ކަރަޕްޝަންގެ މައްސަލައެއްގައި ޖަލުގައި ހުންނެވި އިޒްރޭލުގެ ކުރީގެ ބޮޑު ވަޒީރު އޮލްމާޓް ކަފާލުތުގެ ދަށުން މިނިވަން ކޮށްފި

އިޒްރޭލްގެ ކުރީގެ ބޮޑުވަޒީރު އިހޫދު އޮލްމާޓްގެ ޖަލު ހުކުމް ކަފާލާތުގެ ދަށުން ލުއިކޮށް ޖަލުން މިނިވަން ކޮށްފިއެވެ.

ކަރަޕްޝަންގެ ކުށް ސާބިތުވެ އޮލްމާޓް ތަންފީޒު ކުރައްވަމުން ގެންދެވީ 27 މަސް ދުވަހުގެ ޖަލު ހުކުމެކެވެ.

އޮލްމާޓް ޖަލުން ދޫކޮށްލީ އާދިއްތަ ދުވަހުގެ ހެނދުނުއެވެ.

އޮލްމާޓް އިޒްރޭލްގެ ބޮޑުވަޒީރުކަން ކުރެއްވީ 2006 ން 2009 އަށެވެ. އަދި އޭނާއަކީ އިޒްރޭލްގައި ބޮޑުވަޒީރުކަން ކުރެއްވި ބޭފުޅުންގެ ތެރެއިން ޖަލު ހުކުމާ ކުރިމަތިލައްވަން ޖެހި ވަޑައިގަތް ފުރަތަމަ ފަރާތްކަން ފާހަގަ ކުރެވެއެވެ.

އޮލްމާޓްގެ މައްޗަށް ކަރަޕްޝަންގެ ކުށް ސާބިތުވެ ޖަލުގައި ބަންދު ކުރެވުނީ 2016 ވަނަ އަހަރުގެ ފެބްރުއަރީގައެވެ.

އޮލްމާޓް ޖަލުން މިނިވަން ކުރުމަށް އިޒްރޭލްގެ ޕެރޯލް ބޯޑުން ނިންމީ ހުސްވި ހަފްތާގެ ބުރާސްފަތި ދުވަހުއެވެ. ނަމަވެސް ކަފާލާތުގެ ޝަރުތައް ރަސްމީ ކޮށް ހާމަކޮށްފައެއް ނުވެއެވެ.

އިޒްރޭލްގެ ނޫސްތައް ބުނާ ގޮތުގައި އޮލްމާޓް ޖަލުން މިނިވަންކުރި ޝަރުތުތަކުގެ ތެރޭގައި ގައުމުން ބޭރަށް ވަޑައި ނުގަތުމާއި، މަހަކު ދެފަހަރު ފުލުހަށް ހާޒިރުވުން ހިމެނޭ ކަމަށެވެ.

އިޒްރޭލްގެ ގާނޫނު ބުނާގޮތުން ޕެރޯލް ބޯޑުން ކަފާލާތު ހަމަޖައްސައިދިނުމުން މައާފަށް އެދި އިޒްރޭލްގެ ރައީސަށް ދެންނެވިދާނެއެވެ. އަދި ރައީސް މައާފް ދެއްވައިފިނަމަ ކަފާލާތުގެ ޝަރުތުތައް ނިމުމަކަށް އައިސް މުޅިން އެމީހަކު މިނިވަން ވާނެއެވެ.

މި އަހަރުގެ މާޗް މަހު އުމުރުން 71 އަހަރުގެ އޮލްމާޓް ވަނީ އޭނާގެ އަދަބު ލުއިކޮށްދެއްވާތޯ އިޒްރޭލްގެ ރައީސް ރިވްލިން އަށް ދަންނަވާފައެވެ. ނަމަވެސް އިޒްރޭލްގެ ރައީސް އަދަބު ލުއިކޮށްދެއްވާފައެއް ނުވެއެވެ. އޭގެ ބަދަލުގައި އިޒްރޭލްގެ ރައީސް ވިދާޅުވީ ޕެރޯލް ބޯޑުން ކަފާލާތު ދީފިނަމަ އަދަބު މާފުކޮށްދެއްވާނެ ކަމަށެވެ.