ރާއްޖޭގައި ސިޔާސީ މިނިވަންކަން ހޯދަން އެންމެހާ ރައްޔިތުން ތެދުވަން ވެއްޖެ ކަމުގައި ރައީސް ޔާމީންގެ ފުރަތަމަ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ސިޔާސީ ފިއްތުންތަކާހުރެ އަމިއްލަފުޅަށް އަރުވާލެއްވިގެން އިނގިރޭސިވިލާތުގައި ދިރިއުޅުއްވަމުން ގެންދަވާ ޑރ. ޖަމީލް މިހެން ވިދާޅުވީ ބުރާސްފަތި ދުވަހު ކުރެއްވި ޓްވީޓެއްގައެވެ.
އިދިކޮޅު އިއްތިހާދު މޯލްޑިވިއަން ޔުނައިޓެޑް އޮޕޮޒިޝަން (އެމްޔޫއޯ)ގެ ލީޑަރ ޑރ. ޖަމީލްގެ ޓްވީޓުގައި ވިދާޅުވެފައިވަނީ "ސިޔާސީ މިނިވަންކަން ހޯދުމަށް އެންމެ ރައްޔިތުން ތެދުވާން ވެއްޖެ ކަމަށާއި ރައީސް ޔާމީންއަކީ ވާދަވެރި ސިޔާސީ މާހައުލަށް ބިރު ގަންނަ ބޭފުޅެއް ކަމަށެވެ.
ޑރ. ޖަމީލް މިހެން ވިދާޅުވެފައި މިވަނީ ކުރިއަށް އޮތް ލޯކަލް ކައުންސިލް އިންތިޚާބަށް ސަރުކާރުން ތަފާތު ނުފޫޒު ފޯރުވަމުންދާ ކަމަށް ތުހުމަތު ކުރެވޭ ދަނޑިވަޅެއްގައެވެ. އެ އިންތިޚާބު ވަނީ ޕީޕީއެމްގެ ރައީސް ޔާމީން ފެކްޝަނުން ހުށަހެޅި މައްސަލައަކާ ގުޅިގެން ކޯޓުން ޤާނޫނު އަސާސީގައި ބުނެފައިވާ ތާރީޚަށް ވުރެ ފަސްކޮށްފައެވެ. އެއިންތިޚާބު ބާއްވަން ފަހުން އިއުލާން ކުރި ތާރީޚްވެސް މިހާރު ވަނީ ފަސްކޮށްފައެވެ.
ޑރ. ޖަމީލް ވިދާޅުވީ ރިޔާސީ އިންތިޚާބުގައި ވާދަކޮށްފާނެ ކަމަށް ބެލެވޭ ހުރިހާ ފަރާތްތަކަކަށް މިހާރު ވަނީ އެ ފުރުސަތު ހަނިކޮށްފައި ކަމަށެވެ. ރައީސް ނަޝީދަށާއި އަދާލަތު ޕާޓީގެ ރައީސް ޝެއިޚް އިމްރާނާއި، ކުރީގެ ޑިފެންސް މިނިސްޓަރ މުހައްމަދު ނާޒިމަށް ވަނީ ދިގު މުއްދަތެއްގެ ހުކުމެއް ކޮށްފައެވެ. ޤާނޫން އަސާސީއަށް ބަދަލު ގެނެސް ރައީސް މައުމޫނަށާއި ޖުމްހޫރީ ޕާޓީގެ ލީޑަރ ޤާސިމް އިބްރާހީމަށް ކުރިމަތިލުމުގެ ފުރުސަތު ވަނީ ގެއްލުވާލައިފައެވެ.
