ރާއްޖެއާއި ޕާކިސްތާނުގެ ގުޅުން އިތުރަށް ވަރުގަދަ ކުރުމަށް މަޝްވަރާ ކުރައްވައިފި

ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުތަކާ ގުޅޭގޮތުން ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙާއި، ޕާކިސްތާނުގެ ބޮޑުވަޒީރު އިމްރާން ޚާން މަޝްވަރާ ކުރައްވައިފިއެވެ.

ހޯމަ ދުވަހު ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ކުރެއްވި ޓްވީޓެއްގައި ވިދާޅުވީ، ދެ ޤައުމުގެ ދެމެދުގައި ކޮވިޑް-19 އިން ރައްކާތެރިވުމަށް ކުރެވެމުންދާ މަސައްކަތްތަކާ ގުޅޭގޮތުން ޕާކިސްތާނުގެ ބޮޑުވަޒީރާއެކު މަޝްވަރާ ކުރައްވާފައިވާ ކަމަށެވެ. ރައީސް ސޯލިޙު ވިދާޅުވީ، އޭގެ އިތުރުންވެސް ދެ ޤައުމުގެ ބަދަހި ގުޅުން އިތުރަށް ވަރުގަދަ ކުރެވޭނެ ގޮތްތަކާ ގުޅޭގޮތުން މަޝްވަރާ ކުރެވުނުކަމަށެވެ.

ކޮވިޑް-19 އާ ގުޅިގެން ދެ ޤައުމުގައި އަޅާފައިވާ ފިޔަވަޅުތަކުގެ މައުލޫމާތުތައް ހިއްސާ ކުރައްވާފައިވާއިރު، ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ޕާކިސްތާނުންވެސް ބައިނަލްއަގްވާމީ ދަތުރުތައް މެދުކަނޑާލިއެވެ. އެހެން ނަމަވެސް ޖޫން މަހުގެ ފަހުކޮޅު އެ ޤައުމުގެ ބައިނަލްއަގްވާމީ އުދުހުންތައް އަލުން ވަނީ ފަށާފައެވެ.

ރާއްޖެއާއި ޕާކިސްތާނާ ދެމެދުގެ ގުޅުން އިތުރަށް ބަދަހި ކުރުމަށް މި ސަރުކާރުން ކުރަމުންދާ މަސައްކަތްތަކުގެ ދަށުން ހުޅުމާލޭ ދެވަނަ ފިޔަވަހީގައި ގާއިމްކުރާ ޑިޕްލޮމެޓިކް އެންކްލޭވްގައި އެމްބަސީއެއް އަޅަން ރާއްޖޭގައި ހުންނަ ޕާކިސްތާން ހައިކޮމިޝަނަށް ވަނީ ބިމެއްވެސް ދޫކޮށްފައެވެ. އެގޮތުން ކުރީ ސަރުކާރުން ޕާކިސްތާނަށް ހައި ކޮމިޝަން ގާއިމްކުރުމަށް ނިންމާފައި އޮތީ 3000 އަކަފޫޓުގެ ބިމެކެވެ. ނަމަވެސް، މިސަރުކާރުން ވަނީ 12000 އަކަފޫޓުގެ ބިމަކަށް ބަދަލުކޮށްފައި ކަމަށް ފޮރިން މިނިސްޓްރީން ބުނު އެވެ.

އަދި ޕާކިސްތާނުގެ ވެރިރަށް އިސްލާމްއާބާދުގެ ޑިޕްލޮމެޓިކް އެންކްލޭވްގެ މެދުތެރެއިން މީގެ ދެގުނަ ބޮޑު ބިމެއް ރާއްޖެއަށް ދޭނެ ކަމަށް ޕާކިސްތާން ސަފީރު ވިދާޅުވެފައިވާ ކަމަށް ފޮރިން މިނިސްޓްރީން ބުންޏެވެ.