ޕީޖީގެ މަގާމުން ޝަމީމް އިސްތިއުފާ ދެއްވަން ޖެހޭ: އިދިކޮޅު
21 ޖުލައި 2020 | އަންގާރަ 03:23ބާ ކައުންސިލް އުވާލަން އުޅޭ ކަމުގެ މައުލޫމާތު ލިބިފައިވާ ކަމަށް ވިދާޅުވި
ޕީޕިއެމް/ޕީއެންސީން މީގެ ކުރިން ބޭއްވި ޕްރެސްކޮންފަރެންސެއްގެ ތެރެއިން
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) ގެ މައްސަލަ ޕްރޮސެކިއުޓާ ޖެނެރަލް ކަމުގެ މަގާމުގައި ހުސައިން ޝަމީމް ހުންނަވައިގެން އިންސާފުވެރިކަމާއި އެކު ނުބެލޭނެ ކަމަށާއި، އޭނާ އެ މަގާމުން އިސްތިއުފާ ދެއްވުމަށް އިދިކޮޅުން ގޮވާލައިފިއެވެ.
އަމިއްލަ ފަރާތަކުން ވަަނީ ޕީޖީ ޝަމީމްގެ މައްސަލައެއް ބާ ކައުންސިލަށް ހުށައަޅާފައެވެ. ޝަމީމަށް ގިނަ ތުހުމަތުތަކެއް ކޮށް ހުށައަޅާފައިވާ މައްސަލައިގައި ބުނެފައިވަނީ، އެމްއެމްޕީއާރްސީ މައްސަލައިގައި ތުހުމަތު ކުރެވޭ އަހުމަދު ހުސައިން (އޮއިއްޓެ) އާއި، އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ދިފާއީ ވަކީލެއްގެ ގޮތުގައި ޕީޖީ ޝަމީމް އުޅުއްވާފައިވާއިރު، އެއީ މަސްލަހަތު ފުށުއަރާނެ ކަމެއް ކަމަށް ބުނެފައިވެއެވެ.
ޝަމީމް ވިދާޅުވެފައިވާ ގޮތުން އޭނާ ވަނީ ޕީޖީކަމާއި ހަވާލުވެވަޑައިގަތް ފުރަތަމަ ދުވަހުން ފެށިގެން މައްސަލައިން ތަނާޒުލްވެވަޑައިގެންފައެވެ.
ހޯމަ ދުވަހުގެރޭ އިދިކޮޅު ކޯލިޝަނުން ބޭއްވި ޕްރެސް ކޮންފަރެންސެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ޝަމީމްއާ ގުޅޭ ގޮތުން ބާ ކައުންސިލަށް ހުށައެޅި މައްސަލާގައި ތެރޭގައި ޖިނާއި ބޮޑެތި ތުހުމަތުތަކެއް ހުރުމުން އެކަމާއި މެދު ކަންބޮޑުވާ ކަމަށެވެ. އަދި ޝަމީމްގެ ނަޒާހަތްތެރިކަމާއި މެދު ސުވާލު އުފެދޭ ކަމަށެވެ. އަބްދުއްރަހީމް ވިދާޅުވި ގޮތުގައި ގާނޫނާއި އެއްގޮތަށް އެމްއެމްޕީއާރްސީގެ މައްސަލަ ކުރިޔަށްދާނަމަ ޝަމީމް ޕީޖީކަމުގެ މަގާމުން އިސްތިއުފާ ދެއްވަން ޖެހެއެވެ.
ޝަމީމްއާ ގުޅޭ ގޮތުން ބާ ކައުންސިލަށް ހުށައެޅުނު މައްސަލަ އިންސާފުވެރިކަމާއި އެކު އަވަހަށް ބަލައި ދިނުމަށް އަބްދުއްރަހީިމް ވަނީ ބާ ކައުންސިލަށް ގޮވާލާފައެވެ. އެ މައްސަލަ ނިމިގެންދާ ގޮތަކުން ބާ ކައުންސިލް އުވާލުމަށް ސަރުކާރުން މަސައްކަތް ކުރަމުންދާ ކަމުގެ މައުލޫމާތު ލިބިވަޑައިގެންފައިވާ ކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ، ރައީސް ޔާމީންގެ އުފުލާފައިވާ ދައުވާ އަކީ ބާތިލް ދައުވާއެއް ކަމަށާއި، މިހާރުން މިހާރަށް އެމަނިކުފާނު މިނިވަން ކުރަން ޖެހޭ ކަމަށެވެ.
