ކުރިއަށް އޮތް އިންތިޚާބުތައް ކާމިޔާބު ކުރުމަށް ކުރާ މަސައްކަތްތައް ކުރުމުގައި އެންމެ އިސްކޮށް މަސައްކަތް ކުރާ މީހަކަށް ވާނެ ކަމަށް އެމްޑީޕީގެ ޗެއާޕާސަން ކަމަށް އިންތިޚާބުވި ހަސަން ލަތީފް ވިދާޅުވެއްޖެއެވެ.
ހުކުރު ދުވަހު ބޭއްވި އިންތިޚާބުގައި މިހާތަނަށް ގުނި ވޯޓުގެ ނަތީޖާއިން އެމްޑީޕީގެ ޗެއާޕާސަން ކަމުގެ މަޤާމް ކަށަވަރު ކޮށްފައިވާ ހަސަން ލަތީފް ވިދާޅުވީ ޕާޓީ ހިންގާނީ ޕާޓީގެ ލީޑަޝިޕާއި ޤައުމީ މަޖިލީހުގެ އިތުރުން ޕާޓީގެ ރައީސްގެ މަޝްވަރާގެ މަތިން ކަމަށާއި އިދާރީ ކަންކަން ކުރެއްވުމުގެ އިތުރުން އެންމެ ބޮޑު އިސްކަމެއް ދެއްވާނީ ކުރިއަށް އޮތް ލޯކަލް ކައުންސިލް އިންތިޚާބާއި ރިޔާސީ އިންތިޚާބު ކާމިޔާބު ކުރެއްވުމަށް ކަމަށެވެ. އެމަސައްކަތުގައި އެންމެ އިސްދައުރެއް އަދާކުރާ މީހާއަށް ވާނެކަމަށް ވެސް އޭނާ ވިދާޅުވިއެވެ.
"އެމްޑީޕީގެ އަސާސީ ޤަވާއިދުގައި ވަރަށް ސާފުކޮށް އޮވޭ އެމްޑީޕީގެ ޗެއާޕާސަންގެ މަސައްކަތް. އެމަސައްކަތް ކުރުމުގައި އަޅުގަނޑު އިރާދަކުރެއްވިއްޔާ މަސައްކަތް ކުރާނީ ޕާޓީގެ ލީޑަޝިޕާއި، ޤައުމީ މަޖިލީހާއި ޕާޓީގެ ކޮމެޓީތަކުގެ އިތުރުން ޕާޓީގެ ރައީސްގެ ލަފަޔާ އިރުޝާދުގެ ދަށުން. އަޅުގަނޑުގެ އެންމެ މުހިއްމު އަމާޒަކަށް ވާނީ ކުރިއަށް ހުރި އިންތިޚާބުތައް ކާމިޔާބު ކުރުން. ޕާޓީ އިދާރީ ގޮތުން ހަރުދަނާކުރުމުގެ އިތުރުން ކުރިއަށް އޮތް އިންތިޚާބުތައް ކާމިޔާބު ކުރުމުގެ މަސައްކަތުގައި އެންމެ އިސްކޮށް ދެމިހުންނާނަން" ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ ކެންޕޭން ތެރޭގައި ވަރަށް ގިނަ ދަތުރު ކުރެވޭތޯ ބެއްލެވިން ކަމަށާއި ނަމަވެސް ދަތުރު ކުރެވުނީ 40 އަށް ރަށަށް ކަމަށެވެ. ނަމަވެސް ކުރިއަށް އޮތްތަނުގައި އެހެން ރަށަށް ދިއުމުގެ މަސައްކަތް ކުރައްވާނެކަމަށް ހަސަން ލަތީފް ވިދާޅުވިއެވެ.
