ކުޅުދުއްފުށި އައިސޮލޭޝަން ފެސިލިޓީގައި ފަރުވާ ދެމުންދިޔަ ކެލާ މީހަކު މަރުވެއްޖެ
9 ސެޕްޓެމްބަރު 2020 | ބުދަ 08:21އޭނާ ވަނީ ކޮވިޑް-19 އަށް ޕޮޒިޓިވް ވެފައި
ކުޅުދުއްފުށީގައި އައިސޮލޭޝަން ފެސިލިޓީއެއްގެ ގޮތުގައި ހަމަޖައްސާފައިވާ އެރަށުގައި ހުންނަ ކޭޕީއެލް ގެސްޓް ހައުސް | ކުޅުދުއްފުށި އޮންލައިން
ހދ. ކުޅުދުއްފުށީގައި ހުންނަ ކަރަންޓީން ފެސިލިޓީ ކަމަށްވާ ކޭޕީއެލް އައިސޮލޭޝަން ފެސިލިޓީގައި ފަރުވާދެމުންދިޔަ މީހަކު އަންގާރަ ދުވަހުގެރޭ މަރުވެއްޖެއެވެ.
ކުޅުދުއްފުށި އޮންލައިންއިން ބުނެފައިވާ ގޮތުގައި، މަރުވެފައިވަނީ ހއ. ކެލާއިން ފަރުވާ ހޯދުމަށް ކުޅުދުއްފުއްޓަށް ގެންދިޔަ އުމުރުން 58 އަހަރުގެ ފިރިހެނެކެވެ. އެމީހާ އެންމެ ފުރަތަމަ މާލެއިން ކެލާއަށް ގޮސް ހުރީ ހޯމް-އައިސޮލޭޝަންގައެވެ. އެކަމަކު ހާލު ގޯސްވުމުގެ ސަބަބުން ކުޅުދުއްފުށީގައި ހުންނަ ކަރަންޓީން ފެސިލިޓީއަށް ގެންދިޔައީ އަންގާރަ ދުވަހުގެ ހެނދުނެވެ. އަދި ފަރުވާ ދެމުން ދަނިކޮށް އޭނާ މަރުވީ އަންގާރަ ދުވަހުގެރޭ ކަމަށް މައުލޫމާތު ލިބެއެވެ.
ކެލާއަށް އުފަން މީހާ މަރުވި ފަހުން ސާމްޕަލް ނަގައި ކޮވިޑް-19 އަށް ޓެސްޓް ކުރިއިރު، އޭނާ ވަނީ ވައިރަހަށް ޕޮޒިޓިވް ވެފައެވެ. އެނގިފައިވާ ގޮތުގައި އެމީހާއަކީ ކެންސަރު ބައްޔަށްވެސް ފަރުވާ ކުރަމުން އައި މީހެކެވެ.
ކުޅުދުއްފުށީގައި ހުންނަ ކޭޕީއެލް ގެސްޓް ހައުސްއަކީ، ކޮވިޑް-19 އާ ގުޅިގެން ކުޅުދުއްފުށީގައި އައިސޮލޭޝަން ފެސިލިޓީއެއްގެ ގޮތުގައި ބޭނުންކުރަމުންދާ ތަނެކެވެ.
އަންގާރަ ދުވަހުވެސް ރާއްޖެއިން ކޮވިޑް-19 އަށް ޕޮޒިޓިވް 74 ކޭސް ވަނީ ފެނިފައެވެ. އަދި މިހާތަނަށް 8،741 މީހަކަށް މިބަލި ޖެހިފައިވެއެވެ. މިބަލީގައި މިހާރު ފަރުވާ ދެމުންދަނީ 2،549 މީހަކަށެވެ. ހޮސްޕިޓަލުގައި އެޑްމިޓް ކޮށްގެން 139 މީހަކަށް ފަރުވާ ދެމުންދާއިރު، މިހާތަނަށް ކޮވިޑް-19 އަށް ޕޮޒިޓިވް 29 މީހަކު ވަނީ މަރުވެފައެވެ.
