އެކުވެރި އަރަބި އިމާރާތް (ޔޫއޭއީ)އަށް ރާއްޖެއިން ކަނޑައަޅާފައިވާ ސަފީރު ހ. ނިޔާސާ، ޑރ. ހުސައިން ނިޔާޒު އަށް ރުހުން ދިނުމަށް ރައްޔިތުންގެ މަޖިލީހުގެ ގައުމީ ސަލާމަތާބެހޭ ކޮމެޓީން ފާސްކޮށްފި އެވެ.
މަޖިލީހުގެ ގައުމީ ސަލާމަތާބެހޭ ކޮމެޓީން ޑރ. ނިޔާޒަށް ރުހުން ދިނުމަށް ފާސްކޮށްފައިވަނީ ގާނޫނުއަސާސީގެ 115 ވަނަ މާއްދާގެ (ދ)ގައި ބަޔާންކޮށްފައިވާ ގޮތުގެމަތިން، ބޭރު ގައުމުތަކަށް ރާއްޖެއިން ސަފީރުން ކަނޑައެޅުމަށްޓަކައި، އެކުވެރި އަރަބި އިމާރާތަށް ރާއްޖެއިން ކަނޑައަޅާ ސަފީރުކަމަށް ނިޔާޒު އައްޔަން ކުރެއްވުމާމެދު، ރައްޔިތުންގެ މަޖިލީހުގެ މަޝްވަރާއަކަށް އެދިވެޑައިގެން ރައީސުލްޖުމްހޫރިއްޔާ ހުށަހަޅުއްވާފައިވާތީ އެވެ.
ކޮމެޓީން މިމަހުގެ އަށްވަނަ ދުވަހު ބޭއްވި ބައްދަލުވުމުން ނިންމާ މިހާރު މަޖިލީހުގެ ތަޅުމަށް ފޮނުވާފައިވާ ރިޕޯޓްގައިވާ ގޮތުން އެކޮމެޓީން ނިޔާޒަށް ރުހުން ދިނުމަށް ފާސްކޮށްފައިވަނީ އެ ކޮމެޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
ހޯމަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާގައި އެ ރިޕޯޓް މަޖިލީހަށް ހުށަހެޅުމާއި އެކުވެރި އަރަބި އިމާރާތަށް ރާއްޖެއިން ކަނޑައަޅާ ސަފީރުކަމަށް ޑރ. ނިޔާޒުއަށް ރައްޔިތުންގެ މަޖިލީހުގެ ރުހުން އޮތްތޯ ބެލުމަށް ވޯޓަށް އެހުންވެސް އެޖެންޑާ ކޮށްފައިވެއެވެ.
ޑރ ނިޔާޒު މީގެ ކުރިން ހުންނެވީ ފޮރިން މިނިސްޓްރީގެ އެޑިޝަނަލް ސެކްރެޓަރީގެ މަގާމުގަ އެވެ.
