އެއްވެސް ގައުމެއްގެ އަސްކަރީ މަރުކަޒެއް ރާއްޖޭގައި ގާއިމް ނުކުރާނެ، އެކަން ނުވެސް ކުރެވޭނެ: ޑިފެންސް މިނިސްޓަރ
27 ޖުލައި 2020 | ހޯމަ 07:00އެއްވެސް ގައުމެއްގެ އަސްކަރީ ސަރަހައްދެއް ގާއިމުކުރަން އެއްވެސް ބަޔަކު ނޫޅޭ
ޑިފެންސް މިނިސްޓަރ ރާއްޖެޓީވީގެ \"ފަލަސުރުހީ\" ޕްރޮގްރާމްގައި
އެއްވެސް ގައުމެއްގެ އަސްކަރީ މަރުކަޒެއް ރާއްޖޭގައި ގާއިމް ނުކުރާނެ ކަމަށާއި އެކަން ނުވެސް ކުރެވޭނެ ކަމަށް ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން މިނިސްޓަރ ވަނީ އިންޑިއާގެ އަސްކަރީ ސަރަހައްދެއް ރާއްޖޭގެ ޤާއިމްކުރަން އުޅޭކަމުގެ ވާހަކަތައް ދޮގުކުރައްވާފައެވެ. މިނިސްޓަރ ވިދާޅުވީ، ދެކެވޭ ވާހަކަތަކަކީ ކަނޑައެޅިގެން ދޮގެއް ކަމަށާއި އެއްވެސް ގައުމެއްގެ އަސްކަރީ ސަރަހައްދެއް ގާއިމުކުރަން އެއްވެސް ބަޔަކު ނޫޅޭ ކަމަށާއި އަދި ދިވެހި ސަރުކާރުން ވެސް އެފަދަ ވާހަކައެއް ދައްކާފައި ނުވާ ކަމަށެވެ. އަދި އެފަދަ ކަމެއް ނުވެސް ހިނގާނެ ކަމަށް މިނިސްޓަރ ވިދާޅުވިއެވެ.
ޕްރޮގުރާމްގައި އިތުރަށް ވާހަކަ ދައްކަވަމުން މިނިސްޓަރ ވިދާޅުވީ، މި ސަރުކާރުން ރާއްޖޭގެ މިނިވަންކަމާއި ސިޔާދަތައް ކުޑަކޮށް ވެސް ބުރޫ އަރާ ފަދަ އެއްވެސް ކަމެއް ނުކުރާނެކަމުގެ ޔަގީންކަން އެތައް ފަހަރެއްގެ މަތީން ރައްޔިތުންނަށް ދިން ނަމަވެސް، ސަރުކާރާއި ރައްޔިތުންނާއި ޖެއްސުމަށްޓަކައި ބަޔަކު ނަފްރަތު އުފެދޭ ފަދަ ދެކޮޅު ނުޖެހޭ ވާހަކަ ދައްކަމުންދާ ކަމަށެވެ.
މިނިސްޓަރ ވިދާޅުވީ އަދިވެސް އެއްފަހަރު ރައްޔިތުންނަށް، ރާއްޖޭގެ މިނިވަންކަމަށް ކުޑަ ވެސް ލޮޅުމެއް އަރާނެ ކަމެއް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސަރުކާރުގެ ފަރާތުން ނުކުރާނެކަމުގެ ޔަގީންކަން އަރުވާ ކަމަށެވެ.
