ރާއްޖޭގައި ކުރި އެންމެ ފުރަތަމަ ލެޓާޖޭ އޮޕަރޭޝަން ޑރ. އަބްދުއްސަމަދު މެމޯރިއަލް ހޮސްޕިޓަލުގައި
އޮޕަރޭޝަން ކުރެއްވީ ކަށީގެ ޑރ. އާޒިމް އަޙްމަދު
ޑރ. އަބްދުއްސަމަދު މެމޯރިއަލް ހޮސްޕިޓަލުގައި ކުރި ލެޓާޖޭ އޮޕަރޭޝަން
ކޮނޑުހުޅު މާގިނައިން ނެއްޓޭ މީހެއްގެ ހުޅު ރަނގަޅު ކުރުމަށް ރާއްޖޭގައި ފުރަތަމަ ފަަހަރަށް ލެޓާޖޭ އޮޕަރޭޝަނެއް ކޮށްފިއެވެ.
މިހާތަނަށް 30 ށްވުރެ ގިނަ ފަހަރު ކޮނޑުހުޅު ނެއްޓިފައިވާ މީހާގެ ހުޅަށް ލިބިފައިވާ ގެއްލުން ރަނގަޅު ކުރަން ކުރި އޮޕަރޭޝަން ކޮށްފައިވަނީ ގދ. ތިނަދޫ ޑރ. އަބްދުއް ސަމަދު މެމޯރިއަލް ހޮސްޕިޓަލުންނެވެ. ކަށީގެ ޑރ. އާޒިމް އަޙްމަދު ކުރެއްވި މި އޮޕަރޭޝަން ކުރަނީ ކޮނޑުހުޅު ކައިރިން ކަށިކޮޅެއް ނައްޓާފައި ކޮނޑުހުޅު އެތެރެއަށް ލައްވައިގެންނެވެ.
މި އޮޕަރޭޝްނާ ގުޅޭ ގޮތުން "ރާއްޖެ.އެމްވީ" އާ ވާހަކަ ދައްކަވަމުން ޑރ. އާޒިމް ވިދާޅުވީ، އޮޕަރޭޝަން ވަރަށް ކާމިޔާބު ކަމަށާއި، މިއީ ރާއްޖޭގައި މިގޮތަށް ކުރެވުނު ފުރަތަމަ އޮޕަރޭޝަން ކަމަށެވެ. ދެ ގަޑިއިރަށް ކުރިއަށް ދިޔަ އޮޕަރޭޝަނަށް ފަހު އުމުރުން 70 އަހަރުގެ މީހާއަށް ދެން ޖެހެނީ ދެ މަހުގެ މުއްދަތަކަށް ފިިޒިއޮތެރޮފީ ޓްރީޓްމެންޓް ނަގަން ކަމަށް އޭނާ ވިދާޅުވިއެވެ.
ޑރ. އާޒިމް ވިދާޅުވީ، އެ އޮޕަރޭޝަނަކީ ވަރަށް ކާމިޔާބު އޮޕަރޭޝަނެއް ކަމަށާއި، އެއީ ލިބުނު ވަރަށް ބޮޑު ހިތްހަމަޖެހުމެއް ކަމަށެވެ.
މިހާތަނަށް ރާއްޖޭގައި ކޮށްފައި ނުވާ ކަހަލަ ކަށީގެ ބޮޑު އޮޕަރޭޝަނެއް، އަބްދުއްސަމަދު މެމޯރިއަލް ހޮސްޕިޓަލުގައި ކުރިއިިރު، އެ ހޮސްޕިޓަލުން ވަނީ މީގެ ކުރިންވެސް ކަށީގެ ގިނަ އޮޕަރޭޝަންތަކެއް ކޮށްފައެވެ.
