ކޮވިޑަށް ފަރުވާ ދެމުން ދަނިކޮށް ލެފްޓިނެންޓް ކާނަލް ރިޓަޔަރޑް ޢަބްދުލްޣަނީީ ނިޔާވެއްޖެ
21 އޯގަސްޓު 2020 | ހުކުރު 00:12ނިޔާވެފައިވަނީ ބުރާސްފަތި ދުވަހުގެރޭ 01:28 ހާއިރު
އެމް.އެން.ޑީ.އެފްގެ ލެފްޓިނެންޓް ކާނަލް (ރިޓަޔަރޑް) ޢަބްދުލްޣަނީީ (ސ. ނަންބަރު:105)
ކޮވިޑް-19 ޖެހިގެން ފަރުވާ ހޯއްދަވަމުން ގެންދަވަނިކޮށް މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް)ގެ ލެފްޓިނެންޓް ކާނަލް (ރިޓަޔަރޑް) ޢަބްދުލްޣަނީީ ނިޔާވެއްޖެއެވެ.
އޭނާ ނިޔާވިއިރު އުމުރަކީ 82 އަހަރެވެ.
އެމްއެންޑީއެފުން ބުނީ، އޭނާއަކީ 1960 ވަނަ އަހަރުގެ އޮގަސްޓްް މަހުގެ 27 ވަނަ ދުވަހުން ފެށިގެން, އެ ސަރވިސްގައި ތެދުވެރިކަމާއި އިޚްލާޞްތެރިކަމާއެކު 48 އަހަރާއި، 11 މަހާއި، 4 ދުވަހުގެ ދިގު މުއްދަތުގައި ޚިދުމަތް ކުރައްވާފައިވާ ބޭފުޅެއް ކަމަށެވެ. އެގޮތުން ލެފްޓިނަންޓް ކާނަލް (ރިޓަޔަރޑް،) ޢަބްދުލް ޣަނީ ދިވެހި އަސްކަރިއްޔާގައި ޚިދުމަތް ކުރެއްވި ދިގު މުއްދަތުގައި ގިނަ ދުވަހު ޚިދުމަތް ކުރެއްވީ އެމްޑީއެފް ކޯސްޓްގާޑްގައި ކަނޑުމަތީގެ ޚިދުމަތް ތަކުގައި ކަމަށް އެމްއެންޑީއެފުން މައުލޫމާތުދެއެވެ.
އޭގެ އިތުރުން، އޭނާ ސިފައިންގޭގައި އިޚްލާސްތެރިކަމާއި ވަފާތެރިކަމާއެކު އަދާކުރެއްވި ޚިދުމަތްތަކުގެ ސަބަބުން ޝަރަފުގެ ނިޝާނުގެ ގޮތުގައި 9 ކުލައާ 7 މެޑަލް ލިބިވަޑައިގެންފައިވާ ކަމަށް ވެސް އެމްއެންޑީއެފުން މައުލޫމާތުދެއެވެ.
ރާއްޖެއެމްވީއަށް މައުލޫމާތު ދެއްވަމުން އޭނާގެ އާއިލާއިން ބުނީ، ނިޔާވެފައިވަނީ ބުރާސްފަތި ދުވަހުގެރޭ 1:28 ހާއިރު ކަމަށާއި، އޭރު ފަރުވާ ހޯއްދަވަމުން ގެންދެވީ ހުޅުމާލޭ މެޑިކަލް ފެސިލިޓީގައި ކަމަށެވެ.
ލެފްޓިނެންޓް ކާނަލް ޢަބްދުލްޣަނީީ ވަނީ ހުވަދޫ ބަޣާވާތުގެ ދުވަސްވަރު ގދ. ތިނަދޫގައި 13 މަސް ދުވަހު ޑިއުޓީ ގައި ހުންނަވާފައެވެ. އަދި ރާއްޖޭގެ އިޤްތިޞާދީ ސަރަޙައްދު ބެލެހެއްޓުމުގެ ގޮތުން ސިފައިން ކުރި ޕެޓްރޯލް ދަތުރުތަކުގައި ބައިވެރިވެ ވަޑައިގަތުމާއި، މާލެއަށް ބޮޑުރާޅު އެރުމުގެ ހާދިސާ ގައި ސިފައިން ކުރަމުންގެންދިޔަ މަސައްކަތުގައި ޢަމަލީ ގޮތުން ބައިވެރިވެވަޑައިގަތުން ވެސް ފާހަގަ ކޮށްލެވެއެވެ.
