އެމްޑީޕީގެ ކޮންޓްރޯލް އެއްވެސް ބޭފުޅަކަށް ނެގިދާނެ ކަމަކަށް ޤަބޫލެއް ނުކުރަން: ރައީސް ނަޝީދު
4 ފެބުރުއަރީ 2017 | ހޮނިހިރު 16:48އެމްޑީޕީ މީހުން ޢަމަލު ކުރާނީ ރާއްޖެއަށާއި ޕާޓީއަށް އެންމެ ފައިދާހުރި ރަނގަޅު ގޮތައް
ރައީސް ނަޝީދު ސްރީލަންކާގައި ދިރިއުޅޭ ދިވެހިންނާ ބައްދަލު ކުރައްވަނީ
އިދިކޮޅު އެންމެބޮޑު ޕާޓީ އެމްޑީޕީގެ ކޮންޓްރޯލް އެއްވެސް ބޭފުޅަކަށް އެއްވެސް އިރެއްގައި ނެގިދާނެ ކަމަކަށް ޤަބޫލެއް ނުކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރީގެ ރައީސް މުހައްމަދު ނަޝީދު މިހެންވިދާޅުވީ ލަންކާއަށް ވަޑައިގެން ހިލްޓަން ހޮޓަލުގައި ރާއްޖެޓީވީގެ ފަލަސުރުޚީ ޕްރޮގްރާމަށް ދެއްވި ޚާއްޞަ އިންޓަވިއުއެއްގައެވެ.
ރައީސް ނަޝީދު ވިދާޅުވީ އެމްޑީޕީގައި ތިބީ ރާއްޖޭގައި ތިބި ޑިމޮކްރަސީ ޤަބޫލުކުރާ ގިނަ ރައްޔިތުން ކަމަށާއި އެބޭފުޅުންގެ ކޮންޓްރޯލެއް ވަކި މީހަކަށް ނުނެންގެވޭނެ ކަމަށެވެ.
"ޙަޤީގަތުގައި އެމްޑީޕީގެ ގިނަ މެންބަރުންނަކީ ރާއްޖޭގައި ތިބި މިނިވަން ޚިޔާލުގެ ބޭފުޅުން. އަދި ރާއްޖޭގައިތިބި ޑިމޮކްރަސީ ޤަބޫލުކުރާ ގިނަ ބައިވަރު ރައްޔިތުން. އެރައްޔިތުންގެ އެމެންބަރުންގެ ކޮންޓްރޯލް އަޅުގަނޑު ދެކޭގޮތުގައި އެއްވެސް ބޭފުޅަކަށް ނުނެންގެވޭނެ. އަޅުގަނޑަކަށްވެސް އަދި އެހެން އެއްވެސް ބޭފުޅަކަށް. އެބޭފުޅުން އަމަލު ކުރައްވަމުން ގެންދަވާނީ އެބޭފުޅުން ދެކެވަޑައިގަންނަވާ ގޮތުގައި ރާއްޖެއަށާއި ޕާޓީއަށް އެންމެ ފައިދާހުރި ރަނގަޅު ގޮތައް" 13 އަހަރުގެ ޖަލުހުކުމެއް ތަންފީޒް ކުރައްވަމުން ގެންދަވާ ރައީސް ނަޝީދު ވިދާޅުވިއެވެ.
ރައީސް ނަޝީދު ބައިވެރިވެ ވަޑައިގަންނަވާ މި ޚާއްޞަ ފަލަ ސުރުޚީ ޕްރޮގްރާމް މިރޭ ރާއްޖެ ޓީވީއިން ގެނެސްދިނުމަށް ވަނީ ހަމަޖެހިފައެވެ.
