ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގެ މެޗުގައި ލިބުނު އަނިޔާއާ ގުޅިގެން ބޭލް މުޅިން އެއްކޮށް ފިޓުނުވާ ކަމަށާއި، އެހެން ކަމުން އެއްވެސް ރިސްކެއް ނަގަން ބޭނުންނުވާ ކަމަށް ރެއާލް މެޑްރިޑްގެ ކޯޗު ޒައިނުއްދީން ޒިދާން ބުނެފިއެވެ.

މި މެޗުގެ ކުރިން ނޫސްވެރިންނާއި ވާހަކަ ދައްކަމުން ރެއާލްގެ ކޯޗު ޒައިނުއްދީން ޒިދާން ބުނީ، މި މެޗަށް ބޭލް މުޅިން އެއްކޮށް ފިޓުނުވާ ކަމަށެވެ.  

ޒިދާން ބުނީ ކުރިއަށް އޮތް މަދު ދުވަސްކޮޅެއްގެ ތެރޭގައި އަލުން އެނބުރި ބޭލް ކުޅުމުގެ ތެރެއަށް އަންނާނެ ކަމަށާއި އަދި އޭނާ އަންނަނީ މިހާރުވެސް ރިކަވާ ވުމަށް ބުރަކޮށް މަސައްކަތް ކުރަމުން ކަމަށެވެ.

ބޭލްގެ ފަޔަށް އަނިޔާވެފައިވާ އިރު އެޓީމު އެންމެ ފަހުން ސްޕެނިޝް ލީގުގައި ކުޅުނު މެޗުގައިވެސް ކުޅެފައެއް ނުވެ އެވެ. އަދި އެމެޗުގައި އިސްކޯ ވަނީ މޮޅު ކުޅުމެއް ދައްކައި މިރޭ ކުޅޭ މެޗުގެ ފުރަތަމަ އެގާރައިން ޖާގަ ހޯދާފައެވެ.

ޗެމްޕިއަންސް ލީގުގައި މިރޭ ކުޅޭ މެޗަށްފަހު ލީގުގައި ރެއާލުން ދެން އެންމެ އަވަހަށް ބައްދަލުކުރާނީ، އެޓީމާއި އެންމެ ގާތުން ލީގަށް ވާދަކުރަމުންދާ ވާދަވެރި ބާސެލޯނާއާ ދެކޮޅަށް ކުޅޭ އެލް ކްލެސިކޯ މެޗުގައެވެ.

ޓޮޓެންހަމް ހޮޓްސްޕާސް ދޫކޮށްލުމަށް ފަހު 2013 ވަނަ އަހަރު ރެއާލް މެޑްރިޑާ ގުޅުނު ބޭލް އަންނަނީ ރެއާލްގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެޓީމަށް މިވީތަނަށް ކުޅުނު 148 މެޗުގައި 67 ލަނޑު ކާމިޔާބުކޮށްފައެވެ.

މީގެ އިތުރުން އޭނާ ވަނީ ފާއިތުވެދިޔަ ހަތަރު ސީޒަނުގައި އެޓީމާއެކު ޔުއެފާ ޗެމްޕިއަންސް ލީގު ދެފަހަރު، ކޮޕާޑެލްރޭ، ފީފާ ކްލަބް ވޯލްޑްކަޕް އަދި ޔުއެފާ ސުޕާ ކަޕް ކާމިޔާބުކޮށްފައެވެ.

ވޭލްސްގެ މޮޅު ކުޅުންތެރިޔާގެ މަގާމު 2010 ވަނަ އަހަރުއްސުރެ މެދުނުކެނޑި ހަ ފަހަރު ކާމިޔާބުކޮށްފައިވާ ބޭލްއަށް ވަނީ މި ސީޒަނުގައި އަނިޔާގެ ގިނަ މައްސަލަތައް ކުރިމަތިވެފައެވެ. އެގޮތުން ސީޒަނުގެ ބައެއް މެޗުތައް ވެސް އޭނާ އަށް ވަނީ އަނިޔާގެ ސަބަބުން ގެއްލިފައެވެ.

ބަޔާން އާއި ދެކޮޅަށް މިރޭ ރެއާލް އަމިއްލަ ދަނޑުގައި ނުކުންނައިރު، މި ދެޓީމު ބަޔާންގެ ދަނޑުގައި ބައްދަލުކުރި ފުރަތަމަ ލެގުގެ މެޗު 1-2 ގެ ނަތީޖާއަކުން ކާމިޔާބުކުރީ ރެއާލުންނެވެ.