ފްރާންސަށް ކޯޗުކަން ކޮށްދިނުމަކީ ހުވަފެނެއް: ޒިދާން

ފްރާންސްގެ ގައުމީ ފުޓްބޯޅަ ޓީމަށް ކޯޗުކަން ކޮށްދިނުމަކީ ދެކެމުން އަންނަ ހުވަފެނެއް ކަމަށް ރެއާލް މެޑްރިޑްގެ ކޯޗު އަދި ފްރާންސްގެ ކުރީގެ ކެޕްޓަން ޒިނެދިން ޒިދާން ބުނެފިއެވެ.

ޒިދާން މީގެކުރިންވެސް ވަނީ ފްރާންސްގެ ފުޓްބޯޅަ ޓީމުގެ ކޯޗުގެ މަގާމާ ހަވާލުވާން ބޭނުންވާކަން ހާމަކޮށްފައެވެ.

ޒިދާންގެ ފުޓްބޯޅަ ސްކޫލް "ޒިދާން ފައިވް ކުލަބު" ގެ މަސައްކަތް ފެށުމަށްފަހު މީޑިއާއަށް ދިން އިންޓަވިއުއެއްގައި ޒިދާން ބުނީ ކޯޗިންގެ މަސައްކަތް ފެށިއިރުވެސް ފްރާންސް ޓީމާއެކު މަސައްކަތް ކުރުމުގެ އުންމީދު އޮންނަ ކަމަށެވެ.

ޒިދާން ބުނީ މީގެ އަހަރުތަކެއް ކުރިން ކޯޗިންގ ކެރިއަރު ފެށިއިރުވެސް، އޭނާ އަބަދުވެސް ބުނަމުން އަންނަނީ އޭނާ އަކީ އުންމީދުތަކެއް ހުރި ކޯޗެއް ކަމަށާއި، އެހެންކަމުން އޭނާ ވެސް ކޯޗިންގ ކެރިއަރުގައި އެހެން ކޯޗުންނެކޭ އެއްގޮތައް ހުވަފެންތައް ދެކޭ ކަމަށެވެ. އެގޮތުން ފްރާންސަށް ކޯޗުކަން ކޮށްދިނުމަކީ އޭނާ ދެކެމުން އަންނަ އެންމެ ބޮޑު ހުވަފެން ކަމަށްވެސް ޒިދާން ބުންޏެވެ.

ޒިދާން ވަނީ މީގެ ކުރިން ރެއާލްގެ ކޯޗުކަމުގެ މަގާމުގައި އެހާ ގިނަ ދުވަހު ދެން ނުފެންނާނެ ކަމަށް ބުނެފައެވެ. ޒިދާން ބުނީ ކުލަބު ލެވަލްގެ އެންމެ ބޮޑު ދެ މުބާރާތް ކަމަށްވާ ފީފާ ކުލަބު ވޯލްޑް ކަޕާއި ޔުއެފާ ޗެމްޕިއަންސް ލީގުގެ ތައްޓާއެކު އޭނާ އައު ޓާގެޓެއް ކަނޑައެޅި ކަމަށާއި، އެގޮތުން ފްރާންސާއެކު ކުޅުންތެރިއެއްގެ ގޮތުގައި ހޯދި ކާމިޔާބީތައް ކޯޗެއްގެ ގޮތުގައި ހުރެ ހޯދަން ބޭނުންވާ ކަމަށެވެ.

ޒިދާން އެންމެ ފުރަތަމަ ރެއާލަށް ކޯޗުކޮށްދިނީ 2016-2018 ގެ ނިޔަލަށެވެ. އެ މުއްދަތުގެ ތެރޭގައި ޖެހިޖެހިހެން ތިން ފަހަރަށް ރެއާލަށް ޗެމްޕިއަންސް ލީގު ހޯދައިދިން ނަމަވެސް، މާ ގިނަ ދުވަސްތަކެއް ނުވަނީސް ކުއްލި ގޮތަކަށް ރެއާލްގެ ކޯޗުކަން އޭނާ ދޫކޮށްލިއެވެ. ޒިދާން ދެވަނަ ފަހަރަށް ރެއާލާ ހަވާލުވީ މިދިޔަ އަހަރު މާޗު މަހުގައެވެ. އަދި ވަނީ މި ސީޒަނުގެ ސްޕެނިޝް ލީގު ރެއާލަށް ކާމިޔާބުކޮށްދީފައެވެ.

ރެއާލާއެކު ޒިދާން މިހާރު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ. ޒިދާންގެ އިރުޝާދުގެ ދަށުން ރެއާލުން ވަނީ މިހާތަނަށް ޖުމްލަ 11 ތަށި ކާމިޔާބުކޮށްފައެވެ.