ގއ. ކޮލަމާފުށީގައި ކުޑަ ފިރިހެން ކުއްޖަކަށް ޖިންސީގޯނާކުރި ކަމުގެ ތުހުމަތު ކުރެވޭ މީހާ ހައްޔަރު ނުކޮށްގެން އެރަށުގެ ޒުވާނުން ނުކުމެ އިހުތިޖާޖު ކޮށްފިއެވެ.
"ރާއްޖެއެމްވީ" އަށް މައުލޫމާތު ދެއްވަމުން ކޮލަމާފުށީ ކައުންސިލްގެ ރައީސް އިބްރާހިމް ޢަލީމް ވިދާޅުވީ 14 އަހަރުގެ ފިރިހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތު ކުރެވޭ މީހާ ހައްޔަރު ކުރުން ލަސްވަމުންދާތީ ހުކުރު ދުވަހު ހަވީރު ރަށުގެ ގިނަ އަދަދެއްގެ ބަޔަކު ނުކުމެ އިހުތިޖާޖް ކޮށްފައިވާ ކަމަށެވެ.
ކުޑަކުއްޖާއަށް ޖިންސީގޯނާ ކުރިކަމުގެ ތުހުމަތު ކުރެވެނީ އުމުރުން 46 އަހަރުގެ ފިރިހެނެއްގެ މައްޗަށް ކަމަށާއި އެ މައްސަލަ ފުލުހުންނަށް ހުށަހަޅާފައިވަނީ ބުރާސްފަތި ދުވަހުގެ ހަވީރު ކަމަށް ޢަލީމް ވިދާޅުވިއެވެ.
އަލީމް ވިދާޅުވީ ޖިންސީ ގޯނާގެ ތުހުމަތު ކުރެވޭ މީހާއަކީ އެކުއްޖާގެ އާއިލާގެ މީހެއް ނޫން ކަމަށާއި އެމީހާއި އަކީ އެކަނި ގެއްގައި ދިރިއުޅޭ މީހެއް ކަމަށެވެ. އަދި އެކުއްޖާ އެގެއަށް ދިޔައީ އެއްޗެއް ހޯދުމަށްކަމަށެވެ.
ރައްޔިތުން މުޒާހަރާ ކުރަންފެށުމުން ހުކުރު ދުވަހު ހަވީރު ފުލުހުން ކޯޓް އަމުރަކާއި އެކު އެ މީހާގެ ގޭގައި ހަރަކާތްތެރިވަމުންދާ ކަމަށް ކައުންސިލް ރައީސް ވިދާޅުވިއެވެ.
