މެދުފަންތީގެ މީހުންނަށް ޚާއްސަކޮށް ހުޅުމާލޭގައި ފެލެޓްތަކެއް ހަދައި ވިއްކާނެ ބަޔަކު ހޯދަން ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީން) އިއުލާންކޮށްފިއެވެ.

ހަތަރު އެޕާޓްމަންޓް ބިލްޑިންގް އިމާރާތް ކުރަނީ ހުޅުމާލޭގެ ފުރަތަމަ ފިޔަވަހީގައެވެ.

އެޗްޑީސީން ބުނީ "މިކްސްޑް ރެޒިޑެންޝަލް ބިލްޑިންގް" އިމާރާތްކޮށް ވިއްކުމަށް ޝައުގުވެރިވާ ފަރާތްތަކުން ސެޕްޓެންބަރު މަހުގެ 24ގެ ކުރިން ޕްރޮޕޯޒަލް ހުށަހަޅަން ޖެހޭ ކަމަށެވެ.

އެޗްޑީސީން ބުނީ، ކޮވިޑް-19 ގެ ބަލިމަޑުކަމުގެ ހާލަތާ ގުޅިގެން ހުށަހަޅާ ޕްރޮޕޯޒަލްތަކާ ބެހޭ މައުލޫމާތު ދޭނީ ރަޖިސްޓަރީ ކުރާ ފަރާތްތަކަށް އެކަނި ކަމަށާއި، ރަޖިސްޓަރީ ކުރުމުގެ އެންމެ ފަހުގެ ތާރީޚަކީ 13 އޮގަސްޓް ކަމަށެވެ. އަދި ޝައުގުވެރިވާ ފަރާތްތަކުން މައުލޫމާތު ސާފުކުރުމުގެ އެންމެ ފަހު ތާރީޚަކީ 27 އޮގަސްޓް ކަމަށް އެޗްޑީސީން ބުނެއެވެ.

"މިކްސްޑް ރެޒިޑެންޝަލް ބިލްޑިންގް"ގެ ތެރެއިން 3 އިމާރާތް 14 ބުރިއަށް ހަދާއިރު، އެއް އިމާރާތް ހަދަނީ 10 ބުރިއަށްށެވެ.

މެދުފަންތީގެ މީހުންނަށް ޚާއްސަކޮށް ހުޅުމާލޭގައި އެޕާޓްމަންޓް ބިލްޑިންގްތަކެއް ހަދައި ވިއްކާނެ ބަޔަކު ހޯދަން އިއުލާން ކޮށްފައިވާއިރު، ދިވެހި ރާއްޔިތުންނަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ މައްސަލައެވެ. އަދި މާލެ ސިޓީގައި ކުއްޔަށް ދޫކުރާ އެޕަރޓްމެންޓްތަކުގެ ކުލީގެ އަގު ބޮޑު މައްސަލަ ވެސް ރައްޔިތުން ފާހަގަކުރަމުންދާއިރު، މިހާތަނަށް އެއްވެސް ސަރުކާރަކަށް މިމައްސަލަ ހައްލު ކުރެވިފައިނުވެއެވެ.

ޕްލޭނިންގ އެންޑް ހައުސިންގ މިނިސްޓަރު އަސްލަމް، ޖުލައި މަހުގެ 6 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވަނީ، މާލޭގައި ދިރިއުޅެން ކަމުނުދާ ތަންތަނުގައި 21،013 އާއިލާއެއް ދިރިއުޅެމުންދާ ކަމަށާއި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ޓާގެޓަކީ، އެފަރާތްތަކަށް ބޯހިޔާވަހިކަން ފޯރުކޮށްދެއްވުން ކަމަށެވެ.

އަސްލަމް ވިދާޅުވީ، މާލޭގައި ވަރަށް ދަތި ހާލުގައި މީހުން އުޅެމުން އަންނަ ކަމަށާއި އެގޮތުން 600 އަކަ ފޫޓަށް ވުރެ ކުޑަ ތަންކޮޅެއްގެ ތެރޭގައި 21،013 އާއިލާއެއް އުޅެމުންދާ އަންނަ ކަމަށެވެ.

އަސްލަމް ވިދާޅުވެފައިވަނީ، 600 އަކަފޫޓަށްވުރެ، ކުޑަ ތަންކޮޅެއްގައި އާއިލާއެއް ދިރިއުޅޭނަމަ، އެއީ ދިރިއުޅެން ކަމުދާ ތަންކޮޅެއް ކަމަށް މިސަރުކާރުން ނުދެކޭ ކަމަށެވެ.