އިޒްރާއިލް ޖަލުތަކުގައި ތިބި ފަލަސްތީނުގެ ގައިދީން ބަނޑުހައިހޫނުކަމުގެ ހަޅުތާލެއް ކުރަނީ

އިޒްރާއިލްގެ ޖަލުތަކުގައި ތިބި އެތައް ސަތޭކަ ފަލަސްތީނު ރައްޔިތުން ބަނޑުހައިހޫނުކަމުގެ ހަޅުތާލެއް ކުރަމުންދާ ކަމަށް ރިޕޯޓުތައް ބުނެފިއެވެ.

ފަލަސްތީނުގެ އެތައް ސަތޭކަ ގައިދީން ބަނޑުހައިހޫނުކަމުގެ ހަޅުތާލެއް ހޯމަ ދުވަހު ފަށާފައިވާއިރު މިހަފްތާގެ ހޯމަ ދުވަހަކީ ފަލަސްތީނުގައި، ފަލަސްތީނަށް ނިސްބަތްވާ ސިޔާސީ ކުއްވެރިން ދޫކޮށްލުމަށް އެދި ގޮވާލާ ފާހަނގަކުރާ ހާއްސަ ދުވަހެއް ވެސް މެއެވެ. ބަނޑުހައިހޫނުކަމުގެ ހަޅުތާލު ކުރަމުންދާ ގައިދީން ގޮވާލަމުންދަނީ ޖަލުތަކުގެ ހާލަތު ރަނގަޅު ކުރުމަށެވެ. އޭގެ ތެރޭގައި ރަނގަޅު ބޭސްފަރުވާ ލިބުން ހިމެނެއެވެ.

ރިޕޯޓުތައް ބުނާގޮތުން ބަނޑުހައިހޫނުކަމުގެ ހަޅުތާލުގައި ބައިވެރިވާ މީހުންގެ އަދަދު އުޅެނީ 700 އާއި 2,000 ދެމެދުގައެވެ.

އިޒްރާއިލްގެ މީޑިއާ ރިޕޯޓުތައް ބުނާ ގޮތުން ބަނޑުހައިހޫނުކަމުގެ ހަޅުތާލު ފެށި ސަބަބަކީ އިޒްރާއިލްގެ ޖަލެއްގައި ހުރި މަރްވާން ބަރްގޫތީ އެކަމަށް ގޮވާލުމުންނެވެ. ބަރްގޫތީއަކީ މީހަކު ގަސްތުގައި މަރާލަން އުޅުނު ކަމުގެ ދައުވާތަކުގައި 40 އަހަރު ޖަލުގައި ހޭދަކުރަން ޖެހިފައިވާ މީހެކެވެ. ބަރްގޫތީ ޖަލުގައި ހުއްޓަސް އޭނާގެ މަގުބޫލުކަން އަދިވެސް ބޮޑުއިރު، އަދިވެސް ފަަލަސްތީނުގެ ފަތަހް ޕާޓީގައި އޭނާއަކީ ލީޑަރެއްގެ ދަރަޖައިގައި ހުރި މީހެކެވެ.

ފަލަސްތީނުގެ ގައިދީން ބަނޑުހައިހޫނުކަމުގެ ހަޅުތާލެއް މިފެށީ، 1967 ވަނަ އަހަރު އިޒްރޭލާއި އަރަބީންނާ ދެމެދު ހިނގި 6 ދުވަހުގެ ހަނގުރާމައަށް 50 އަހަރު ފުރުމާ ގާތްވަމުންދާ ދުވަސްވަރެއްގައި ކަން ފާހަނގަކޮށްލެވެއެވެ. ފަލަސްތީނުގެ ބިންތައް އިޒްރޭލުން އިސްތިއުމާރު ކުރަން ފަށާފައިވަނީ ހަނގުރާމައިގެ ފަހުންނެވެ. އެކި އެކި ކުށްތަކުގައި 6,500 ފަލަސްތިނު ރައްޔިތުން އިޒްރޭލު ޖަލުތަކުގައި ތިބިއިރު އޭގެތެރޭގައި 300 ކުޑަކުދިން ވެސް ހިމެނެއެވެ.