ކޮރަޕްޝަން ހުއްޓުވުމަށް މިހާރަށްވުރެ ޚަރުދަނާ ފިޔަވަޅު އެޅުމަށް ގޮވާލާ ކުއްލި މައްސަލައެއް
19 އޯގަސްޓު 2020 | ބުދަ 08:44މިމައްސަލަ މަޖިލީހަށް ހުށަހެޅުއްވީ މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް
މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް
ކޮވިޑް-19 ގެ ތެރޭގައި ކޮރަޕްޝަން ހިންގި ފަރާތްތަކަށް ދެވަނަ ފަހަރަށް އެފަދަ އަމަލެއް ނުހިންގޭނެ ގޮތެއް ހަދައި، ފިޔަވަޅު އެޅުން އަވަސްކޮށް، ކޮރަޕްޝަން ހުއްޓުވުމަށްޓަކައި މިހާރަށްވުރެ ހަރުދަނާ ފިޔަވަޅުތައް އެޅުއްވުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅާ ބަހުސްކޮށްފި އެވެ.
މިމައްސަލަ މަޖިލީހަށް ހުށަހެޅުއްވީ މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފެވެ. މައްސަލަ ހުށަހަޅުއްވަމުން އާދަމް ޝަރީފް ވިދާޅުވީ ކޮވިޑް-19 އާއި ގުޅިގެން ރާއްޖޭގައި ޞިއްޙީ ކުއްލި ނުރައްކަލުގެ ޙާލަތު އިޢުލާން ކުރުމާއެކު ރާއްޖޭގެ އިޤްތިޞާދު ވަރަށްބޮޑަށް ދަށަށްގޮސް، ބަލިމަޑުކަމާއި ތަދު މަޑުކަމުގެތެރޭގައި ރައްޔިތުން ޙާލުގައި ޖެހިފައިވަނިކޮށް، ދައުލަތުގެ ޞިއްޙަތާބެހޭ ވުޒާރާ އާއި ފަތުރުވެރިކަމާބެހޭ ވުޒާރާގެ ތެރޭގައި ކޮރަޕްޝަންގެ އަމަލުތަކެއް ހިންގައި، އޮޑިޓަރ ޖެނެރަލްގެ އޮފީހުން ހެދި، އޮޑިޓް ރިޕޯޓްތަކުން އެކަން ހާމަވެފައިވާ ކަމަށެވެ. އަދި ކޮވިޑް-19ގެ ނަމުގައި ސަރުކާރުގެ ވުޒާރާތަކުން ހިންގާފައިވާ އެތައް މިލިއަން ރުފިޔާގެ ޚިޔާނާތާއި، ދައުލަތުގެ މާލިއްޔަތުގެ ޤާނޫނާއި ޤަވާއިދާ ޚިލާފަށް ހިންގާފައިވާ މުޢާމަލާތްތަކާއި، ރައްޔިތުންގެ ފައިސާއަށް ވެފައިވާ ޚިޔާނާތްތަކާއި ދައުލަތުގެ ރިޒާވްގައި ހުރި ލާރިކޮޅު ހުސްވަމުން ދިޔައިރުވެސް، ބޮޑެތި އަދަދުތަކުން މާލީ ވުޒާރާއިން ފައިސާ ދޫކުރަމުން ދިޔައިރު، އެމުޢާމަލާތްތައް ކުރަމުންދަނީ ދައުލަތުގެ މާލިއްޔަތުގެ ޤާނޫނާއި ޤަވާއިދާ އެއްގޮތަށްކަން ސަރުކާރުގެ ވުޒާރާތަކުން ބައްލަވާފައި ނުވާކަމަށް އާދަމް ޝަރީފް ވިދާޅުވި އެވެ. މީގެއިތުރުން ކޮރަޕްޝަން ހުއްޓުވަން މަސައްކަތްކޮށްފައި ނުވާކަމަށާއި ރައްޔިތުންގެ ފައިސާއިން ކޮރަޕްޝަން ހިންގުމަށް މަގު ފަހިކޮށްދީފައިވާކަމަށްވެސް އާދަމް ޝަރީފް ވިދާޅުވިއެވެ.
މިކުއްލި މައްސަލަ ހުށަހެޅުމާއެކު މައްސަލައަށް ބަހުސްކުރަން ފެނޭތޯ ނެގުނު ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން 21 މެމްބަރުން ވަނީ މިމައްސަލައަށް ބަހުސްކުރަން ފެންނަކަމަށް ވޯޓު ދެއްވާފައެވެ. އެއް މެމްބަރަކު ވަނީ ބަހުސްކުރަން ނުފެންނަކަމަށް ވޯޓު ދެއްވާފައެވެ.
އެއާއެކު ބަހުސްކުރުމަށް ހުޅުވާލި ފުރުސަތުގައި މައްސަލަ އިތުރަށް ހުށަހަޅުއްވަމުން އާދަމް ޝަރީފް ވިދާޅުވީ މިމައްސަލައަށް ބަހުސްކުރުމަށް ފެނޭތޯ ނެގުނު ވޯޓު ފާސްވެގެންދިޔުމުން އޭގެން އެނގިގެންދިޔަ ކަމަކީ ރައްޔިތުންގެ މަޖިލީހުގެ މެމްބަރުންނަކީ ކޮރަޕްޝަނާ ދެކޮޅަށް މަސައްކަތްކުރުމުގައި ސާބިތުކަމާއެކު ތިއްބެވި މެމްބަރުން ކަންކަމަށެވެ.
އާދަމް ޝަރީފް ވިދާޅުވީ ކޮރަޕްޝަނާ ދެކޮޅަށް މިމައްސަލަތައް ހައްލުކުރުމަށް ވިސްނައިގެން ކަންތައްތަކެއް ކޮށްގެން ނޫނީ މިކަމަށް ހައްލެއް ނާންނާނެކަމަށެވެ.
މިމައްސަލައަށް ވާހަކަދެއްކެވި އިދިކޮޅު މެމްބަރުން ވަނީ އޮޑިޓް ރިޕޯޓްތަކުން ހާމަވާ ކޮރަޕްޝަންގެ މައްސަލަތަކުގައި ޝާމިލުވާ ދައުލަތުގެ ވަޒީރުން އިސްތިއުފާ ދެއްވުމަށް ގޮވާލާފައެވެ. އަދި ކޮރަޕްޝަން ހުއްޓުވުމަށް އެމްޑީޕީ ސަރުކާރުން އައިއިރު މިކަމުގައި ޝާމިލްވާ ހުރިހާ އެންމެންނަށް ފިޔަވަޅު އަޅަންޖެހޭކަމަށް އެމެމްބަރުން ވިދާޅުވިއެވެ.
މިމައްސަލައަށް ވާހަކަދައްކަވަމުން އެމްޑީޕީގެ މެމްބަރުން ވިދާޅުވެފައިވަނީ އޮޑިޓް ރިޕޯޓުން ހާމަވާ ކޮރަޕްޝަންގެ މައްސަލަތަކުގައި ޝާމިލްވާ ހުރިހާ ފަރާތްތަކާމެދުވެސް ސަރުކާރުން އަދި ވަކިން ޚާއްސަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ފިޔަވަޅު އަޅުއްވާނެކަމުގެ ފުރިހަމަ ޔަގީންކަން އެބައޮތްކަމަށެވެ. އަދި ކޮރަޕްޝަން ހުއްޓުވުމަށް މިސަރުކާރުން މަސައްކަތްތައް ކުރާނެކަމަށާއި އެކިއެކި މުއައްސަސާތަކުން މިކަމުގައި ކުރަމުންދާ މަސައްކަތްތަކަށް މަޖިލީހުން ފާރަވެރިވާނެ ކަމަށްވެސް އެމްޑީޕީ މެމްބަރުން ވިދާޅުވި އެވެ.
ކޮވިޑް-19 އާއި ގުޅިގެން ދައުލަތުގެ އިދާރާތަކުން ކުރެވުނު ޚަރަދުތަކުގެ އޮޑިޓްތައްދައް ހެދުމަށް މަޖިލީހުން ފާސްކުރުމާއި ގުޅިގެން އޮޑިޓް އޮފީހުން އަންނަނީ ދައުލަތުގެ އިދާރާތަކުގެ އޮޑިޓްތައް ކުރަމުންނެވެ. އެގޮތުން މިހާތަނަށް 3 މިނިސްޓްރީއެއްގެ އޮޑިޓްކޮށް އޮޑިޓް ރިޕޯޓް ނެރެފައިވާއިރު ޓޫރިޒަމް މިނިސްޓްރީ އާއި ހެލްތު މިނިސްޓްރީގެ އޮޑިޓް ރިޕޯޓްތަކުން ވަނީ ކޮރަޕްޝަންގެ ބޮޑެތި ކަންތައްތަކެއް ހާމަވެގެންގޮސްފަ އެވެ. އެހެންނަމަވެސް ޑިފެންސް މިނިސްޓްރީގެ އޮޑިޓް ރިޕޯޓުގައި އެއޮފީހުން ކަންކަން ކޮށްފައިވަނީ ރަނގަޅަށް ކަމަށް އޮޑިޓް އޮފީހުން ވަނީ ބުނެފައެވެ.
