ޑިބްރޭނާ އަކީ ލިވަޕޫލްގެ މެދުތެރެއަށް ފައްކާ ކުޅުންތެރިއެއް: ކޮލިމޯ

މެންޗެސްޓާ ސިޓީއަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑިބްރޭނާ އަކީ ލިވަޕޫލްގެ މެދުތެރެއަށް ފައްކާ ކުޅުންތެރިއެއް ކަމަށް ލިވަޕޫލްގެ ކުރީގެ ފޯވާޑް ސްޓާން ކޮލިމޯ ބުނެފިއެވެ.

ކޮލިމޯ ބުނީ ޑިބްރޭނާ އަކީ މިވަގުތު ދުނިޔޭގައި ހުރި އެންމެ މޮޅު އެއް މިޑްފީލްޑަރު ކަމަށާއި، އަންނަ ސީޒަނަށް ލިވަޕޫލް ނުކުންނައިރު، ޑިބްރޭނާ ކަހަލަ ކުޅުންތެރިއެއް ލިވަޕޫލުން ފެންނަން ޖެހޭ ކަމަށެވެ.

ޑިބްރޭނާއަށް ޔޫރަޕްގެ ބޮޑެތި ކުލަބުތަކުން ފާރަލަމުން އަންނަ ކަމަށާއި، އޭނާ ވަނީ މި ސީޒަނުގެ އިނގިރޭސި ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ. ކޮލިމޯ ބުނީ ޑިބްރޭނާއަށް މިވަގުތު ބޭނުންވަނީ ނަތީޖާ ނެރެވޭނެ ވަރުގެ ކުލަބެއް ކަމަށާއި، ލިވަޕޫލްގެ ކޯޗު ޔާގެން ކްލޮޕާއެކު ޑިބްރޭނާއަށް އިތުރު ކާމިޔާބީތައް ހޯދޭނެ ކަމަށެވެ.

އުމުރުން 29 އަހަރުގެ ޑިބްރޭނާ މި ސީޒަނުގެ ޕްރިމިއާ ލީގުގެ މޮޅު ކުޅުންތެރިޔާގެ މަގާމު ހޯދިއިރު، އޭނާ ވަނީ މި ސީޒަނުގެ ޕްރިމިއާ ލީގުގައި ސިޓީއަށް 13 ލަނޑު ޖަހައިދިނުމުގެ އިތުރުން، 20 ލަނޑު ކާމިޔާބުކުރުމަށް އެހީތެރިވެފައެވެ.

ބެލްޖިއަމްގެ ގެންކްއިން 2008 ވަނަ އަހަރު ސީނިއާ ކެރިއަރު ފެށި ޑިބްރޭނާ މީގެ ކުރިން 2012 ވަނަ އަހަރު ވަނީ ޗެލްސީއަށް ބަދަލުވެފައެވެ. އެކަމަކު ޗެލްސީގައި ޑިބްރޭނާ ހޭދަކުރި ދެ ސީޒަނުގައި އޭނާ ކުޅެދީފައިވަނީ އެންމެ ތިން މެޗެވެ. އެއަށްފަހު ލޯނު އެއްބަސްވުމެއްގެ ދަށުން ޖަރުނަމަނުގެ ވާޑާ ބްރެމަން އާއި ވުލްފްސްބާގަށްވެސް ޑިބްރޭނާ ވަނީ ކުޅެދީފައެވެ.

ޑިބްރޭނާ ސިޓީއަށް ބަދަލުވީ 2015 ވަނަ އަހަރުގައެވެ. އެއަށްފަހު މިހާތަނަށް ސިޓީއަށް ކުޅެދިން 222 މެޗުގައި އޭނާ ވަނީ 57 ލަނޑު ކާމިޔާބުކޮށްފައެވެ. އަދި ވަނީ ސިޓީއާއެކު ޕްރިމިއާ ލީގު ދެ ފަހަރު އަދި އެފްއޭ ކަޕް އެއް ފަހަރު ކާމިޔާބުކޮށްފައެވެ.