ދިވެހި ބަހުގެ އެކަޑަމީގެ ފަރާތުން ދޭ "އެކަޑަމީ އިނާމް 2017" ފަސް ބޭފުޅަކަށް ލިބިވަޑައިގެންފިއެވެ.

މި އިނާމުތައް ދީފައިވަނީ، ދިވެހިބަހުގެ ދާއިރާއާއި، އަދަބިއްޔާތުގެ ދާއިރާއިން އިތުރުން ތާރީޚްގެ ދާއިރާއިން ފާހަގަކޮށްލެވޭފަދަ އަގުހުރި ޚިދުމަތްތަކެއް ދިގު މުއްދަތަކަށް ކޮށްފައިވާ ފަރާތްތަކަށް އެކަމުގެ އަގު ވަޒަން ކުރުމުގެ ގޮތުންނެވެ.

"އެކަޑަމީ އިނާމް 2017" ލިބިވަޑަގެންފައިވަނީ ދިވެހި ތާރީޚްގެ ދާއިރާއިން ކަށިމާ އަހުމަދު ޝާކިރަށާއި، ބަހަށް ޚިދުމަތް ކުރުމުގެ ރޮނގުން ބަސްކުރިއެރުވުމަށް ކުރައްވާ މަސައްކަތް ފާހަކޮށް އާދަމް ޒާހިރު (ކުރޮޅި) އަދި ބަހާއި އަދަބިއްޔާތުގެ ރޮނގުން ހަސަން މަނިކު، ބަހާއި އަދަބިއްޔާތުގެ ދާއިރާއިން މުހައްމަދު ސަލީމު ހޯރަފުށި، އަދި  ދިވެހި ބަހުގެ ދާއިރާއިން ބަސް ޓެކްނޮލޮޖީއާއި ރަށްޓެހި ކުރުމުގެ ރޮނގުން ޖާވިޝް ހަމީދަށެވެ. 

އިނާމު ލިބިވަޑައިގެންނެވި 5 ބޭފުޅުންވެސް  ރާއްޖެއެމްވީއަށް މައުލޫމާތު ދެއްވަމުން ވިދާޅުވީ، އެބޭފުޅުން ދިވެހިބަސް ކުރިއެރުވުމަށް ކުރަމުންދާ މަސައްކަތަކީ ގޮންޖެހުން ގިނަ މަސައްކަތެއް ނަމަވެސް އެކަން ދެކެނީ އުފަލެއްކަމުގައި ކަމަށެެވެ. އަދި އެކަމުގެ އަގު ވަޒަން ކުރުމުގެ ގޮތުން މިފަދަ އިނާމެއް ދިވެހިބަހުގެ އެކަޑަމީ އިސްނަންގަވައިގެން ދެއްވުމަކީ ލިބުނު ޝަރަފެއްކަމަށެވެ. އަދި މިދާއިރާތަކުން ކުރިއަށް ދިއުމަށް އެބޭފުޅުންވަނީ ޒުވާނުންނަށް ހިތްވަރު ދެއްވާފައެވެ.