އާޖެންޓީނާ ޓީމުގެ ކޯޗުކަން ވަނީ ހުށަހަޅާފައި، މިފަހަރު ރިޖެކްޓުނުކުރާނަން: ސަމްޕޯލީ

އާޖެންޓީނާ ގައުމީ ޓީމުގެ ކޯޗުކަން ހުށަހަޅާފައިވާކަމަށާއި، އެހެންނަމަވެސް މިފަހަރު އެ ހުށަހެޅުން ރިޖެކްޓްނުކުރާނެކަމަށް ސެވިއްޔާގެ ކޯޗު ޖޯޖް ސަމްޕޯލީ ބުނެފިއެވެ.

ނޫސްވެރިންނަށް މައުލޫމާތު ދެމުން ސަމްޕޯލީ ބުނީ އަމިއްލަ ގައުމަށް އިރުޝާދު ދިނުމަކީ އަބަދުވެސް އޭނާ ދެކެމުން އައި ހުވަފެނެއް ކަމަށާއި، އެގޮތުން އެ ހުށަހެޅުން މިފަހަރު ލިބިފައިވާ ކަމަށެވެ.

ސަމްޕޯލީ ބުނީ ސެވިއްޔާއަށް އޭނާ ބަދަލުވިއިރުވެސް ހުށަހެޅުމެއް ލިބިފައިވާ ކަމަށާއި، އެފަހަރު އެ ފުރުސަތު ނަގާލީ ސެވިއްޔާއަށް ބަދަލުވާން އެއްބަސްވެފައިހުރުމުން ކަމަށެވެ.

އެހެންނަމަވެސް ސަމްޕޯލީ ބުނީ އޭނާގެ ކޮންޓްރެކްޓްގައިވާ ގޮތުން، ބޭނުންވާ ހިނދެއްގައި ވަކި ގޮތްތަކަކާއެކު ކްލަބް ދޫކޮށްލުމުގެ އިހުތިޔާރު ލިބިފައިވާ ކަމަށާއި، އެގޮތުން އޭނާ ކޯޗުކަމާ ހަވާލުވިޔަސް ވާނީ ބޮޑެތި ލީގުތަކުގައި ކޯޗުކޮށްދިނުމުގެ ބަދަލުގައި ކެރިއަރުގައި އަދިވެސް ގައުމީ ޓީމުގެ ކޯޗުކަން ކުރަން ބޭނުންވެގެން ކަމަށެވެ. އެގޮތުން އެ ފުރުސަތު ދޫކޮށްލަން ބޭނުންނުވާ ކަމަށްވެސް އޭނާ ވަނީ ބުނެފައެވެ.

ސަމްޕޯލީ ބުނީ ގޮތް ނިންމާނީ ސެވިއްޔާގެ ރައީސް ކަމަށާއި، އެއްބަސްވުމަށް ފުރިހަމައަށް އިހުތިރާމުކުރާ ކަމަށެވެ. އެގޮތުން ގޮތްތަކެއް ކުރިއަށް އޮތް ދުވަސްތަކުގައި ނިމިގެންދާނެކަމަށް އުންމީދުކުރާ ކަމަށްވެސް އޭނާ ވަނީ ބުނެފައެވެ.

މީގެކުރިން ޗިލީގެ ގައުމީ ޓީމަށް ކޯޗުކަންކޮށްދީފައިވާ ސަމްޕޯލީގެ އިރުޝާދުގެ ދަށުން އެޓީމު 43 މެޗު ކުޅެފައިވާއިރު، 27 މެޗުން އެޓީމު ވަނީ މޮޅުވެފައެވެ. ބާކީ ހަތް މެޗުން އެޓީމު ބަލިވިއިރު، އަނެއް ނުވަ މެޗު ނިމުނީ އެއްވަރުވެގެންނެވެ.

ސެވިއްޔާއާ 2016 ވަނަ އަހަރު ހަވާލުވި ސަމްޕޯލީގެ އިރުޝަދުގެ ދަށުން އެޓީމު 51 މެޗު ކުޅެފައިވާއިރު، އެޓީމު މޮޅުވީ 25 މެޗުންނެވެ. ބާކީ 14 މެޗުން އެޓީމު ބަލިވިއިރު، 12 މެޗު ނިމުނީ އެއްވަރުވެގެންނެވެ.