ސިޔާސީ ޕާޓީތަކުން މަސްލަހަތު ގެއްލޭ ކަންކަމަށް ހިތްވަރު ނުދޭން އީސީގެ ރައީސް ގޮވާލައްވައިފި
ރައީސްގެ ހަށިކޮޅު ގައި ހުޅު ޖަހަން ޕްރޮގްރާމެއްގައި ގޮވާލި
އީސީގެ ރައީސް އަހުމަދު ޝަރީފް
ސިޔާސީ ޕާޓީތަކުން ގައުމުގެ މަސްލަހަތު ގެއްލޭ ކަންކަމަށް ހިތްވަރު ނުދިނުމަށް އިލެކްޝަން ކޮމިޝަންގެ ރައީސް އަހުމަދު ޝަރީފް ގޮވާލައްވައިފި އެވެ.
ޝަރީފް އެހެން ގޮވައިލެއްވީ ރައީސް އިބްރާހިމް މުހައްމަދު ސޯލިހުގެ ހަށި ކޮޅުގައި ހުޅު ޖަހަން ޗެނަލް 13 ޝޯއެއް ގައި ވާހަކަ ދެއްކި މީހަކު ގޮވާލާ ވީޑިއޯ އަކަށް ޓްވިޓާގައި ރިޕްލައި ކުރަމުންނެވެ.
ރައީސްގެ ހަށިކޮޅުގައި ހުޅު ޖަހަން ހިތްވަރުދޭ ފަދަ މޭރުމަކުން ވާހަަކަ ދެއްކީ ހުކުރު ދުވަހު މެންދުރު ޗެނަލް 13 އިން ގެނެގެސްދިން ރައްޔިތުންގެ ޕްރޮގްރާމަށް ގުޅި ބައިވެރިއެކެވެ. އެ މީހާ އެހެން ބުނާ ވީޑިއޯ ޝޯޝަލް މީޑިއާ ގައި ދައުރުވާން ފެށުމުން ބްރޯޑްކާސްޓިން ކޮމިޝަންގެ އިތުރުން ފުލުހުންވެސް ވަނީ އެ މައްސަލަ ބަލަން ފަށާފައެވެ.
އެކަމާއި ގުޅިގެން ޗެނަލް 13 އިން ވަނީ އެ މީހާގެ އަޑު ބްރޯޑްކާސްޓު ކުރެވިފައިވާތީވެ އެކަމަށް މާފަށް އެދި ބަޔާނެއް ނެރެފައެވެ. އެ ސްޓޭޝަނުން ނެރުނު ބަޔާނުގައި ބުނީ، އެ މީހާ އެހެން ބުނުމުން އެ ފޯން ކޯލް ވަގުތުން މެދުކަނޑާލާފައިވާ ކަމަށެވެ. އަދި ޗެނަލް 13 އަކީ އަނިޔާވެރިކަމާއި އާންމުންގެ މެދުގައި ނަފްރަތު އުފެއްދުމަށް ހިތްވަރު ދޭނެ ބައެއް ނޫން ކަމަށް އެ ޗެނަލުން ބުންޏެވެ. އަދި ކުރިޔަށް އޮތް ތަނުގައި އެފަދަ ކަންކަމަށް ހިތްވަރުދީ، ގާނޫނާ ހިލާފް ކަންކަން ކުރުމަށް އެއްވެސް ފަރާތަކަށް ފުރުސަތު ނުދޭނެ ކަމުގެ ޔަގީންކަން އެ ޓީވީ ސްޓޭޝަނުން ދިނެވެ. ޗެނަލް 13 އަށް މީގެ ކުރިންވެސް ބްރޮޑްކޮމް އިން ވަނީ އަންމު ސުލޫކާ މިންގަނޑާ ހިލާފުވެފައިވާތީ ނަސޭހަތް ދީފައެވެ.
