ލ. ފޮނަދޫގައި ހުރި މީރާގެ އޮފީސް ފަޅާލާ ވައްކަން ކޮށްފި

ލ. ފޮނަދޫ ހުންނަ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ބްރާންޗްގެ އޮފީސް ފަޅާލާ ވައްކަން ކޮށްފި އެވެ.

ބުރާސްފަތި ދުވަހު "ރާއްޖެއެމްވީ"އަށް މައުލޫމާތު ދެމުން ފުލުހުންގެ މީޑިއާ އޮފިޝަލް ވިދާޅުވީ ފޮނަދޫގައި ހުންނަ މީރާގެ އޮފީސް ފަޅާލާފައިވާ ކަމުގެ ރިޕޯޓް ބުރާސްފަތި ދުވަހުގެ ހެނދުނު 07:58 ހާއިރު ލިބިފައިވާ ކަމަށެވެ. އަދި ފުލުހުން ގޮސް ބެލިއިރު އެ އޮފީހުގެ ބިއްލޫރިތައް ތަޅާލުމަށްފަހު އެ އޮފީހުގައި ހުރި ކުޑަ ތިޖޫރީއަކުން 11،000 އަށްވުރެ ގިނަ ރުފިޔާއާއި 100 އެއްހާ ޑޮލަރު ވަގަށް ގެންގޮސްފައިވާ ކަމަށް މިހާތަނަށް ކުރި ތަހުގީގުން އެނގިފައިވާ ކަމަށް ފުލުހުން ބުނެއެވެ.

އެނގިފައިވާގޮތުގައި މީރާގެ ފޮނަދޫ ބްރާންޗަށް ވަގަށް ވަދެފައިވަނީ އެ އޮފީހުގެ ކުޑަ ދޮރުތަކުގައި ޖަލާފައިވާ ބިއްލޫރިތައް ތަޅާލުމަށްފަހުގަ އެވެ.

ފުލުހުން ބުނީ އެމައްސަލާގައި މިހާތަނަށް އެއްވެސް މީހަކު ހައްޔަރު ނުކުރާ ކަމަށާއި އެ މައްސަލަ ތަހުގީގު ކުރަމުންދާ ކަމަށެވެ.