އެމްއޯސީން ކުރިޔަށް ގެންދިޔަ ހައި ޕާފޯމެންސް މެންޓޯޝިޕް ޕްރޮގްރާމް ނިންމާލައިފި
މި ޕްރޮގްރާމުގައި 35 ކޯޗުން ވަނީ ބައިވެފައި
އެމްއޯސީން ކުރިޔަށް ގެންދިޔަ ހައި ޕާފޯމެންސް މެންޓޯޝިޕް ޕްރޮގްރާމްގެ ތެރެއިން
މޯލްޑިވްސް އޮލިމްޕިކް ކޮމެޓީ (އެމްއޯސީ) އިން އިސްނަގައިގެން އޮލިމްޕިކް ސޮލިޑަރިޓީއާ ގުޅިގެން ކުރިޔަށް ގެންދިޔަ ހައި ޕާފޯމެންސް މެންޓޯޝިޕް ޕްރޮގްރާމް ނިންމާލައިފިއެވެ.
ފަސް ދުވަހުގެ މުއްދަތަށް ކުރިއަށް ގެންދިޔަ މި ޕްރޮގްރާމުގައި އެމްއޯސީގައި ރަޖިސްޓްރީކޮށްފައިވާ އެސޯސިއޭޝަންތަކުގެ ތެރެއިން ޖުމްލަ 35 ކޯޗުން ބައިވެރިވެފައިވާއިރު، އޭގެ ތެރޭގައި އެކި އެކި އެސޯސިއޭޝަންތަކުގެ އަރަމުން އަންނަ ކޯޗުން ހިމެނެއެވެ.
މި ކޯޗުންނަށް ތަމްރީން ދީފައިވަނީ ހަންގޭރީގެ ސްޕޯޓްސް ޕާފޯމެންސް ސްޕެޝިލިސްޓެއް ކަމަށްވާ ރެނޭޓާ އަގޯއެވެ.
އެމްއޯސީން ބުނީ މި ޕްރޮގްރާމް ހިންގުމުގެ މަގްސަދަކީ ގައުމީ ލެވެލްގެ ކޯޗުންގެ ފެންވަރު ރަނގަޅުކޮށް، ކުޅުންތެރިންނާ ގުޅިގެން މަސައްކަތްކުރުމަށް ދަސްކޮށްދިނުމަށް ބޭއްވި ޕްރޮގްރާމެއް ކަމަށެވެ. އެގޮތުން މި ޕްރޮގްރާމުގެ ދަށުން އިތުރު ތަމްރީން ޕްރޮގްރާމްތައްވެސް ތަނަވަސްވެގެންދާނެ ކަމަށް އެމްއޯސީން ބުނެއެވެ.
ކޯހުގައި ބައިވެރިވި ކޯޗުން ފާހަގަކޮށް އެ ކޯޗުންނަށް އިތުރު ކޯސްތަކެއް ހޯދައިދިނުމަށް މި ޕްރޮގްރާމުގައި ބައިވެރިވި ފަރާތްތަކުން ވަނީ އެމްއޯސީގައި އެދިފައެވެ. އެގޮތުން އެމްއޯސީގެ ޖެނެރަލް ސެކެޓްރީ އަހުމަދު މަރުޒޫގު ވަނީ އެކަމަށް މަސައްކަތްކޮށްދެއްވާނެ ކަމަށް ވިދާޅުވެފައެވެ.
ހައި ޕާފޯމެންސް މެންޓޯޝިޕް ޕްރޮގްރާމުގައި ބައިވެރިވި ފަރާތްތަކަށް ސެޓްފިކެޓް ހަވާލުކޮށްފައިވާއިރު، މި ޕްރޮގްރާމުގައި ކިޔަވައިދެއްވި ރެނޭޓާއަށް ޕްރޮގްރާމުގައި ބައިވެރިވި ފަރާތްތަކުން ވަނީ ހަދިޔާތަކެއް ދީފައެވެ.
