ކޮވިޑް-19 އާގުޅިގެން ހިންގާފައިވާ ކޮރަޕްޝަން އަމަލުތައް ބަލައި، ފިޔަވަޅު އެޅުމަށް ގޮވާލަން: އަދާލަތު ޕާޓީ
އޮޑިޓް އޮފީހުން ވަނީ ކޮވިޑް-19އާ ގުޅޭ ހެލްތް މިނިސްޓްރީގެ އޮޑިޓް ރިޕޯޓެއް ނެރެފައި
އަދާލަތު ޕާޓީގެ އިސްވެރިން: ސަރުކާރުގެ ތެރެއިން ކޮރަޕްޝަން ހިންގާ ފަރަކާތްތަކާއި މެދު ފިޔަވަޅު އެޅުމަށް ވަނީ ގޮވާލާފައި
ކޮވިޑް-19 އާ ގުޅިގެން ވެންޓިލޭޓާރުތަކެއް ހޯދުމަށް ހެލްތް މިނިސްޓްރީން ހިންގާފައިވާ ކޮރަޕްޝަނުގެ އަމަލުތަކާއި އަދި ޓޫރިޒަމް މިނިސްޓްރީން ހިންގާފައިވާ ކޮރަޕްޝަނުގެ އަމަލުތައް ބަލައި ފިޔަވަޅު އެޅުމަށް އަދާލަތު ޕާޓީން ގޮވާލައިފި އެވެ.
ސަރުކާރު ކޯލިޝަންގައި ހިމެނޭ އަދާލަތު ޕާޓީން ކުރި ޓްވީޓެއްގައި ބުނެފައިވަނީ، ކޮވިޑް-19 އާއި ގުޅިގެން އެކިއެކި އިދާރާތަކުން ކޮށްފައިވާ ޚަރަދުތަކާ ގުޅޭ އޮޑިޓް ރިޕޯޓުތަކުން ފެންމަތިވެފައިވާ ބޮޑެތި މައްސަލަތަކަކީ އެ ޕާޓީގެ ނުހަނު ކަންބޮޑުވުން ހުރިކަންކަން ކަމަށެވެ.
ރައީސުލްޖުމްހޫރިއްޔާ އަންގަވާފައިވާ ފަދައިން، ތަހުޤީޤީ އިދާރަތަކުން މިކަންކަން އަވަހަށް ބައްލަވާ، އެއްވެސް ތަފާތުކުރުމެއްނެތި މިކަމުގައި ޒިންމާވާ އެންމެހައި ފަރާތްތަކަށް އަވަސް ފިޔަވަޅުތަކެއް އެޅުމަށް ޢަދާލަތު ޕާޓީގެ ފަރާތުން ގޮވާލާ ކަމަށްވެސް ޓްވީޓްގައި ބުނެފައި ވެއެވެ.
އަދާލަތު ޕާޓީއަކީ، ސަރުކާރުން ކޯލިޝަނުގައި، ދައުލަތުގެ އެންމެ އިސް ތަހުގީގު އިދާރާ ކަމަށްވާ މޯލްޑިވްސް ޕޮލިސް ސަރވިސް، ހިންގުމުގެ މެންޑޭޓް އޮންނަ ވަޒީރުންގެ މަޖިލީހުގެ ހޯމް މިނިސްޓަރު ޝެއިހު އިމްރާން އަބްދުﷲ އެޕާޓީގެ ރައީސް ކަމުގައި ހުންނަވާ ޕާޓީ އެވެ.
ކޮވިޑް-19 އާގުޅިގެން ސަރުކާރުގެ ބައެއް އިދާރާތަކުގެ ތެރޭގައި ކޮރަޕްޝަނާއި ހިޔާނާތުގެ ބައެއް ކަންކަން ހިންގަމުންދާކަމުގެ ތުހުމަތު ކުރެވެމުންދާއިރު، މިސަރުކާރަކީ ކޮރަޕްޝަނާ ދެކޮޅަށް މަސައްކަތް ކުރާނެ ސަރުކާރެއް ކަމަށް ތަކުރާރުކޮށް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް ވަނީ ވިދާޅުވެފަ އެވެ.
އެގޮތުން ކޮރަޕްޝަންގެ މައްސަލަތައް ސީދާ ރައީސް އޮފީހަށް ރިޕޯޓް ކުރުމަށްޓަކައި ވަނީ "ޒީރޯ ޓޮލަރެންސް ޓު ކޮރަޕްޝަން" ޕޯޓަލްއެއް ވެސް ގާއިމު ކޮށްފަ އެވެ.
ކޮރަޕްޝަންގެ އެކި ތުހުމަތުތައް މީގެކުރިން ވެސް ކުރެވިފައިވާ ބައެއް ބޭފުޅުންނާއި ކުރީ ސަރުކާރުތަކުގައި އިސްކޮށް އުޅުއްވި ވެރިންނާއި ކޮރަޕްޝަންގެ ތުހުމަތު ކުރެވޭ ސިޔާސީ ބައެއް ބޭފުޅުން އެކިއެކި މަގާމުތަކުގައި ތިއްބަވާތީ، އެކަމުގެ ކަންބޮޑުވުންވެސް ބައެއް ފަރާތްތަކުން ދަނީ ފާޅު ކުރަމުން ނެވެ.
