެ.

މީގެ އިތުރުން ޖަރުމަނުވިލާތުގައި ބަލި ޖެހުނު މީހުންގެ އަދަދު ވަނީ 19848 އަށް އަރާފައެވެ. އެގައުމުން ވަނީ ހުކުރު ދުވަހު އެކަނި ވެސް 4528 އާ ކޭސް ރިޕޯޓް ކޮށްފައެވެ. އަދި ހުކުރު ދުވަހު މަރުވި 24 މީހުންނާއެކު އެގައުމުގައި މިހާތަނަށް މަރުވި މީހުންގެ އަދަދު އުޅެނީ 68 ގައެވެ.

ހުކުރު ދުވަހުގެ ނިޔަލަށް މުޅި ދުނިޔެއިން ކޮވިޑް-19 އަށް 275،944 (ދެ ލައްކަ ހަތްދިހަ ފަސް ހާސް ނުވަސަތޭކަ ސާޅީސް ހަތަރު) މީހަކު ވަނީ ޕޮޒިޓިވްވެފައެވެ. އަދި މިހާތަނަށް 91،912 މީހަކު ބަލިން ސަލަމަތްވެފައިވެއެވެ. ނަމަވެސް މީގެ ކުރިން ބަލިން ފަސޭހަވި މީހުންގެ އަދަދު މަތީގައި އުޅުނު ނަމަވެސް ޔޫރަޕްގެ ގައުމުތަކުން ފެންނަ ކޭސްތައް އިތުރުވުމާއި ގުޅިގެން ފަރުވާދެމުންދާ މީހުންގެ އަދަދު ވަނީ 164،869 (އެއްލައްކަ ފަސްދޮޅަސް ހަތަރު ހާސް އަށްސަތޭކެ ފަސްދޮޅަސް ނުވަ) އަކަށް އަރާފައެވެ. އަދި މީގެ ތެރެއިން ސީރިއަސް ނުވަތަ ކްރިޓިކަލް ހާލަތުގައި 7764 މީހަކު އެބަތިއްބެވެ.