ޗައިނާ ސިޔާސަތުގެ ހަގީގަތެއް ބަޔަކު ކުރަމުންދާ ދޮގު ތުހުމަތުތަކާ ގުޅިގެން ބަދަލެއް ނުކުރެވޭނެ ކަމަށާއި، އަދި ސިޔާސީ ޕާޓީތަކުގެ ގޭމް އުކުޅަކަށް ޗައިނާ ބޭނުން ކުރިޔަސް ހަގީގަތް އޮޅުވާ ނުލެވޭނެ ކަމަށް ޗައިނާގެ ސަފީރު ޒަންގ ލިޒޮންގ ވިދާޅުވެއްޖެއެވެ.
ޗައިނާގެ ސަފީރު މިހެން ވިދާޅުވީ ރާއްޖެޓިވީގެ "ސިޔާސީ ދުނިޔެ" ޕްރޮގްރާމުގައި އެމްޑީޕީގެ ޕާލިމެންޓްރީ ގްރޫޕުގެ ލީޑަރު އަލީ އާޒިމް ޗައިނާ އަށް ފާޑުވިދާޅުވެ، އިދިކޮޅު ޕީޕީއެމް ޕީއެންސީއަށް ފައިސާ ހަރަދު ކުރަނީ ޗައިނާ އިން ކަމަށް ބުނެ ދެއްކެވި ވާހަކައަކާއި ގުޅިގެންނެވެ.
މިކަން ދޮގު ކުރައްވާ ޗައިނާ ސަފީރު ކުރެއްވި ޓްވީޓެއްގައި ބުނެފައިވަނީ، ޗައިނާގެ ހާރިޖީ ސިޔާސަތަކީ އެއްވެސް ގައުމެއްގެ ދާހިލީ ކަންކަމުގެ ތެރެއަށް ނުވަދެ ގުޅުން ބަދަހި ކުރާ ސިޔާސަތެއް ކަމަށެވެ. އަދި އެކަން ވާނީ މާޒީގެ ތެރެއިން ވަރަށް ރަނގަޅަށް ސާބިތު ކޮށްދީފައި ކަމަށް ސަފީރު ކުރެއްވި ޓްވީޓުގައި ބުނެފައިވެއެވެ.
ސިޔާސީ ދުނިޔެ ޕްރޮގްރާމުގައި ވާހަކަ ދައްކަވަމުން މެދު ހެންވޭރު ދާއިރާގެ މެންބަރުކަން ވެސް ކުރައްވާ އާޒިމް ވިދާޅުވީ، ރާއްޖޭގެ ސިޔާސީ މަޝްރަހު ހަލަ ބޮލި ކުރުމަށް އިދިކޮޅުން ކުރާ މަސައްކަތަކީ ޗައިނާ ސަރުކާރުން ފައިސާ ހަރަދު ކޮށްގެން ކުރަމުންދާ މަސައްކަތެއް ކަމަށެވެ. އަދި މިފަދަ ނާޒުކު ހާލަތެއްގައި މުޅި ދުނިޔެ ވަނިކޮށް ޗައިނާ އިން ރާއްޖޭގެ ސިޔާސީ ކަންތައްތަކަށް ބެހުމަކީ ބަލައިގަނެވޭ ކަމެއް ނޫން ކަމަށާއި އެކަން ހުއްޓާލުމަށް ޗައިނާގެ ސަރުކާރަށް ދަންނަވާ ކަމަށްވެސް އާޒިމް ވިދާޅުވިއެވެ.
"ކަނޑައެޅިގެން ޗައިނާއިން ފައިސާ ދީގެން އަޅުގަނޑުމެންގެ މި މާހައުލު، އަޅުގަނޑުމެންގެ މިގައުމު ހަލަބޮލި ކުރަން. މި ނުރައްކާތެރި ދަނޑިވަޅުގައި މިގައުމު ހަލަބޮލި ކުރަން ކުރާ މަސައްކަތް ނުކުރައްވާށޭ. އަޅުގަނޑު ބޭނުން ޗައިނާ ސަރުކާރަށް ވެސް އަދި ޗައިނާ ސަފީރާ އަޅުގަނޑު ބޭނުން މިވާހަތަކައް ދަންނަވަން އެހެން ނަހައްދަވާށޭ."މެދު ހެންވޭރު ދާއިރާގެ މެންބަރު އަލީ އަލީ އާޒިމް
އިދިކޮޅު ޕީޕީއެމް ޕީއެންސީ ކޯލިޝަނުން ބޭއްވި މުޒާހަރާއެއްގައި ކުރީގެ ރައީސް ޑރ. މުހަންމަދު ވަހީދު ހަސަން މަނިކު "ބޮޑު މަންޒަރު އަދި އޮތީ" ކަމަށް ބުނެ ދައްކަވާފައިވާ ވާހަކައަށް ރައްދު ދެއްވަމުން އާޒިމް ވިދާޅުވީ، ދައްކަވަން އުޅޭ ބޮޑު މަންޒަރު ކިތަންމެ ފަހަރަކު ފެނިފައިވާ ކަމަށާއި، ބޮޑު މަންޒަރޭ ކިޔައިގެން އަލުން އަނބުރާ އެމްޑީޕީގެ ވެރިކަން ވައްޓާލާނެ ފުރުސަތު ރައީސް ވަހީދަށް ނުދެއްވާނެ ކަމަށެވެ. އަދި ކޮންމެ ފަހަރަކު އެމްޑީޕީގެ ވެރިކަމާ ތޮޅި، ބޭނުން ގޮތެއް ހަދަން އިދިކޮޅަށް ފުރުސަތެއް ނުދޭނެ ކަމަށް ވެސް އާޒިމް ވިދާޅުވިއެވެ.
އާޒިމް ވިދާޅުވީ އިދިކޮޅަށް ހަޖަމު ނުވެގެން އުޅެނީ އަވަށްޓެރި އިންޑިއާ އިން ރާއްޖެއަށް ވެދެއްވަމުން ގެންދަވާ އެހީތައް ފެނި އެހެން ގޮތެއް ނެތިގެން ކަމަށެވެ. އަދި މި ސަރުކާރުން އަބަދު ވެސް ކުރިއަށް ދާނީ ހުރިހާ އަވަށްޓެރި ގައުމުތަކަކާއި ގުޅިގެން އެފަރާތްތަކުގެ އެހީ އާއި އެއްބާރުލުން ހޯދަމުން ކަމަށް ވެސް އާޒިމް ވިދާޅުވިއެވެ.
އާޒިމް ވަނީ އަވަށްޓެރި އިންޑިއެކޭ އެއްގޮތަށް ޗައިނާ އަކީ ވެސް ރާއްޖެއަށް އެހީތެރިކަން ފޯރުކޮށްދޭ ގައުމެއް ކަމަށް ވިދާޅުވެ، އަދުގެ ސަރުކާރު ސިޔާސަތުތަކާ ޗައިނާ އިން ނުބެހުމަށް ގޮވާލާފައެވެ.
