2022 ވަނަ އަހަރު ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕަކީ ފުޓްބޯޅަ ސަޕޯޓަރުންނާއި މެޗުތައް ބަލަންދާ މީހުންނަށް ތަފާތު ތަޖުރިބާއެއް ގެނުވާނެ ވޯލްޑް ކަޕެއްގެ ގޮތުގައި ހަދައިދޭނެ ކަމަށް މުބާރާތުގެ އިންތިޒާމު ކޮމެޓީގެ ޗީފް އެގްޒެކެޓިވް އޮފިސަރު ނަސީރު އަލް ޚަތެރު ވިދާޅުވެއްޖެއެވެ.
ނަސީރު ވިދާޅުވީ ގަތަރުގައި ބާއްވާ ވޯލްޑް ކަޕަކީ ހުރިހާ ގޮތަކުންވެސް ތަފާތު ވޯލްޑް ކަޕަކަށް ވެގެންދާނެ ކަމަށާއި، މިވަގުތު އެންމެ އިސްކަމެއް ދީގެން މަސައްކަތް ކުރަމުން އަންނަނީ ވޯލްޑް ކަޕް ބެލުމަށް ގަތަރަށް އަންނަ ސަޕޯޓަރުންނަށް ވޯލްޑް ކަޕަކީ ތަފާތު ވޯލްޑް ކަޕަކަށް ހެދުމަށް ކުރަމުންގެންދާ މަސައްކަތް ކަމަށެވެ. އަދި އެކަމުގެ ޕްލޭނެއް ހަދަމުން ގެންދާ ކަމަށާއި ޕްލޭނުގެ ބޮޑުބައި މިހާރު ނިމިފައިވާ ކަމަށްވެސް ނަސީރު ވިދާޅުވިއެވެ.
ނަސީރު އިތުރަށް ވިދާޅުވީ ގަތަރު ވޯލްޑް ކަޕަކީ ދަތުރުފަތުރުގެ ގޮތުން ބެލިކަމުގައި ވިޔަސް ސަޕޯޓަރުންނަށް އެތަށް ގުނައެއް ފަސޭހަވެގެންދާނެ ވޯލްޑް ކަޕެއް ކަމަށާއި، އަދި މިވަގުތު ވިސްނުން ހުރީ މެޗުތައް ކުޅޭ ދަނޑުތަކާއި ކައިރިން ސަޕޯޓަރުން ތިބުމުގެ އިންތިޒާމު ހެދޭނެ ގޮތަކާއި މެދު ވިސްނުން ކަމަށެވެ.
މީގެ ކުރިން ފީފާގެ ރައީސް ޖިއާނީ އިންފަންޓީނޯ ވެސް ވަނީ ގަތަރު ވޯލްޑް ކަޕަކީ ހުރިހާ ގޮތަކުންވެސް ތާރީޙީ ވޯލްޑް ކަޕަކަށް ވެގެންދާނެ ކަމަށް ވިދާޅުވެފައެވެ.
ގަތަރުގައި 2022 ވަނަ އަހަރު ބާއްވާ ވޯލްޑް ކަޕް ކުޅޭނީ ފަސް ސިޓީއެއްގެ އަށް ދަނޑެއްގައެވެ. މުބާރާތުގައި ޖުމްލަ 32 ޓީމު ވާދަކުރާނެއެވެ. މުބާރާތް ހޯސްޓް ކުރުމުގެ ފުރުސަތު ގަތަރަށް ލިބުނީ އެމެރިކާ އާއި، ސައުތު ކޮރެއާ އާއި، ޖަޕާން އަދި އޮސްޓްރޭލިއާއާ ވާދަކޮށްގެންނެވެ.
