ނަރުހުންނަށް ވެކްސިން ދިނުމުގެ އުސޫލުން ބޭރުން އެއްވެސް ކަމެއް ނުކުރޭ: އައިޖީއެމްއެޗް
އައިޖީއެމްއެޗުން ވެކްސިން ހުސްނުވާ ކަމަށް އައިޖީއެމްއެޗުން ބުނޭ
އައިޖީއެމްއެޗް ފްލޫ ވެކްސިން
ސަރުކާރުގެ އިސްބޭފުޅެއްގެ އާއިލީ ބޭފުޅަކު ނަރުހަކަށް ހުންނަވާ ވޯޑެއްގެ ނަރުހުންނަށް އެޗް1އެން1 ވެކްސިން ޖެހުމަށް ފަހު އެހެން ވޯޑްތަކުގެ ނަރުހުންނަށް ވެކްސިން ނުދިން މައްސަލައަކީ ދޮގު މައުލޫމާތުތަކެއް ކަމަށް އައިޖިއެމްއެޗުން ބުނެފި އެވެ.
އައިޖީއެމްއެޗްގެ މީޑިޔާ އޮފިޝަލް ވިދާޅުވީ، އެއްވެސް ހަމަނުޖެހުމެއް ނަރުހުންގެ ތެރޭގައި ހިނގާފައިނުވާ ކަމަށާއި އެޗް1އެން1 ވެކްސިން ދިނުމުގައި އައިޖީއެމްއެޗުން އަމަލުކޮށްފައި ވަނީ އެގޮތަށް ނޫން ކަމަށެވެ. އަދި އައިޖީއެމްއެޗުން ވެކްސިން ހުސްނުވާ ކަމަށް ވެސް މީޑިޔާ އޮފިޝަލް ވިދާޅުވި އެވެ. ޖަހަން ޖެހޭ ފަރާތްތަކަށް ވެކްސިން ޖަހަމުންދާ ކަމަށް ވެސް މީޑިއާ އޮފިޝަލް ވިދާޅުވިއެވެ.
މިކަމާ ގުޅޭ ގޮތުން ރާއްޖެއެމްވީއަށް މައުލޫމާތު ހިއްސާކުރި އައިޖީއެމްއެޗްގެ ބައެއް ނަރުހުން ބުނީ ފުލޫ ވެކްސިންއަކީ މިހާރު މިއުޅޭ ރޯގާ ޖެހިފައި ތިބޭ މީހުންނަށް ފަރުވާ ދިނުމުގައި ހާއްސަކޮށް އުޅޭ ނަރުހުންނަށް ޖެހުމަށް ގެނައި ވެކްސިނެއް ކަމަށެވެ. އެގޮތުން ވެކްސިން ދޭން އިސްކަން ދީފައިވާ ބަޔަކީ އީއާރު، އައިސީޔޫ އަދި ފްލޫ ކްލިނިކްގައި އުޅޭ ނަރުހުންނަށް ކަމަށެވެ.
ނަމަވެސް އެވެކްސިން ކަމާނުބެހޭ ވޯޑެއްގައި މަސައްކަތް ކުރާ ނަރުހުންނަށް ޖެހުމަށް ފަހު އެހެން ވޯޑް ތަކުގެ ނަރުހުންނަށް އެވެކްސިން ދީފައި ނުވާތީ އެނަރުހުން ކަންބޮޑުވެ ނުރުހުން ފާޅުކުރި ކަމަށް ވެސް ރާއްޖެއެމްވީއާ ވާހަކަދެއްކި ބައެއް ނަރުހުން ވަނީ ބުނެފަ އެވެ.
މިދުވަސްވަރު ފެތުރެމުންދާ އެޗް1އެން1 އަދި އެހެން ރޯގާ ތަކާ ގުޅިގެން، އައިޖީއެމްއެޗުން ވަނީ ތާޖުއްދީން ސްކޫލުގައި ފްލޫ ކްލިނިކެއް ގާއިމްކޮށް، ބަލިމީހުން ބެލުމުގެ މަސައްކަތް ކުރަމުންނެވެ.
