މެޗުގެ ނަތީޖާ ބަދަލުވެގެންދިޔައީ ގޯލު ކީޕަރުގެ ސަބަބުން: އަބަހާނީގެ ކޯޗު

އޭއެފްސީ ކަޕްގައި މާޒިޔާ އަތުން އަބަހާނީ ބަލިވީ ގޯލު ކީޕަރުގެ ފަރާތުން ފެނިގެންދިޔަ ގޯހުން ކަމަށް އެޓީމުގެ ކޯޗު ޑްރާގޯ މަމިޗް ބުނެފިއެވެ.

މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން މަމިޗް ބުނީ މެޗުގައި ފުރަތަމަ ފެނިގެންދިޔަ ލަނޑަކީ ގޯލު ކީޕަރުގެ ފަރާތުން ފެނިގެންދިޔަ ގޯހަކުން ވަތް ލަނޑެއް ކަމަށާއި، އެ ލަނޑާއެކު މެޗުގެ ނަތީޖާ ބަދަލުވެފައިވާ ކަމަށެވެ. އެހެންނަމަވެސް އޭނާ ބުނީ އެ ގޯސް ގޯލު ކީޕަރުގެ ފަރާތުން ފެނިގެންނުދިޔަ ނަމަ މެޗު އެއްވަރުކޮށްލައިގެން އަބަހާނީއަށް ނިންމާލަން ފުރުސަތު ލިބުނު ކަމަށެވެ.

މަމިޗް ބުނީ އަބަހާނީގެ ގޯލު ކީޕަރުގެ ފަރާތުން އެވަރުގެ ގޯހެއް ގެންނަންޖެހޭނެ ކަމަށް ގަބޫލުނުކުރާ ކަމަށާއި، އާ ޓީމަކަށްވުމުން ވަރަށް ބޮޑެތި ގޮންޖެހުންތައް ކުރިމަތިވެފައިވާ ކަމަށެވެ. އެގޮތުން އޭނާ ބުނީ އަބަހާނީގައި ހިމެނެނީ އެޓީމަށް ކުޅުނު އެންމެ ދެ ކުޅުންތެރިން ކަމަށާއި، ބާކީ ތިބީ ހުސް އާ ކުޅުންތެރިން ކަމަށެވެ. އެހެންނަމަވެސް އޭނާ ބުނީ ޓީމު މަޑުމަޑުން ރަނގަޅުވަމުން އަންނަ ކަމަށާއި، ހުރިހާ ވިސްނުމެއްވެސް ދެން ބަހައްޓާނީ އެފްއޭކަޕް ކާމިޔާބުކުރަން ކަމަށެވެ.

މާޒިޔާ ޓީމަށް މަރުހަބާ ކިޔަމުން މަމިޗް ބުނީ މާޒިޔާ އަންނަނީ ވަރަށް ބޮޑެތި ކުރިއެރުންތައް ހޯދަމުން ކަމަށާއި، މެޗުގައިވެސް އެޓީމު ރަނގަޅު ކުޅުމެއް ދައްކާ ދެ ލަނޑު ކާމިޔާބުކޮށްފައިވާ ކަމަށެވެ.

އެހެންނަމަވެސް އޭނާ ބުނީ މޯހަން ބަގާންއާ ދެކޮޅަށް ބެންގަލޫރު އެފްސީ ކުޅޭ މެޗުން ބެންގަލޫރު އެފްސީ މޮޅުވެއްޖެ ނަމަ ގްރޫޕްގެ ޗެމްޕިއަންކަން ހޯދުން އެންމެ ގާތީ ބެންގަލޫރު އެފްސީ ކަމަށެވެ.

އޭއެފްސީ ކަޕްގައި އަބަހާނީ ކުޅުނު ފަސް މެޗުގެ ތެރެއިން ހަތަރު މެޗުން އެޓީމު ބަލިވެފައިވާއިރު، އެޓީމު ވަނީ ބެންގަލޫރު އެފްސީއާ ދެކޮޅަށް އެޓީމު ކުޅުނު މެޗު ކާމިޔާބުކޮށްފައެވެ.