މުސާރަ ދިނުމަށްފަހު އާސެނަލުން އޮޒިލް ދޫކޮށްލަނީ

އާސެނަލަށް ކުޅެމުން އަންނަ ޖަރުމަންގެ މިޑްފީލްޑަރު މެސެޓް އޮޒިލްގެ އެއްބަސްވުމުގައިވާ ގޮތަށް މުސާރަ ދިނުމަށްފަހު، އޭނާ ދޫކޮށްލާން އާސެނަލުން ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.

އޮޒިލް އަކީ އާސެނަލްގައި މިވަގުތު ހުރި އެންމެ މުސާރަ ބޮޑު ކުޅުންތެރިޔާއެވެ. އާސެނަލްގެ ކޯޗު މިކޭލް އާޓެޓާގެ ޕްލޭންގައި އޮޒިލް ނުހިމެނޭ ކަމަށް މީޑިއާ ރިޕޯޓުތައް ބުނާއިރު، އާސެނަލުން އަންނަނީ އަންނަ ސީޒަނަށް ޓީމު ވަރުގަދަ ކުރުމަށް މަސައްކަތްކުރަމުންނެވެ. އަދި އާސެނަލަށް ކުޅެމުން އަންނަ ބައެއް ކުޅުންތެރިން ވިއްކާލާނެ ކަމަށް ރިޕޯޓުތައް ބުނެއެވެ.

އާސެނަލްގެ ބޯޑު މެންބަރުންނާ ހޯމަ ދުވަހުގެ ވަގުތެއްގައި އާޓެޓާ ބައްދަލުކޮށްފައިވާއިރު، މި ބައްދަލުވުމުގައި އެންމެ ބޮޑަށް ވާހަކަ ދެކިވިފައިވަނީ އޮޒިލްއާ މެދު ކަމަށް ރިޕޯޓުތައް ބުނެއެވެ. އެގޮތުން އޮޒިލްއަށް ދޭންޖެހޭ މުސާރަ ދިނުމަށްފަހު، އޭނާ ދޫކޮށްލުމަށް މި ބައްދަލުވުމުގައި ނިންމާފައިވާ ކަމަށް ރިޕޯޓުތައް ބުނެއެވެ. އެގޮތުން ލޯނު އެއްބަސްވުމެއްގެ ދަށުން އެހެން ކްލަބަކަށް އޮޒިލް ބަދަލުވުން ނުވަތަ އޮޒިލްގެ އެއްބަސްވުމުގައި ބާކީ އޮތް މުސާރަ ކަމަށްވާ 18 މިލިއަން ޕައުންޑް ދިނުމަށްފަހު އޭނާ ދޫކޮށްލުމަށް އޮޒިލްގެ އޭޖެންޓަށް ހުށަހަޅާފައިވާ ކަމަށްވެސް ރިޕޯޓުތައް ބުނެއެވެ.

މީގެ ކުރިން އޮޒިލްވެސް އާސެނަލް ދޫކޮށްލާނެކަމުގެ އިޝާރާތެއް ދީފައެވެ. އެގޮތުން އޮޒިލް ވަނީ އާސެނާލާއެކު އޭނާއަށް ކުރިމަގު އޮތް ކަމާމެދު ސުވާލު އުފެދޭ ކަމަށް ބުނެފައެވެ. އެކަމަކު ދާދި ފަހުން އޮޒިލްގެ އޭޖެންޓް ބުނީ އަންނަ ސީޒަނުގައި އޮޒިލް އާސެނަލްގައި މަޑުކުރާނެ ކަމަށާއި، އޭނާ އާސެނަލް ދޫކޮށްލާނީ އަންނަ ސީޒަނަސްފަހު ކަމަށް ބުނެފައެވެ.

ޝާލްކާއިން ފުޓްބޯޅަ ކެރިއަރު ފެށި އޮޒިލް މީގެ ކުރިން ވަނީ ރެއާލް މެޑްރިޑާއެކުވެސް ކާމިޔާބު ދުވަސްތަކެއް ހޭދަކޮށްފައެވެ. 2013 ވަނަ އަހަރު ރެއާލް ދޫކޮށް އާސެނަލަށް ބަދަލުވި އޮޒިލް ވަނީ އާސެނަލަށް މިހާތަނަށް ކުޅެދިން 254 މެޗުގައި 44 ލަނޑު ކާމިޔާބުކޮށްފައެވެ. އަދި ވަނީ އާސެނަލާއެކު އެފްއޭ ކަޕް ތިން ފަހަރު ކާމިޔާބުކޮށްފައެވެ.