ފުރަތަމަ ޑިވިޝަނުގެ ކޮންމެ ކުލަބަކަށް އެފްއޭއެމުން ތިން މިލިޔަން ރުފިޔާ

ފުރަތަމަ ޑިވިޝަނުގެ ކޮންމެ ކުލަބަކަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ތިން މިލިޔަން ރުފިޔާ ދިނުމަށް އެއްބަސްވެއްޖެއެވެ.

"ޓުވާޑްސް ފިޔުޗާ" އެފްއޭއެމް ފައިނޭންޝިއަލް އެސިސްޓަންސް ޕްރޮގްރާމްގެ ދަށުން ހޯމަ ދުވަހު އެފްއޭއެމުން ވަނީ ފުރަތަމަ ޑިވިޝަނުގެ އަށް ކުލަބާއެކު އެއްބަސްވުމުގައި ސޮއިކޮށްފައެވެ. މި ޕްރޮގްރާމަކީ އެފްއޭއެމްގެ ރައީސްގެ މަގާމަށް ދެވަނަ ދައުރަކަށް އިންތިޚާބުވުމަށްފަހު ބައްސާމް އަދީލް ޖަލީލް ކުލަބުތަކަށް ވެވަޑައިގެންނެވި ވައުދެކެވެ. އެގޮތުން މި ޕްރޮގްރާމުގެ ދަށުން ފުރަތަމަ ޑިވިޝަނުގެ ކޮންމެ ކުލަބަކަށް އަހަރެއްގެ މައްޗަށް ތިން މިލިޔަން ރުފިޔާ ލިބިގެންދާނެ ކަމަށް އެފްއޭއެމުން މައުލޫމާތުދެއެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ މި އެއްބަސްވުމުގެ މައިގަނޑު އަސާސު ހަތް ކަމަކަށް ބިނާވެގެންދާ ކަމަށާއި، އެއީ ކުލަބު ލައިސަންސިންގ، އެކެޑަމީ އެންޑް ޔޫތު ޑިވެލޮޕްމަންޓް، ކުލަބު މެނޭޖުމަންޓް، ކުލަބު ފައިނޭންޝިއަލް ރިޕޯޓު، އަންހެނުންގެ ހަރަކާތްތައް، ސީއެސްއާރް ހަރަކާތްތައް އަދި ޕްރޮމޯޝަނަލް ހަރަކާތްތައް ކަމަށް ވިދާޅުވިއެވެ.

އަދި ވިދާޅުވީ މީގެ ކުރިން ސަރުކާރުން ވަރަށް ބޮޑު އެހީއެއް ކުލަބުތައް ހިންގުމަށް ލިބިގެންދިޔަ ކަމަށާއި، އެހެން ނަމަވެސް މިހާރު އެފްއޭއެމާއެކު ވެވުނު އެއްބަސްވުމެއްގެ ދަށުން ކޮންމެ ކުލަބަކަށް ތިން މިލިޔަނެއްހާ ރުފިޔާ ލިބިގެންދާނެ ކަމަށެވެ. އަދި މުޅި އަހަރު ދުވަހަށް ލިބޭ މި ފައިސާ ޚަރަދުކުރަން ޖެހޭނީ ކުލަބު ހިންގުމަށާއި ކުލަބު ހަރުދަނާ ކުރަންޖެހޭ އެތައް ބައިވަރު ކަންތައްތަކެއް ކުރުމަށް ކަމަށްވެސް ޖަވާޒް ވިދާޅުވިއެވެ.

އެފްއޭއެމުން ފުރަތަމަ ޑިވިޝަނުގެ ކުލަބުތަކަށް ތިން މިލިޔަން ރުފިޔާ ދޭއިރު، މީގެ ކުރިން ކުލަބުތަކަށް ޚަރަދު ކުރަމުން އައީ ސަރުކާރުންނެވެ.

އެގޮތުން ސަރުކާރުގެ އިސްނެގުމާއެކު 2017 ވަނަ އަހަރު ފެށި ސްޓޭޓް އޯންޑް އެންޓަޕްރައިޒަސް (އެސްއޯއީ) އެސިސްޓަންޓްސް ޕްރޮގްރާމުގެ ދަށުން ފުރަތަމަ ޑިވިޝަނުގައި ވާދަކުރާ ޓީމުތަކުގެ ތެރެއިން ކޮންމެ ޓީމަކަށް ދެ މިލިޔަން ރުފިޔާ ދިނެވެ. އަދި ދިވެހި ޕްރިމިއާ ލީގަށް ހޮވިއްޖެނަމަ އިތުރު އެއް މިލިޔަން ރުފިޔާ ދިނެވެ.

އެކަމަކު 2018 ވަނަ އަހަރުގެ ނިޔަލަށް އެސްއޯއީ އެއްބަސްވުން ހަމަވިއިރު، ގިނަ ކުލަބުތައް އޮތީ މާލީ ގޮތުން އަޑިއަޅާލާފައެވެ. އަދި މިދިޔަ އަހަރު ކުލަބުތަކަށް އެސްއޯއީ ފައިސާ ލިބޭނެ ކަމަށް ސަރުކާރުން އެކި ފަހަރު ބުނި ނަމަވެސް ، ފަހުން ކުޅިވަރާ ބެހޭ ވަޒީރު އަޙްމަދު މަޙްލޫފް ވަނީ ފުޓްބޯޅަ ކުލަބުތަކަށް އެސްއޯއީން ފައިސާ ދެމުން ދިޔައީ އެއްވެސް އުސޫލެއްގެ ތެރެއިން ނޫން ކަމަށް ވިދާޅުވެފައެވެ. އެއާއެކު މިދިޔަ އަހަރު ކުލަބުތައް ހިންގާފައިވަނީ އެތައް ގޮންޖެހުންތަކަކާ އެކުއެވެ.