ޗެމްޕިއަންސް ލީގުން ކެޓުމާއެކު ޔުވެންޓަސްއިން ސާރީ ވަކިކޮށްފި

ޔުއެފާ ޗެމްޕިއަންސް ލީގުގެ ކުއާޓާފައިނަލަށް ނުގޮސް ޔުވެންޓަސް ކެޓުމާ ގުޅިގެން އެޓީމުގެ ކޯޗުގެ މަގާމުން މައުރީޒިއޯ ސާރީ ވަކިކޮށްފިއެވެ.

މިދިޔަ އަހަރުގެ ޖޫން މަހު ޔުވެންޓަސްގެ ކޯޗުގެ މަގާމާ ހަވާލުވި ސާރީ މަގާމުން ވަކިކުރިއިރު، ފަހަކަށް އައިސް ޔުވެންޓަސްއިން ނެރެމުން އަންނަ ދަށް ނަތީޖާތަކުގެ ސަބަބުން ސާރީއަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ.

މިދިޔަ އަހަރު ޗެމްޕިއަންސް ލީގުގެ ކުއާޓާއިން ކެޓި ޔުވެންޓަސްއަށް މި ފަހަރުގެ ދެވަނަ ބުރުން މުބާރާތް ނިމުނުއިރު، މި ނަތީޖާއާއެކު ޔުވެންޓަސްއިން 1996 ވަނަ އަހަރަށް ފަހު ޗެމްޕިއަންސް ލީގު ކާމިޔާބުކުރަން ކުރަމުން އަންނަ އިންތިޒާރު ވަނީ ދިގުލައިގެން ގޮސްފައެވެ. ޗެމްޕިއަންސް ލީގަށް އަމާޒު ހިފާފައިވާ ޔުވެންޓަސްއިން ޕޯޗުގަލްގެ ތަރި ކްރިސްޓިއާނޯ ރޮނާލްޑޯގެ ސޮއި ހޯދީވެސް އެ މުބާރާތް ކާމިޔާބުކުރުމަށެވެ.

މި ސީޒަނުގެ ޗެމްޕިއަންސް ލީގުން ކެޓުމާއެކު ހޮނިހިރު ދުވަހު ބޭއްވި ބައްދަލުވުމެއްގައި ޔުވެންޓަސްގެ މެނޭޖުމަންޓުން ވަނީ ސާރީ ވަކިކުރަން ނިންމާފައެވެ. މިގޮތަށް ނިންމީ ސާރީ އާއެކު ޔުވެންޓަސްއިން އަމާޒުހިފި ހިސާބަށް ވާސިލްނުވެ، ސާރީ އާއި ޔުވެންޓަސްގެ ބައެއް ކުޅުންތެރިންނާ ދެމެދު މައްސަލަތަކެއް ހުރުމުން ކަމަށް ރިޕޯޓުތައް ބުނެއެވެ.

އެގޮތުން މީގެ ކުރިން ސާރީ އާއި ޔުވެންޓަސްގެ ތަރި ރޮނާލްޑޯއާ ދެމެދު މައްސަލަތަކެއް ޖެހިގެން އުޅޭ ކަމަށް މީޑިއާތަކުން ވަނީ ރިޕޯޓުކޮށްފައެވެ. އެކަމަކު އެފަހަރު ސާރީ ވަނީ ރޮނާލްޑޯ އާއި އޭނާއާ ދެމެދު މައްސަލައެއް ނެތް ކަމަށް ބުނެފައެވެ.

މިފަހަރުގެ ޗެމްޕިއަންސް ލީގުން ޔުވެންޓަސް ކެޓި ނަމަވެސް، ސާރީގެ އިރުޝާދުގެ ދަށުން ޔުވެންޓަސްއިން ވަނީ މި ސީޒަނުގެ އިޓާލިއަން ލީގު ކާމިޔާބުކޮށްފައެވެ.

ރިޕޯޓުތައް ބުނާ ގޮތުން ޔުވެންޓަސްއިން ސާރީ ވަކިކޮށް، އެޓީމުގެ ކޯޗުގެ މަގާމަށް ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ ގެންނަށް އަންނަނީ މަސައްކަތް ކުރަމުންނެވެ. ޔުވެންޓަސްގެ އިތުރުން ބާސެލޯނާއިންވެސް އަންނަނީ ޕޮޗެޓީނޯއަށް ފާރަލަމުންނެވެ. މިދިޔަ އަހަރުގެ ނޮވެންބަރު މަހު ޓޮޓެންހަމްގެ ކޯޗުގެ މަގާމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވެއެވެ.