ކުޅިވަރު ޤާނޫނުގައި އިސްލާހު ކުރަންޖެހޭ ވަރަށް ގިނަ ކަންކަން އެބަހުރި ކަމަށް މަޝްހޫރު ޤާނޫނީ ވަކީލު މުޙައްމަދު ޖައުޝަން ޝަރީފް ވިދާޅުވެއްޖެއެވެ.
ޓޭބަލް ޓެނިސް އެސޯސިއޭޝަން އޮފް މޯލްޑިވްސްގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޤާނޫނީ ވަކީލު ޖައުޝަން ވިދާޅުވީ، ކުޅިވަރު ޤާނޫނުގައި އިސްލާހު ކުރަންޖެހޭ ވަރަށް ބައިވަރު ކަންކަން ހުރި ކަމަށް ގަބޫލުކުރައްވާ ކަމަށާއި، ޤާނޫނު އިސްލާހު ކުރުމުގެ މަސައްކަތް ކުޅިވަރާ ބެހޭ ގައުމީ މަޖިލީހުން ކުރަމުން އަންނަ ކަމަށެވެ.
އަދި ވިދާޅުވީ ކުޅިވަރު ޤާނޫނަށް މިހާރުން މިހާރަށްވެސް ގެންނަން ޖެހޭ އިސްލާހު އެބަހުރި ކަމަށާއި، އެގޮތުން ޤާނޫނުގައި ކަނޑައެޅިފައިވާ އާބިޓްރޭޝަން ޓްރައިބިއުނަލް އަދި ހެދިފައިނުވާ ކަމަށާއި، އެހެންނަމަވެސް އާބިޓްރޭޝަން ޓަރައިބިއުނަލް އުފެއްދުމަށް ކުޅިވަރާ ބެހޭ ގައުމީ މަޖިލީހުން ކުޑަ ކޮމެޓީއެއް އެކުލަވާލާފައިވާ ކަމަށެވެ. އެ ކޮމެޓީގައިވެސް ހިމެނިވަޑައިގަންނަވާ ޖައުޝަން ވިދާޅުވީ ކައިރި މުސްތަގުބަލެއްގައި އާބިޓްރޭޝަން ޓްރައިބިއުނަލް އުފެދިގެންދާނެ ކަމަށް އުންމީދު ކުރައްވާ ކަމަށެވެ.
ޖައުޝަން އިތުރަށް ވިދާޅުވީ ކުޅިވަރު ޤާނޫނުގައި ހުރި މައްސަލަތަކަށް ވުރެ ބޮޑަށް މައްސަލަ އަކަށް ވަނީ ބައެއް ބޭބޭފުޅުންނަށް މިކަމުގައި އަމަލު ކުރެއްވޭ ގޮތުން ދިމާވާ މައްސަލަތަކެއް ކަމަށާއި، ކުޅިވަރު އެސޯސިއޭޝަންތަކުގެ އިންތިޚާބު ކާމިޔާބު ކުރެއްވުމަށް ކުރަން ޖެހޭ ކަމަކީ ކުޅިވަރު ވޯޓުލުން ކަމަށެވެ. އަދި އިންތިޚާބު ކާމިޔާބުކުރަން ޖެހޭނީ ކޯޓުން ނޫން ކަމަށާއި، ވޯޓުން ކަމަށްވެސް ވިދާޅުވިއެވެ.
ކުޅިވަރު ޤާނޫނުގައި މައްސަލަ ހުރި ކަމަށް އަޅުގަނޑު ދެކެން. އަދި މިޤާނޫނުގައި މިހާރުން މިހާރަށް އިސްލާހުކުރަން ޖެހޭ ކަންކަން އެބަހުރި. އެގޮތުން ކުޅިވަރު އާބިޓްރޭޝަން ޓްރައިބިއުނަލެއް ނެތުން ހިމެނޭ. އެހެންނަމަވެސް އާބިޓްރޭޝަން ޓްރައިބުނަލްގެ މަސައްކަތް ކުރެވެމުން މިހާރު އަންނަނީ. ވަރަށް އަވަސް މުސްތަގުބަލެއްގައި އާބިޓްރޭޝަން ޓްރައިބިއުނަލްގެ މަސައްކަތް ނިންމާލެވޭނެ.ޤާނޫނީ ވަކީލު މުޙައްމަދު ޖައުޝަން ޝަރީފް
މިއަހަރަކީ ގައުމީ ކުޅިވަރު އެސޯސިއެޝަންތަކުގެ އިންތިޚާބީ އަހަރަށްވާއިރު، މިހާތަނަށް ގިނަ އެސޯސިއޭޝަންތަކުން ވަނީ އިންތިޚާބު ބާއްވާފައެވެ. އެގޮތުން ޓީޓީ އެސޯސިއޭޝަނުގެ އިންތިޚާބާ ގުޅިގެން މައްސަލަތަކެއް ފެންމަތިވިއިރު، މި މައްސަލަ ވަނީ ކޯޓަށްވެސް ހުށަހަޅާފައެވެ. އެކަމަކު އަންގާރަ ދުވަހު ޓީޓީ އެސޯސިއޭޝަނުގެ އިންތިޚާބު ބޭއްވީ ސިވިލް ކޯޓުން އިންތިޚާބު ފަސްކުރަން ވަގުތީ އަމުރެއް ނެރެދެވެން ނެތް ކަމަށް ނިންމުމާ ގުޅިގެންނެވެ.
ޓީޓީ އެސޯސިއޭޝަނުގެ އިންތިޚާބު މައްސަލަ ފެންމަތިވިއިރު، ކޯޓުން މައްސަލަ ބަލަން ފެށުމާއެކު އިންޓަނޭޝަލް ޓޭބަލް ޓެނިސް ފެޑެރޭޝަނުން ވަނީ ރާއްޖެ ސަސްޕެންޑް ކުރަން ޖެހިދާނެ ކަމުގެ އިންޒާރެއް ދީފައެވެ. އަދި ހަމަ މިއަހަރު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބު މައްސަލަ ރައްޔިތުންގެ މަޖިލީހުން ބަލަން ފެށުމާއެކު ފީފާއިން ރާއްޖެ ސަސްޕެންޑް ކުރާނެ ކަމަށް އިންޒާރު ދިނެވެ.
މި ދެ މައްސަލައިގައިވެސް ދެ އެސޯސިއޭޝަންވެސް ތަމްސީލުކުރައްވާފައިވަނީ ޤާނޫނީ ވަކީލު ޖައުޝަނެވެ.
