ދ.އަތޮޅު ތައުލީމީ މަރުކަޒު ބަލިކޮށް 18 އަހަރުންދަށުގެ ޗެމްޕިއަންކަން ވިލާ ހައި ސްކޫލަށް

އެފްއޭއެމުން އިންތިޒާމްކޮށްގެން ކުރިއަށްގެންދާ މައިލޯ އިންޓަރ ސްކޫލް 18 އަހަރުންދަށުގެ އުމުރުފުރާގެ ޗެމްޕިއަންކަން ވިލާ ހައި އިންޓަނޭޝަނަލް ސްކޫލުން ހޯދައިފި އެވެ.

ގަލޮޅު ރަސްމީ ބޯޅަ ދަނޑުގައި ކުޅުނު މި މެޗު ކާމިޔާބުކޮށް ވިލާ އިން ޗެމްޕިއަންކަން ހޯދީ ދ. އަތޮޅު ތައުލީމީ މަރުކަޒާ ވާދަކޮށް 0-2 ލަނޑުން މެޗު ކާމިޔާބުކޮށްގެންނެވެ.

ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ވިލާއިން ވަނީ ލަނޑެއްޖަހާ ލީޑު ނަގާފައެވެ. މި ލަނޑު 12 ވަނަ މިނެޓުގައި ކާމިޔާބުކޮށްދިނީ އިޔާން އަހުމަދު ރަޝީދެވެ.

މިލަނޑަށްފަހު ވެސް ދެޓީމުގެ ފަރާތުން ފޯރިގަދަ ބަލާހިތްވާ ކުޅުމެއް ފެނިގެންދިޔައިރު، ދެޓީމަށްވެސް ވަނީ ލަނޑުޖަހާނެ ހުސް ފުރުސަތުތަކެއް ލިބި ބޭކާރުވެފައެވެ. އަދި ފުރަތަމަ ހާފު ނިމިގެންދިޔައީ އިތުރު ލަނޑެއް ނުޖެހި ދ. އަތޮޅު ތައުލީމީ މަރުކަޒުގެ މައްޗަށް ވިލާ ހައި ސްކޫލް ކުރީގައި އޮވެގެންނެވެ.

މެޗުގެ ދެވަނަ ހާފު ފެށިގެން ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދ. އަތޮޅު ތައުލީމީ މަރުކަޒަށް ވަނީ ނަތީޖާ ހަމަހަމަކުރުމަށް ރަނުގެ ފުރުސަތުތަކެއް ލިބި ބޭކާރުވެފައެވެ.

މި މެޗުގެ ފަހު ވަގުތާ ޖެހެންދެންވެސް ދ. އަތޮޅު ތައުލީމީ މަރުކަޒުގެ ފަރާތުން މޮޅު ކުޅުމެއް ފެނިގެންދިޔައިރު، ވިލާ ހައި ސްކޫލުން ވަނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގައި ލަނޑެއްޖަހާ ދ. އަތޮޅު ތައުލީމީ މަރުކަޒުގެ އުންމީދު ފުނޑުފުނޑު ކޮށްލާފައެވެ. މިލަނޑު ވިލާ ހައި ސްކޫލަށް ކާމިޔާބުކޮށްދިނީ މުހައްމަދު ޝަމްވީލެވެ.

މި މުބާރާތުގެ ފެއާ ޕްލޭ ޓީމަކަށް ހޮވުނީ އަހުމަދިއްޔާ އިންޓަނޭޝަނަލް ސްކޫލެވެ.

މުބާރާތުގެ އެންމެ ގިނަ ލަނޑުޖެހި ތިން ކުޅުންތެރިންނަށް ހޮވުނީ ވިލާ އިންޓަނޭޝަނަލް ހައި ސްކޫލަށް 6 ލަނޑު ކާމިޔާބުކޮށްދިން އިޔާން އަހުމަދު ރަޝީދާއި ދ. އަތޮޅު ތައުލީމީ މަރުކަޒަށް 4 ލަނޑު ކާމިޔާބުކޮށްދިން މުހައްމަދު ޒައްޔާން އަދި ވިލާ އިންޓަނޭޝަނަލް ހައި ސްކޫލަށް 3 ލަނޑު ކާމިޔާބުކޮށްދިން މުސައްނިފް މުހައްމަދެވެ.

މި މުބާރާތުގެ ޑްރީމް ޓީމަކަށް ހޮވުނީ ދ. އަތޮޅު ތައުލީމީ މަރުކަޒުގެ ގޯލު ކީޕަރު އަހުމަދު ސަމާހް އަލީ އާއި މުހައްމަދު ޒައްޔާން އާއި މުހައްމަދު ޝަޒީލް އާއި ހުސައިން އަހުސަމް މޫސާ އަދި އިރުޝާމް އާދަމް ނަސީރެވެ.

މީގެ އިތުރުން ދެން ޑްރީމް ޓީމުގައި ހިމެނެނީ އަހުމަދިއްޔާ އިންޓަނޭޝަނަލް ސްކޫލުގެ ނޫރުﷲ މުފީދާއި ސީއެޗްސީގެ ރިޝްވާން އިސްމާއިލާއި ވިލާ އިންޓަނޭޝަނަލް ހައި ސްކޫލްގެ މުސައްނިފް މުހައްމަދާއި އިޔާން އަހުމަދު ރަޝީދާއި އަހުމަދު ޝާވިން ޝިހާމް އަދި އަބްދުﷲ ނާވިޝް އެވެ.