އިސްކޯގެ މުސްތަޤުބަލު އޮތީ ރެއާލް މެޑްރިޑާ އެކު: ޒިދާން

އިސްކޯ ކުޅުން އެންމެ ހައްގު ޓީމަކީ ރެއާލް މެޑްރިޑް ކަމަށާ އޭނާގެ މުސްތަގުބަލުވެސް އޮތީ ރެއާލް މެޑްރިޑާ އެކުގައި ކަމަށް އެޓީމުގެ ކޯޗް ޒައިނަދިން ޒިދާން ބުނެފިއެވެ.

ސްޕެނިޝް ލީގުގައި ސްޕޯޓިން ގިޖޯން އަތުން މޮޅުވި މެޗަށް ފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޒިދާން ބުނީ، އިސްކޯގެ ކުޅުމާމެދު ވަރަށް ބޮޑަށް ހިތްހަމަ ޖެހިއްޖެ ކަމަށާ އިސްކޯ އޭނާގެ ފެންވަރު ދައްކާލައިފި ކަމަށެވެ. އަދި އިސްކޯ ކުޅުން އެންމެ ހައްގު ޓީމަކީ ރެއާލް ކަމާއި އޭނާގެ މުސްތަގުބަލު އޮތީ ރެއާލް ގައިކަން އޭނާ ސާބިތު ކޮއްދީފި ކަމަށެވެ.

ސްޕޯޓިން ގިޖޯން އާއި ދެކޮޅަށް ކުޅުނު މެޗުން ރެއާލް މޮޅުވީ މެޗުގެ ފަހު މިނެޓުގައި އިސްކޯ ކާމިޔާބުކޮށްދިން ލަނޑުންނެވެ. އެ މެޗުގައި އިސްކޯ ވަނީ ދެ ލަނޑު ކާމިޔާބުކޮށްދީފައެވެ. އެގޮތުން މެޗުގައި އެންމެ ފުރަތަމަ ރެއާލުން ކާމިޔާބުކުރި ލަނޑުވެސް އެޓީމަށް ކާމިޔާބުކޮއްދިނީ އިސްކޯއެވެ.

އެ މެޗަކީ މިފަހަރުގެ ލީގުގައި، ފަހު 10 މިނެޓުގެ ތެރޭގައި ރެއާލުން ލަނޑު ޖަހައިގެން އެޓީމު މޮޅުވި 6 ވަނަ މެޗެވެ. މިކަމާ ގުޅިގެން ޒިދާން ބުނީ އެއީ އެއްގޮތަކަށްވެސް އެޓީމުގެ ނަސީބު ގަދަކަމުން ވާ ގޮތެށް ނޫން ކަމަށާ، އޭނާ ގަބޫލުކުރާ ގޮތުގައި ފުޓުބޯޅައިގައި ނަސީބަކީ އޮންނަ އެއްޗެށް ނޫން ކަމަށެވެ. އެގޮތުން ކޮންމެ މެޗެއްގައިވެސް ރެއާލުން މަސައްކަތް ކުރަނީ އެންމެ ފަހު ވަގުތާ ޖެހެންދެން ލިބޭ ކޮންމެ ފުރުސަތެއްވެސް ނަގާނުލައި ބޭނުން ހިފޭތޯ ކަމަށް ޒިދާން ބުންޏެވެ.

ލީގުގައި ދެން ރެއާލް މެޑްރިޑް ނިކުންނަން ޖެހޭނީ އެންމެ ވާދަވެރި ބާސެލޯނާ އާއި ދެކޮޅަށެވެ. ނަމަވެސް އެ މެޗުގެ ކުރިން ޗެމްޕިއަންސް ލީގުގެ ކުއާޓާ ފައިނަލުގެ ދެވަނަ ލެގުގައި ބަޔާން މިއުނިކާ ދެކޮޅަށް ރެއާލްއިން ކުޅެން ޖެހޭނެއެވެ.