މީރާގެ ބޯޑަށް އަޔަންކުރަން 5 ބޭފުޅަކަށް ރުހުން ދިނުމަށް ކޮމެޓީން ނިންމައިފި

މޯލްޑިވްސް އިންލެންޑް ރެވެނިޔު އޮތޯރިޓީ (މީރާ)ގެ ބޯޑު މެންބަރު ކަމަށް ކުރިމަތިލި ފަރާތްތަކުގެ ތެރެއިން، ފަސް ފަރާތެއްގެ ނަން ރައްޔިތުންގެ މަޖިލީހުގެ ތަޅުމަށް ފޮނުވަން، މަޖިލީހުގެ އިގްތިޞާދީ ކޮމެޓީން ނިންމައިފި އެވެ.

ރައީސުލްޖުމްހޫރިއްޔާގެ އޮފީހުން މީރާގެ ބޯޑަށް ކުރިމަތިލުމުގެ ފުރުސަތު ހުޅުވާލީ މީރާގެ މެންބަރަކު އިސްތިއުފާ ދެއްވުމުގެ އިތުރުން، އެ ބޯޑުގެ ތިން މެންބަރެއްގެ ދައުރު ހަމަވާތީ އެވެ. އެގޮތުން، ކުރިމަތި ލެއްވި ބޭފުޅުންގެ ތެރެއިން 8 ބޭފުޅެއްގެ ނަން ރައީސުލްޖުމްޖުމްހޫރިއްޔާ ވަނީ މަޖިލީހަށް ފޮނުއްވާފަ އެވެ.

މަޖިލީހުގެ އިގްތިޞާދީ ކޮމެޓީން އެނަންތައް ދިރާސާ ކުރުމަށްފަހު، 5 ނަމެއް މަޖިލީހުގެ ތަޅުމަށް ފޮނުވުމަށް ވަނީ ނިންމާފަ އެވެ.

އިގްތިޞާދީ ކޮމެޓީން ރުހުން ދޭން ފެންނަކަމަށް ފާސްކުރި 5 ނަން:

1. މުމްތާޒް އަބްދުއްރަޝީދު، މުރިނގު / ހދ. ހަނިމާދޫ

2. ލީނާ މުހައްމަދު ޒާހިރު ހުސައިން، ހ. ނީލްވިލާ

3. ހުޝާމް ވަހީދު، ގ. މާލެހިޔާ 2 03-15

4. އަލީ އިރުފާނު، ޑޭލައިޓްވިލާ / ސ. މަރަދޫފޭދޫ

5. އާއިޝަތު އަޝާ އަލީ، ހ. އީސްޓްވާރޑް

މީރާގެ ބޯޑުގައި ހަތް މެމްބަރުން ހިމެނޭ އިރު އޭގެ ތެރޭގައި ހިމެނެނީ ފިނޭންސް މިނިސްޓަރު ކަނޑައަޅާ ފަރާތަކާއި ރައީސުލްޖުމްހޫރިއްޔާ އައްޔަނުކުރައްވާ ފަސް މެމްބަރުންގެ އިތުރުން ކޮމިޝަނާ ޖެނެރަލް އޮފް ޓެކްސޭޝަނެވެ.

މީރާގެ ބޯޑުގެ ޗެއަރޕާސަން ކަނޑައެޅުމުގެ ބާރު އޮންނަނީ ފިނޭންސް މިނިސްޓްރީއަށެވެ. މީރާގެ ބޯޑުގެ ޗެއާރޕާސަންއަކީ ފިނޭންސް މިނިސްޓްރީގެ ޗީފް ފައިނޭންސް ބަޖެޓް އެގްޒެކްޓިވް، އަހުމަދު ސަރުވަޝް އާދަމް އެވެ.