ރާއްޖެއަށް މަސްތުވާތަކެތި އެތެރެކުރި ބޮލީވިއާ މީހާގެ މައްޗަށް ދައުވާ ކޮށްފި
ސާބިތުވެއްޖެނަމަ އުމުރު ދުވަހުގެ ޖަލު ހުކުމެއް
ބޮލީވިއާ އަންހެން މީހާ ރާއްޖެ އަށް އެތެރެކުރި މަސްތުވާތަކެތި، ކޮކެއިން އަށް ވަނީ ޕޮޒިޓިވް ވެފައި
މިދިޔަ އަހަރުގެ އޮކްޓޯބަރު މަހުގެ ތެރޭގައި ރާއްޖެއަށް މަސްތުވާތަކެތި އެތެރެކުރަން އުޅެނިކޮށް ހައްޔަރުކުރި ބޮލީވިއާ އަންހެން މީހާގެ މައްޗަށް ދައުވާ ކޮށްފި އެވެ.
ރާއްޖެއަށް މަސްތުވާތަކެތި އެތެރެކުރަން އުޅެނިކޮށް ބޮލީވިއާގެ ރައްޔިތެއް ކަމަށްވާ ކުލައެއްލާ އޯޓިޒް ކްލައުޑިއާ ޕާޓިރީސިއާ ހައްޔަރުކޮށްފައިވަނީ މިދިޔަ އަހަރުގެ އޮކްޓޯބަރު 17 ވަނަ ދުވަހު އެވެ.
ބްރެޒިލް މަގުން ރާއްޖެ އައި އެ އަންހެން މީހާ މަސްތުވާތަކެއްޗާއެކު އަތުލައިގަނެވުނީ، އޭނާގެ އަމަލުތައް ހުރި ގޮތުން ޝައްކުކުރެވިގެން ބަލާފާސްކުރުމުންނެވެ. އޭނާގެ އަތުން 2.153 ކިލޯގެ މަސްތުވާތަކެތި އަތުލައިގަނެފައިވެ އެވެ.
އޭނާގެ އަތުން ފެނުނު މަސްތުވާތަކެތި ތަހުލީލުކުރިއިރު މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ޕޮޒިޓިވް ވެފައިވާ ކަމަށް ކަސްޓަމްސް އިން ބުނެފައިވެ އެވެ.
ކަސްޓަމްސް އިން ބުނެފައިވާ ގޮތުގައި އެތަކެއްޗަކީ ސީދާ ރާއްޖެއަށް އެތެރެކުރުމުގެ ބަދަލުގައި އެހެން ގައުމަކަށް އެތެރެކުރަން މަސައްކަތް ކުރަމުން ދިޔަ ތަކެތި ކަމަށާއި، ރާއްޖެ ބޭނުންކޮށްފައިވަނީ ޓްރާންސިޓް ޕޮއިންޓެއްގެ ގޮތުގައި ކަމަށެވެ.
މި މައްސަލައާ ގުޅިގެން އޭނާގެ މައްޗަށް ކޮށްފައިވަނީ ޖަދުވަލު އެކެއްގައިވާ މަސްތުވާ އެއްޗެއް ރާއްޖެއަށް އެތެރެކުރުމުގެ ކުށުގެ ދައުވާ އެވެ. އެ ދައުވާ ކޮށްފައިވަނީ މިމަހުގެ 1 ވަނަ ދުވަހު އެވެ.
ކުށް ސާބިތުވެއްޖެ ނަމަ އޭނާގެ މައްޗަށް އުމުރު ދުވަހުގެ ޖަލު ހުކުމަކާއި ބޮޑު ޖޫރިމަނާއެއް އަންނާނެ އެވެ. މި މައްސަލައިގެ ޝަރީއަތް އަންގާރަ ދުވަހު ފަށާނެ އެވެ.
