ޚާލިދު އަލް އަރާޖްއަށް ބޮޑު ޖަލު ހުކުމެއް އަތުވެދާނެ!

ޝާހީ އަމުރަކުން ކުއްލިއަކަށް ކެބިނެޓަށް ގެންނެވި ބަދަލެއްގައި ސައުދީ ރަސްގެފާނު ސަލްމާން ބިން އަބްދުލް އަޒީޒް މަޤާމުން ދުރުކުރެއްވި ސައުދީ އަރަބިއާގެ ކުރީގެ ސިވިލް އެފެއާޒް މިނިސްޓަރު ޚާލިދު އަލް އަރާޖަށް ބޮޑު ޖަލު ހުކުމެއް އަތުވެދާނެ ކަމަށް ވަކީލުން ވިދާޅުވެއްޖެއެވެ.

ސައުދީ އަރަބިޔާގައި ވަޒީރުންގެ މައްސަލަތައް ބެލުމަށް ޚާއްސަކޮމިޓީތައް މީގެ އެތައް އަހަރެއް ކުރިން އެކުލަވާލާފައި ވެއެވެ.

އެގޮތުން އަރާޖުގެ މައްސަލަ ބަލަނީ މީގެ ފަންސާހަކަށް އަހަރުކުރިން އެކުލަވާލާފައިވާ ކޮމިޓީއަކުންނެވެ. އަދި މިއީ އެކޮމިޓީން ވަޒީރެއްގެ މައްސަލަ ބަލާ ފުރަތަމަ ފަހަރެވެ.

ސައުދީގެ ގަނޫނީ ބައެއް ވަކީލުން ވިދާޅުވާ ގޮތުގައި އަރާޖުގެ މައްޗަށް ތުހުމަތުކުރާ މައްސަލަ ސާބިތުވެއްޖެނަމަ މަދުވެގެން 3 އަހަރު ނުވަތަ 3 އަހަރާއި 10އަހަރާ ދެމެދުގެ ހުކުމެއް އަތުވެދާނެއެވެ.

އަރާޖުގެ މައްޗަށް ތުހުމަތުކުރެވޭ މައްސަލަ ބަލަނީ ފަސް މެންބަރުންގެ މައްޗަށް އެކުލެވޭ ކޮމިޓީއަކުންނެވެ. އެކޮމިޓީގައި ތިއްބަވަނީ ތިން ވަޒީރަކާއި ހައި ކޯޓުގެ ދެ ފަނޑިޔާރުންނެވެ.

އަރާޖު މަޤާމުން ދުރުކުރީ ނޭޝަނަލް އެންޓި-ކޮރަޕްޝަން ކޮމިޝަން (ނަޒާހާ) އިން އޭނާގެ މައްސަލަ ތަޙްޤީގުކުރަން ރަސްގެފާނުގެ އަރިހަށް ހުށަހެޅުމުންނެވެ.

ކޮރަޕްޝަނުގެ މައްސަލައެއްގައި އަރާޖު މަޤާމުން ވަކިކުރަން ޖެހުނީ ސިވިލް ސާވިސްގެ އިސް މަޤާމަކަށް އޭނާގެ ދަރިކަލުން ހަމަޖައްސަވާ ފައިވާތީއެވެ.

އެގޮތުން މުނިސިޕަލް އެންޑް ރޫރަލް އެފެއާޒް މިނިސްޓްރީގެ ވަރަށް އިސް މަގާމަށް އޭނާގެ ދަރިކަލަކު ހަމަޖައްސާފައިވަނީ އަމަލުކުރަން ޖެހޭ އުސޫލުތަކާ ޚިލާފަށް ކަމަށް ތުހުމަތު ކޮށްފައިވެއެވެ.

ސައުދީގައި ވަޒީފާ ދިނުމުގައި ހެދިފައިހުރި ގާނޫނުތަކާއި ސިވިލް ސާވިސްގެ ގަވައިދުތަކުގައި ބުނާ ގޮތުން ތަޖްރިބާކާރު، ސީނިއާ ކޮންސަލްޓަންޓެއްގެ މަގާމަށް މީހަކު ހަމަޖެއްސޭނީ އެމީހަކަށް 33 އަހަރުވެފައިވާ ނަމައެވެ.

މުނިސިޕަލް އެންޑް ރޫރަލް އެފެއާޒް މިނިސްޓްރީގެ ސީނިއާ މަގާމަށް އަރާޖު އޭނާގެ ދަރިކަލުން ހަމަޖައްސަވާފައި ވާއިރު، މުސާރަ އަށް މަހަކު 21،600 ރިޔާލް (5،760 ޑޮލަރު) ދީފައިވެ އެވެ.