ކުޅިވަރު އެތުލީޓުންނަށް ސިލްސިލާ ސެމިނާއެއް އެމްއޯސީން ފަށައިފި

ގައުމީ ހުރިހާ ކުޅިވަރެއްގައި ހަރަކާތްތެރިވާ ކުޅުންތެރިން ރަނގަޅު ސިއްހަތެއްގައި ތިބުމަށާއި އެ ކުޅުންތެރިންގެ ފިޒިކަލް ފިޓްނަސް އެއްވަރެއްގައި ބެހެއްޓުމުގެ މުހިންމު ކަމާއި ބެހޭ ގޮތުން އެތުލީޓުންނަށް އަމާޒުކޮށްގެން ސިލްސިލާ ސެމިނާއެއް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ފަށައިފި އެވެ.

"އެތުލީޓްސް މެންޓަރިން ޕްރޮގްރާމް"ގެ ދަށުން ހޮނިހިރު ދުވަހުގެރޭ މޯލްޑިވްސް ނޭޝަނަލް ޔުނިވަސިޓީ (އެމްއެންޔޫ) ގެ އޮޑިޓޯރިއަމްގައި ބޭއްވި މި ޕްރޮގްރާމުގައި އެތުލީޓުންގެ ކެއިން ބުއިމާއި ސިއްހަތާއި ބެހޭ ގޮތުން ވަނީ ތަފާތު މައުލޫމާތު ހިއްސާކޮށްފަ އެވެ.

އެމްއޯސީން 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ގިނަ ރަން މެޑަލްތަކެއް ހޯދުމަށް އަމާޒު ހިފައިގެން ކުރިއަށް ގެންދާ މި ޕްރޮގްރާމުގައި އެތުލީޓުންގެ ސިއްހަތާއި ބެހޭ ގޮތުން މައުލޫމާތު ހިއްސާކުރީ އައިޖީއެމްއެޗްގެ ޑައިޓީޝަން އާޝިޔާ އަބްދުލް ރަހީމް އެވެ.

އާޝިޔާގެ ޕްރެޒެންޓޭޝަންގައި ހިމަނާފައި ވަނީ މައިގަނޑު ގޮތެއްގައި ކުޅިވަރު ކުޅޭ ކުޅުންތެރިން ކެއިން ބުއިމުގައި ގެންގުޅެންޖެހޭ އާދަތަކާއި ކެއުމުގައި ބޭނުންކުރާނެ ފައިދާހުރި ކާނާއާ ބެހޭ ތަފާތު މައުލޫމާތެވެ. އެގޮތުން ގިނަ ވަގުތު ކުޅުމުގައި ހަރަކާތްތެރިވާ އެތުލީޓުން ބޭނުންކުރާނެ ތަފާތު ކާނާ އާއި ކުރު ވަގުތު ކޮޅެއްގައި ކުޅިވަރުގައި ހަރަކާތްތެރިވާ އެތުލީޓުން ބޭނުންކުރާނެ ކާނާއާ ބެހޭ މައުލޫމާތު އެފަރާތުން ވަނީ ހިއްސާކޮށްފަ އެވެ.

އާޝިޔާގެ އިތުރުން އެމްއޯސީގެ ޖެނެރަލް ސެކްރެޓަރީ އަހުމަދު މަރުޒޫގު (މަރޭ) ވެސް ވަނީ މި ޕްރޮގްރާމުގައި އެބޭފުޅާގެ 12 ހަފްތާގެ ޓްރެއިނިންގ ޕްރޮގްރާމަކާ ބެހޭ ގޮތުން މައުލޫމާތު ހިއްސާކޮށްފަ އެވެ. އެގޮތުން ރަނގަޅު ސިއްހަތެއްގައި ހުރު މަށާއި ކެއިން ބުއިމުގައި ބޭނުންކުރާނެ ރަނގަޅު ކާނާއާ ބެހޭ ގޮތުން މައުލޫމާތު ހިއްސާކުރި އެވެ.

މަރޭ ވަނީ އެބޭފުޅާގެ 12 ހަފްތާގެ ތަމްރީނުތަކުން އެނގިގެންދިޔަ ކަންތަކާއި ހޯދި ކާމިޔާބީއާ ބެހޭ ގޮތުން އެތުލީޓުންނަށް މައުލޫމާތު ހިއްސާކޮށް އެހާ ދޮށީ އުމުރަކުން ހަށިގަނޑަށް ގެނެވުނު ބަދަލާއެކު ޒުވާން އެތުލީޓުންނަށް ވެސް ފުރިހަމަ ސިއްހަތެއްގައި ހުރުމަށް ގޮވާލާފަ އެވެ.

އެމްއޯސީން ބުނީ މި ޕްރޮގްރާމަކީ ސިލްސިލާކޮށް އެތުލީޓުންނަށް އަމާޒުކޮށްގެން ކުރިއަށްގެންދާ ވަރަށް ހާއްސަ ޕްރޮގްރާމެއް ކަމަށާއި އެހެން ކަމުން މި ސިލްސިލާގެ ދަށުން އަދި އިތުރު ދެ ޝެޝަނެއް ކުރިއަށް ގެންދެވޭނެ ކަމަށެވެ.

އެގޮތުން ދެން އެންމެ އަވަހަށް ކުރިއަށްގެންދެވޭނީ ގައުމީ ޓީމުތަކަށް އަމާޒުކޮށްގެން ކުރިއަށްގެންދާ ޕްރޮގްރާމެއް ކަމަށާއި އެއަށްފަހު ދެން ކުރިއަށްގެންދާނީ އިންޑިވިޑުއަލް އެތުލީޓުންނަށް އަމާޒުކޮށްގެން ކުރިއަށްގެންދާ ޕްރޮގްރާމްތަކެއް ކަމަށެވެ.