ފާއިތުވި ފަސް މަސްދުވަސް ތެރޭގައި ކޮވިޑް-19 އަށް ޕޮޒިޓިވްވި ޒުވާނުން ތިންގުނަ އިތުރު: ޑަބްލިޔުއެޗްއޯ

ނައިޓް ކްލަބް ތަކާއި ބީޗްތަކަށްދާ ޒުވާނުންގެ ތެރެއިން ކޮވިޑް-19 ފެންނަ މިންވަރު އިތުރުވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފިއެވެ.

ޑަބްލިޔުއެޗްއޯއިން ބުނީ އުމުރުން 15 އަހަރާއި 24 އަހަރާ ދެމެދުގެ ޒުވާނުންގެ މެދުގައި ފާއިތުވި ފަސް މަސް ދުވަހު ވައިރަސް ޖެހިފައިވާ މިންވަރު ތިން ގުނަ އިތުރުވެފައިވާ ކަމަށެވެ. މިކަމާއި ގުޅިގެން ޑަބްލިޔުއެޗްއޯއިން ހަދާފައިވާ އެނަލިސިސް އަކުން ދައްކާ ގޮތުގައި ވައިރަސް ޖެހިފައިވާ 6 މިލިއަން މީހުން ފެބްރުއަރީ މަހުގެ 24ން ފެށިގެން ޖުލައި މަހުގެ 12 ވަނަ ދުވަހާ ހަމައަށް ފެނިފައިވާއިރު އޭގެތެރޭގައި އުމުރުން 15 އަހަރާއި 24 އަހަރާ ދެމެދުގެ ޒުވާނުންގެ މެދުގައި ވައިރަސް ފެތުރޭ މިންވަރު 4.5 އިންސައްތަ އިން 15 އިންސައްތަ އަށް އިތުރުވެފައިވާ ކަމަށެވެ.

ވައިރަސް އެންމެ ގިނަ މީހުންނަށް ޖެހިފައިވާ އެމެރިކާގެ އިތުރުން ޔޫރަޕްގެ ގައުމުތަކުގެ ތެރެއިން ސްޕެއިން، ޖަރމަނީ އަދި ފްރާންސްގެ އިތުރުން އޭޝިއާގެ ގައުމުތަކުގެ ތެރެއިން ޖަޕާނު ފަދަ ގައުމުތަކުން ބުނެފައިވަނީ ޒުވާނުންނަށް ވައިރަސް ޖެހޭ މިންވަރު އިތުރުވެފައިވާ ކަމަށެވެ.

ޒުވާނުންގެ މެދުގައި މާސްކު އެޅުމާއި އިޖުތިމާޢީ ގައިދުރުކަން ގެންގުޅުންފަދަ ވައިރަސް އިން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށް ސަމާލުކަންދޭ މިންވަރު ކުޑަ ކަމަށް ޑަބްލިޔުއެޗްއޯއިން ބުނެއެވެ.

މީގެއިތުރުން އެއްތަނުން އަނެއްތަނަށް ދަތުރުކުރުމާއި ގުޅިގެން ވައިރަސް ޖެހޭ މިންވަރާއި ފެތުރޭ މިންވަރު އިތުރުވަމުންދާ ކަމަށް ޑަބްލިޔުއެޗްއޯއިން ބުނެއެވެ.

ޒުވާނުންގެ މެދުގައި ވައިރަސް ފެތުރޭ މިންވަރު އިތުރުވަމުންދާތީ ގައުމުތަކުން އަންނަނީ ޒުވާނުން ބައިވެރިވެގެން ކުރިއަށް ގެންދާ ހަރަކާތްތައް ވަކިން ޚާއްސަކޮށް ރޭގަނޑު ކުރިޔަށްގެންދާ ޕާޓީތައް ފަދަ ކަންކަން ގާތުން ބަލާ މޮނިޓަރ ކުރަމުންދާ ކަމަށް ގައުމުތަކުން ވަނީ ބުނެފައެވެ.