އޮޒިލްއަށް ފާޑުކިޔަމުންދާ މީހުންނަށް ޕޮޑޮލްސްކީ ރައްދު ދީފި

އާސެނަލަށް ކުޅެމުން އަންނަ ޖަރުމަންގެ މިޑްފީލްޑަރު މެސުޓް އޮޒިލްއަށް ފާޑުކިޔަމުންދާ މީހުންނަށް އޭނާ އާއެކު ފީފާ ވޯލްޑް ކަޕް ކާމިޔާބުކުރި ޖަރުމަންގެ ފޯވާޑް ލޫކަސް ޕޮޑޮލްސްކީ ރައްދު ދީފިއެވެ.

މީގެ ކުރިން ހަގީގަތާ ޚިލާފު ވާހަކަތައް މީޑިއާއިންނާއި ފުޓްބޯޅައިގެ އެކި މީހުން ދައްކަމުން އަންނާތީ އެކަމާ އޮޒިލް ވަނީ ހިތްހަމަނުޖެހުން ފާޅުކޮށްފައެވެ.

އެކަމާ ގުޅުވައިގެން ޕޮޑޮލްސްކީ ބުނީ އޮޒިލްއަކީ ކިހާ ފެންވަރެއްގެ ކުޅުންތެރިއެއްކަން އާސެނަލަށް ނޭނގުމަކީ އޮޒިލްގެ މައްސަލައެއް ނޫން ކަމަށާއި، އޮޒިލް އަކީ އަދިވެސް އާސެނަލް ޖާޒީގައި ވިދާނެ ކުޅުންތެރިއެއް ކަމަށެވެ. އަދި ބުނީ އޭނާ އަށް އޮޒިލް ވަރަށް ރަނގަޅަށް އެނގޭ ކަމަށާއި، އޮޒިލްގެ ފަރާތުން އަޚުލާގީ މައްސަލައެއް ނުފެންނާނެ ކަމުގެ ޔަގީންކަން އޮންނަ ކަމަށެވެ. އަދި އޮޒިލްއަށް ބޭނުންވަނީ އާސެނަލްގެ ކޯޗުންނާއި، މެނޭޖްމަންޓްގެ އެއްބާރުލުން ކަމަށާއި، އޮޒިލް ފެންވަރުގެ ކުޅުންތެރިއެއް ޓީމު ދޫކޮށްފައި ދިޔުމުން އެކަމުގެ ގެއްލުން ލިބޭނީ އާސެނަލަށް ކަމަށްވެސް ޕޮޑޮލްސްކީ ބުންޏެވެ.

ޕޮޑޮލްސްކީ އިތުރަށް ބުނީ އޮޒިލްގެ މައްސަލް ފެންމަތިވުމުން އޭނާ އޮޒިލްއާ ވާހަކަ ދެއްކި ކަމަށާއި، އޮޒިލް ހުރީ އާސެނަލާއެކު އިތުރު ކާމިޔާބު ހޯދުމަށް ތައްޔާރަށް ކަމަށެވެ. އަދި އާސެނަލުން އެފުރުސަތު ނުދީފިނަމަ، ކުރިމަގާ މެދު އޮޒިލް އާއި އޭނާގެ އޭޖެންޓް ގޮތް ނިންމާނެ ކަމަށާއި، އޮޒިލް ނިންމާ ނިންމުން ވެގެންދާނީ ވަރަށް ޕްރޮފެޝަނަލް ނިންމުމަކަށް ކަމަށްވެސް ޕޮޑޮލްސްކީ ބުންޏެވެ.

އޮޒިލް ދޫކޮށްލަން އާސެނަލުން މަސައްކަތް ކުރަމުން އަންނަ ކަމަށް ރިޕޯޓުކޮށްފައިވާއިރު، އޭނާ ވަނީ އާސެނަލާ ދެމެދު މައްސަލަ ޖެހުނު ސަބަބު ސާފުކޮށްދީފައެވެ. އޮޒިލް ބުނީ އޭނާ އާއި އާސެނަލާ ދެމެދު މައްސަލަ ޖެހުނީ ކޮވިޑް-19 ގެ ސަބަބުން ކުޅުންތެރިންގެ މުސާރަ ކުޑަކުރުމަށް ބުނުމުން، އެކަމަށް ދެކޮޅު ހެދި ހިސާބުން ކަމަށެވެ. އަދި އެކަމަށް ދެކޮޅު ހެދީ އާސެނަލަށް އޭނާ ކުރިމަތިކުރި ސުވާލުތަކަށް ކުލަބުން ޖަވާބުދާރީ ނުވުމުން ކަމަށްވެސް އޮޒިލް ބުންޏެވެ. އަދި ބުނީ އޭނާގެ ކެރިއަރު ހަލާކުކޮށްލުމަށް މިދިޔަ ދެ އަހަރުވެސް މީހުން މަސައްކަތް ކުރި ކަމަށާއި، އެކަމަކު އެއީ ވާނެ ކަމެއް ނޫން ކަމަށެވެ.

އޮޒިލް އަކީ އާސެނަލްގައި މިވަގުތު ހުރި އެންމެ މުސާރަ ބޮޑު ކުޅުންތެރިޔާއެވެ. މީގެ ކުރިން މީޑިއާތަކުން ވަނީ ލޯނު އެއްބަސްވުމެއްގެ ދަށުން އެހެން ކްލަބަކަށް އޮޒިލް ބަދަލުވުން ނުވަތަ އެއްބަސްވުމުގައި ބާކީ އޮތް މުސާރަ ކަމަށްވާ 18 މިލިޔަން ޕައުންޑް ދިނުމަށްފަހު އޮޒިލް ދޫކޮށްލުމަށް އޭނާގެ އޭޖެންޓަށް އާސެނަލުން ހުށަހަޅާފައިވާ ކަމަށް ރިޕޯޓުކޮށްފައެވެ.

އެކަމަކު އޮޒިލްގެ އޭޖެންޓް ބުނީ އަންނަ ސީޒަނުގައިވެސް އޮޒިލް އާސެނަލްގައި މަޑުކުރާނެ ކަމަށާއި، އޭނާ އާސެނަލް ދޫކޮށްލާނީ އާސެނަލާއެކު ހަދާފައިވާ އެއްބަސްވުން ހަމަވުމުން ކަމަށެވެ.

ރެއާލް މެޑްރިޑް ދޫކޮށް 2013 ވަނަ އަހަރު އާސެނަލަށް ބަދަލުވި އޮޒިލް ވަނީ އާސެނަލަށް މިހާތަނަށް ކުޅެދިން 254 މެޗުގައި 44 ލަނޑު ކާމިޔާބުކޮށްފައެވެ. އަދި ވަނީ އާސެނަލާއެކު އެފްއޭ ކަޕް ތިން ފަހަރު ކާމިޔާބުކޮށްފައެވެ.