ކޮވިޑުގެ ބަލި މީހުންނަށް ފަރުވާދޭން ތާޖުއްދީންގެ ހޯލުގައި އެނދުތަކެއް ބަހައްޓައިފި
27 އޯގަސްޓު 2020 | ބުރާސްފަތި 14:3419 އެނދެއް ބަހައްޓާނެ
ތާޖުއްދީން ސްކޫލު ހޯލުގައި އެނދު ރާވަން އެސްޓީއޯގެ މުވައްޒަފުން ހަރަކާތްތެރިވަނީ
ކޮވިޑް-19 ބަލި މީހުންނަށް ފަރުވާދޭން ތާޖުއްދީން ސްކޫލު ހޯލުގައި އެނދުތަކެއް އެސްޓީއޯ އިން ބަހައްޓައިފިއެވެ.
އެސްޓީއޯ އިން ބުނީ، ތާޖުއްދީން ސްުކޫލުގައި ބަހައްޓާ 19 އެނދަކީ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން އަންގައިގެން ބަހައްޓާ އެނދުތަކެއް ކަމަށެވެ. މި އެނދުތަކަކީ ބަލި ޖެހޭ މީހުންގެ ކޭޕޭސިޓީ އިތުރު ކުރުމުގެ ގޮތުން ކުރެވޭ މަސައްކަތެކެވެ. އެނދުތަކުގެ އިތުރުން ބަލި މީހުންނަށް ފަރުވާދޭން ބޭނުންވާ ސިއްހީ އާލާތްތައް އެތަނުގައި ބަހައްޓަން ހަމަޖެހިފައިވާ ކަަމަށް އެސްޓީއޯއިން މައުލޫމާތުދެއެވެ.
އެޗްއީއޯސީގެ މީޑިއާ އޮފިޝަލް ރާއްޖެ.އެމްވީ އަށް ވިދާޅުވީ، އެތަނުގައި ފަރުވާ ދޭނީ ހޯމް އައިސޮލޭޝަން ގައި ތިބޭއިރު ކުއްލި ފަރުވާ ބޭނުންވާ ފަރާތްތަކަށް ކަމަށެވެ.
ކޮވިޑުގެ ބަލި މީހުންނަށް ތަޖުއްދީންގެ ހޯލުގައި އެނދުތަކެއް ބަހައްޓާފައިވާއިރު، މިވަގުތު މާލެ ސަރަހައްދުން ކޮވިޑް-19 އަށް ފަރުވާދެމުންދާ މީހުންގެ ތެރެއިން އެޑްމިޓްކޮށްގެން ފަރުވާ ދިނުމަށް ހާއްސަ ކޮށްފައިވާ އެނދުތަކުގެ 62 އިންސައްތަ އެނދު މިހާރު ބޭނުން ކުރަމުންދާ ކަމަށް އެޗްއީއޯސީގެ ތަރުޖަމާނު ޑރ. ނަޒްލާ ރަފީގް ވަނީ ހުސްވި ހަފްތާގައި ވިދާޅުވެފައެވެ.
މާލެ ސަރަހައްދުން ކޮވިޑުގެ ޖެހޭ މީހުންނަށް ފަރުވާދެމުން ދަނީ ހުޅުމާލޭ ގައި ގާއިމްކޮށްފައިވާ މެޑިކަލް ފެސިލިޓީގައެވެ. އަދި ހާލުބޮޑުވާ މީހުންނަށް ފަރުވާދެމުންދަނީ ދަރުމަވަންތަ ހޮސްޕިޓަލުގެ 11 އަދި 16 ވަނަ ފަންގިފިލާގައެވެ. ރަށްރަށުން ޕޮޒިޓިވްވާ މީހުންނަށް ފަރުވާދެނީ އަތޮޅު ފެސިލީޓީ ތަކުގައި އެވެ.
ރާއްޖޭގައި ކޮވިޑް-19 ގެ ހާލަތު ދަނީ ދުވަހެއް ދުވަހަކަށް ގޯސްވަމުންނެވެ. މި ފަހުން ރިޕޯޓް ކުރެވޭ ކޭސްތަކުގެ ތެރެއިން ގިނަ މީހުންނަކީ ދިވެހިންނެވެ. މި މީހުންގެ ތެރޭގައި ގިނަ އަދަދެއްގެ ޒުވާނުންވެސް ހިމެނެއެވެ. ބުދަ ދުވަހުގެ ނިޔަލަަށް 7225 މީހަކު ވަނީ މި ބައްޔަށް ޕޮޒިޓިވްވެފައެވެ. ރާއްޖެ ހިމެނެނީ ދުނިޔޭގެ އާބާދީގެ ނިސްބަތުން ކޮވިޑުގެ ކޭސްތައް އެންމެ ގިނައިން ރިޕޯޓް ކުރެވުނު އެއް ގައުމުގެ ގޮތުގައެވެ.
