ފެބްރުއަރީމަހު އެންމެ ގިނައިން ހުށައަޅާފައިވަނީ، ކުޑަކުދީންނަށް އަނިޔާ ކުރުމުގެ މައްސަލަތައް: ޖެންޑަރ
އެންމެގިނައިން ހުށައަޅާފައިވަނީ، ކުޑަކުދީންނަށް އަނިޔާ ކުރުމުގެ މައްސަލަތައް
ކުޑަކުދިންނާއި ގުޅޭ މައްސލަތަކަށް ހޭލުންތެރިކުރުވުމަށް ހަދާފައިވާ ޕޯސްޓަރެއް
ފެބްރުއަރީމަހު އެންމެގިނައިން ހުށައަޅާފައިވަނީ، ކުޑަކުދީންނަށް އަނިޔާ ކުރުމުގެ މައްސަލަތައްކަމަށް މިނިސްޓްރީ އޮފް ޖެންޑަރ އެންޑް ފެމެލީއިން ހާމަކޮށްފިއެވެ.
ޖެންޑަރ މިނިސްޓްްރީން އާއްމުކޮށްފައިވާ ތަފާސް ހިސާބުތަކުގައިވާ ގޮތުން މިއަހަރުގެ ފެބްރުއަރީ މަހު 240 މައްސަލަ ހުށައެޅިފައިވާއިރު ޖެނުއަރީމަހު އެ މިނިސްޓްރީއަށް 256 މައްސަލަވަނީ ހުށައަޅާފައެވެ.
ފެބްރުއަރީމަހު ޖިސްމާނީ އަނިޔާގެ ބައްތިރީސް މައްސަލަ ހުޅައަޅާފައިވާއިރު، ދެން އެންމެ ގިނައިން ހުށައަޅާފައިވަނީ ކުޑަކުދިންނަށް ޖިންސީ ގޯނާކުރުމުގެ މައްސަލަތަކެވެ. ކުޑަކުދިންނަށް ޖިންސީ ގޯނާކޮށްގެން ފެބްރުއަރީ މަހު 30 މައްސަލަ ހުށައަޅާފައިވެއެވެ. މިއީ ޖެނުއަރީ މަހާ އަޅާބަލާއިރު ހަތަރު މައްސަލަ މަދު އަދަދެކެވެ. މީގެއިތުރުން ކުދިންނަށް އިހުމާލުވުމުގެ ތިރީސް މައްސަލަވެސް ވަނީ ހުށައަޅާފައެވެ.
ޖެންޑަރ މިނިސްޓްރީގެ ތަފާސް ހިސާބުތަކަށް ބަލާއިރު، އަންހެނުންނާ ގުޅުން ހުރި މައްސަލަތަކުގެ ތެރެއިން އެންމެ ގިނައިން ހުށައަޅާފައިވަނީ ނަފްސާނީ ގޮތުން ގެއްލުން ދިނުމުގެ މައްސަލަތަކެވެ. އެގޮތުން މިބާވަތުގެ 11 މައްސަލައެއް ހުށައަޅާފައިވެއެވެ. އަންހެނުންނާ ގުޅުން ހުރި މައްސަލަތަކުގެ ތެރެއިން، ޖިސްމާނީ ގޮތުން ގެއްލުން ދިނުމުގެ ހަތް މައްސަލައެއް ހުށައަޅާފައިވާއިރު، ޖިންސީ އަނިޔާގެ ދެމައްސަލަ ވަނީ ހުށައަޅާފައެވެ.
ކުޑަކުދިންނާއި އަންހެނުންނަށް ކުރާ އަނިޔާތައް ހުއްޓުވައި، އިޖްތިމާޢީ މައްސަލަތަކަށް ޢާންމުން ހޭލުންތެރިކުރުވުމަށް ގިނަ ކެމްޕެއިންތަކެއް ހިންގަމުން އަންނަކަމަށް ޖެންޑަރ މިނިސްޓްރީން މައުލޫމާތުދެއެވެ.
