ކ. މާލެ
|
16 ފެބްރުއަރީ 2017 | ބުރާސްފަތި 12:39
ރެއާލް މެޑްރިޑް އަދި ނަޕޯލީ ބައްދަލުކުރި މެޗުގެ ތެރެއިން
ރެއާލް މެޑްރިޑް އަދި ނަޕޯލީ ބައްދަލުކުރި މެޗުގެ ތެރެއިން
ގޫގުލް
ޔުއެފާ ޗެމްޕިއަންސް ލީގު
ޗެމްޕިއަންސް ލީގު: ރެއާލް އަދި ބަޔާން މޮޅުވެ ކުއާޓާގެ އުންމީދު އާކޮށްފި
 
ކުއާޓާ އަށް ދިއުމަށް ނަޕޯލީ ދަނޑުގައި ކުޅޭ މެޗު ދެ ލަނޑުން އެޓީމު ރެއާލް ބަލިކުރަންޖެހޭ
 
ކުއާޓާ އަށް ދިއުމަށް ބަޔާން ދަނޑުގައި ކުޅޭ މެޗު ފަސް ލަނޑުން އާސެނަލް ކާމިޔާބުކުރަން ޖެހޭ

ޔުއެފާ ޗެމްޕިއަންސް ލީގުގައި ރެއާލް މެޑްރިޑް އަދި ބަޔާން މިއުނިކް މޮޅުވެ ކުއާޓާ ފައިނަލްގެ އުންމީދު އާކޮށްފިއެވެ.

ބުދަ ދުވަހުގެ ރޭ ކުޅުނު މެޗު ނަޕޯލީއާ ވާދަކޮށް ރެއާލް އިން މެޗު ކާމިޔާބުކުރީ ފަހަތުން އަރާ 1-3 ގެ ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ ނަޕޯލީންނެވެ. މި ލަނޑު 8 ވަނަ މިނެޓުގައި އެޓީމަށް ކާމިޔާބުކޮށްދިނީ ހަމްޝިކްގެ އެހީތެރިކަމާއެކު އިންސިގްނޭއެވެ.

މި ލަނޑާއެކު ރެއާލް އިން ވަނީ އެޓީމުގެ ކުޅުން ރަނގަޅުކޮށް ނަޕޯލީގެ ހާފަށް ބާރުބޮޑުކޮށްފައެވެ. އެގޮތުން 18 ވަނަ މިނެޓުގައި ކަރިމް ބެންޒެމާ ކާމިޔާބުކޮށްދިން ލަނޑާއެކު އެ ޓީމު ވަނީ ނަތީޖާ ހަމަހަމަކޮށްފައެވެ.

މި ލަނޑަށްފަހު ވެސް ރެއާލް އަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ވެސް ރަނގަޅަށް ކުޅެމުންދިޔައީ ރެއާލް އިންނެވެ. އެގޮތުން އެޓީމަށް ވަނީ ފުރަތަމަ ހާފެކޭ އެގޮތަށް ދެވަނަ ހާފްގައި ވެސް ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

ރެއާލް އިން މެޗުގެ ލީޑު ނެގީ 49 ވަނަ މިނެޓުގައެވެ. މި ލަނޑު ކްރިސްތިއާނޯ ރޮނާލްޑޯގެ އެހީތެރިކަމާއެކު އެޓީމަށް ކާމިޔާބުކޮށްދިނީ ރެއާލްގެ މެދު ތެރޭގައި މޮޅު ކުޅުމެއް ދެއްކި ޓޯނީ ކްރޫޒް އެވެ.

ރެއާލް އިން މެޗުގައި ކާމިޔާބުކުރި ތިންވަނަ ލަނޑު 54 ވަނަ މިނެޓުގައި ކާމިޔާބުކުރިއިރު، މި ލަނޑު އެޓީމަށް ޖަހައިދިނީ ޑިފެންޑަރު ކަސްމީރޯ އެވެ. މީގެއިތުރުން ވެސް ރެއާލްއަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

ރެއާލް އަދި ނަޕޯލީ ބައްދަލުކުރާ ދެވަނަ ލެގުގެ މެޗު އޮންނާނީ އަންނަ މަހުގެ ހަތްވަނަ ދުވަހު ނަޕޯލީ ދަނޑުގައެވެ. ނަޕޯލީއަށް ދެވަނަ ބުރަށް ދެވޭނީ އެ މެޗު ދެ ލަނޑުގެ ތަފާތުން ކާމިޔާބުކޮށްގެންނެވެ.

ބުދަ ދުވަހުގެ ރޭ ކުޅުނު މެޗުން އާސެނަލްއާ ވާދަކޮށް ބަޔާން މެޗު ކާމިޔާބުކުރީ 1-5 ގެ ތަފާތުބޮޑު ނަތީޖާއަކުންނެވެ.

ބަޔާން ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން އެޓީމުން މޮޅަށް ކުޅެފައިވާއިރު، ލަނޑު ޖެހުމަށް ވެސް އެޓީމަށް ވަނީ ގިނަ ފުރުސަތުތަކެއް ލިބި ބޭކާރުވެފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ބަޔާން އިންނެވެ. މި ލަނޑު 11 ވަނަ މިނެޓުގައި އެޓީމަށް ކާމިޔާބުކޮށްދިނީ އާޔަން ރޮބެންއެވެ. މި ލަނޑަށްފަހު ވެސް ބަޔާން އިން ދިޔައީ އާސެނަލްގެ ގޯލަށް ނުރައްކާކުރަމުންނެވެ.

އެހެންނަމަވެސް ބަޔާން އިން މޮޅަށް ކުޅެމުންދިޔަ ދަނޑިވަޅެއްގައި އާސެނަލް އިން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު 30 ވަނަ މިނެޓުގައި ކާމިޔާބުކޮށްދިނީ އެލެކްސަސް ސަންޗޭޒް އެވެ. އޭނާ މި ލަނޑު ކާމިޔާބުކުރީ ލިބުނު ޕެނަލްޓީ ނޯޔާ ސޭވްކޮށް ކުޅުމުގެ ތެރެއަށް ފޮނުވާލުމުން ރީބައުންޑުންނެވެ.

މި ލަނޑުތަކާއެކު ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ބަޔާން އިން އެޓީމުގެ ކުޅުން ރަނގަޅުކޮށްފައިވާއިރު، އާސެނަލްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތަކެއް އެޓީމުން ވަނީ ތަނަވަސްކޮށްފައެވެ.

ބަޔާން އިން ދެވަނަ ފަހަރަށް މެޗުގެ ލީޑު ނެގީ 53 ވަނަ މިނެޓުގައި ރޮބާޓް ލެވަންޑޯސްކީ ކާމިޔާބުކޮށްދިން ލަނޑުންނެވެ. އޭގެ ތިން މިނެޓު ފަހުން ބަޔާން އިން މެޗުގެ ލީޑު ފުޅާކުރީ ތިއާގޯ އަލަކަންޓާރާ ކާމިޔާބުކޮށްދިން ލަނޑުންނެވެ.

ބަޔާން އިން މެޗުގައި ކާމިޔާބުކުރި ހަތަރުވަނަ ލަނޑު ވެސް ކާމިޔާބުކޮށްދިނީ އަލަކަންޓާރާއެވެ. މި ލަނޑު އޭނާ ކާމިޔާބުކުރީ 64 ވަނަ މިނެޓުގައެވެ. މެޗު ނިމެންދަނިކޮށް ބަޔާން އަށް މެޗުގައި އެޓީމުން ކާމިޔާބުކުރި ފަސް ވަނަ ލަނޑު ޖަހައިދިނީ 88 ވަނަ މިނެޓުގައި ތޯމަސް މުލާ އެވެ.

މި ދެޓީމު ބައްދަލުކުރާ ދެވަނަ ލެގުގެ މެޗު އޮންނާނީ އަންނަ މަހުގެ ހަތްވަނަ ދުވަހު އެވެ. ކުއާޓާއަށް ދިއުމަށް އާސެނަލް އިން އެ މެޗު ބަޔާން ދަނޑުގައި ފަސް ލަނޑުން ކާމިޔާބުކުރަން ޖެހޭނެއެވެ.  

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ޖުމާނާ ތައުފީގު
0%
0%
0%
0%
0%
0%
ކޮމެންޓް