މަހުލޫފް ބޭސްފަރުވާ އަށް އިންޑިއާއަށް ފުރާވަޑައިގެންފި

ޖަލު ހުކުމެއް ތަންފީޒު ކުރައްވަމުން ގެންދަވާ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފު ބޭސްފަރުވާއަށް އަންގާރަ ދުވަހު އިންޑިއާ އަށް ފުރާވަޑައިގެންފިއެވެ.

މަހުލޫފުގެ އަނބިކަނބަލުން ނަޒުރާ ނަސީމް (ނަޒޫ) ވިދާޅުވީ، ކަރެކްޝަންނަލް ސާވިސް އިން ހުއްދަ ދިނީ ބޭސްފަރުވާއަށް އިންޑިއާގެ ބެންގަލޫރުގައި ފަރުވާ ހޯދަން 7 ދުވަހުގެ މުއްދަތެއް ކަމަށެވެ. ބޭސްފަރުވާއަށް އިންޑިއާއަށް ފުރާވަޑައިގަތުމަށް ހަމަޖެހިފައި ވަނީ އަންގާރަ ދުވަހު 12:45 ގައި ކަމަށް ނަޒުރާ ވިދާޅުވިއެވެ.

މަހުލޫފަށް ދީފައިވާ 7 ދުވަހުގެ މުއްދަތު ހަމަވުމުން އެނާ އެބުރި ރާއްޖެ ވަޑައިގަންނަވަން ޖެހެއެވެ. އެހެންނަމަވެސް ބޭސްފަރުވާގެ މުއްދަތު އިތުރު ކުރުމަށް ހުށައެޅުމުގެ ފުރުސަތު މަހުލޫފަށް އޮންނާނެކަމުގައި ވެއެވެ.

މަހުލޫފު އެލާޖިކުވުމުގެ މައްސަލަ ސީރިއަސްވުމުން، ޑޮކްޓަރުންގެ ލަފާގެ މަތިން މިދިޔަ އަހަރުގެ ޑިސެމްބަރ މަހުގައި ވެސް ވަނީ ރާއްޖެއިން ބޭރުން ފަރުވާ ހޯއްދަވާފައެވެ. އެ ފަހަރު މަހުލޫފަށް ދިނީ 10 ދުވަހުގެ މުއްދަތަކެއެވެ.

މަހުލޫފަށް ކުރިމަތިވެފައިވަނީ އެލާޖިކުވުމުގެ މައްސަލަތަކާއި ލޮލާއި ހަމުގެ މައްސަލަތަކެކެވެ. އެ މައްސަލަތަކުގައި އެތައް ފަހަރެއްގެ މަތިން މަހުލޫފް މާލެ ގެނެސް ޑޮކްޓަރަށް ދައްކާފައި ވެއެވެ. މަހުލޫފްގެ އާއިލާ އިން ބުނާ ގޮތުގައި އޭނާ އަށް ރާއްޖޭން ދެމުންދަނީ އެންމެ އެކަށޭނެ ފަރުވާއެއް ނޫނެވެ.