ބްރެންޓަން ޓެރަންޓަށް އުމުރު ދުވަހުގެ ޖަލު ހުކުމެއް!

ނިއުޒިލޭންޑްގެ ދެ މިސްކިތެއްގައި ޓެރަރިސްޓް ހަމަލާ ދިން ބްރެންޓަން ޓެރަންޓަށް އުމުރު ދުވަހުގެ ޖަލު ހުކުމެއް ކޮށްފިއެވެ.

ކްރިސްޓް ޗާރޗް ގައި ދިން މި ޓެރަރިސްޓް ހަމަލާގައި ވަނީ ޖުމްލަ ފަންސާސް މީހުން މަރުވެފައެވެ.

ބްރެންޓަންވަނީ ފޭސްބުކް މެދުވެރިކޮށް މިހަމަލާ ލައިވްކޮށް ދައްކާފައެވެ. މީގެ ސަބަބުން އެ ވީޑިއޯ މުޅި ދުނިޔެއަށް އާއްމުވެގެން ދިޔައެވެ.

އެންމެ ފުރަތަމަ އޭނާ ހަމަލާ ދީފައިވަނީ އަލް – ނޫރު މިސްކިތަށެވެ. އެއަށްފަހު އޭނާވަނީ ލިންވުޑް އިސްލާމިކް ސެންޓަރަށް ގޮސް އެތަނުގައި ތިބި މީހުންނަށް ހަމަލާ ދީފައެވެ.

ޕެރޯލް އެއް ނުލިބޭގޮތަށް އޭނާގެ މައްޗަށް އުމުރު ދުވަހުގެ ހުކުމެއް އިިއްވާފައިވާއިރު އިތުރު މިސްކިތަކަށްވެސް ހަމަލާ ދިނުމަށް އޭނާ ރާވާފައިވާކަމަށް ރިޕޯޓުތަކުން ވަނީ އިނގިފައެވެ.