މަސީހު މަގާމުން ވަކިކުރެވޭ ވަރަށް ވޯޓް ހަމަވެއްޖެ:ފާރިސް
ބޭނުންވާ އަދަދަށް ވޯޓު ލިބޭނެކަމުގެ ޔަޤީންކަން އެބައޮތް
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަޙުމަދު ފާރިސް މައުމޫން ފަލަސުރުހީ ޕްރޮގްރާމްގައި
ރައްޔިތުންގެ މަޖިލީހުގެ ރައީސް ޢަބްދުﷲ މަސީޙު މަޤާމުން ދުރުކުރެވޭނެ ކަމުގެ ޔަގީންކަން އެބައޮތް ކަމަށާއި އެއަށްފަހު، މަޖިލީހުގެ އަޣުލަބިއްޔަތު ވެސް "ގުޅިފައިވާ ކޯލިޝަނުން" ނަގާނެ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަޙުމަދު ފާރިސް މައުމޫން ވިދާޅުވެއްޖެއެވެ.
ރާއްޖެޓިވީގެ ފަލަސުރުޚީ ޕްރޮގްރާމްގައި ފާރިސް ވިދާޅުވީ ރައްޔިތުންގެ މަޖިލީހަށް މިހާރު ވައްދާފައިވާ، އެ މަޖިލީހުގެ ރައީސް، ޢަބްދުﷲ މަސީޙުގެ އިތުބާރު ނެތްކަމުގެ މައްސަލަ ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އޮތް ކަމަށެވެ. މަސީހުގެ އިތުބާރު ނެތް ކަމުގެ މައްސަލަ ކާމިޔާބުކުރެވޭނެ ފުރިހަމަ އިތުބާރު އޮތް ކަމަށް ފާރިސް ތަކުރާރުކޮށް ވިދާޅުވި އެވެ.
މަސީހުގެ އިތުބާރު ނެތްކަމުގެ މައްސަލަ 26 މެމްބަރުންގެ ސޮޔާއެކު ވައްދާފައިވާއިރު، އެ މައްސަލަ ކާމިޔާބުކުރަން ބޭނުންވަނީ 42 މެމްބަރުންގެ ވޯޓް ކަމަށާއި އެއަށް ވުރެ ގިނަ މެމްބަރުންގެ ވޯޓް ލިބޭނެ ކަމަށް، ޕީޕީއެމްގެ ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް ވިދާޅުވި އެވެ.
ފަލަސުރުހީގައި ފާރިސްއާއެކު ބައިވެރިވެވަޑައިގެންނެވި ކެންދޫ ދާއިރާގެ މެމްބަރު އަލީ ހުސައިން ވިދާޅުވީ މަސީހުގެ އިތުބާރު ނެތް ކަމުގެ މައްސަލައަށް ޕީޕީއެމްގެ ގިނަ އަދަދެއްގެ މެމްބަރުން ތާއިދު ކުރައްވާނެ ކަމުގެ ޔަގީންކަން އެބަ އޮތް ކަމަށެވެ.
ބޭނުންވާ އަދަދަށް ވޯޓު ލިބޭނެ ކަމުގެ ޔަޤީންކަން އޮތް ނަމަވެސް، ވޯޓު ލުމާ ހަމައަށް ދަންދެން، ވޯޓު ދެއްވަން ތިއްބެވި މެންބަރުންނަށް ސަރުކާރުގެ ފަރާތުން، ބޮޑެތި ހުށަހެޅުންތަކާއި ފިއްތުންތަކާއި ކުރިމަތިލާން ޖެހިވަޑައިގަންނަވާނެކަން ފާހަގަ ކުރައްވާ، ފާރިސް ވަނީ އެކަމާ ކަންބޮޑުވުން ފާޅުކުރައްވާފައެވެ. ނަމަވެސް އެއްވެސް މެމްބަރަކު ޖެހިލުންވެ ވަޑައި ނުގެން މަސައްކަތް ކުރެއްވުމަށާއި ސަރުކާރުން އެ ބޭފުޅުންނަށް ގޮތެއް ނުހެދޭނެ ކަމަށް ފާރިސް ވިދާޅުވި އެވެ.
މި ވޯޓާ ގުޅިގެން ސަރުކާރުން ދައްކަފާނެ ބިރަކަށް ޖެހިލުންވެވަޑައިނުގަންނަވާ ކަމަށާއި ޖަލު ގޮޅިއަށް ދާން ޖެހުނަސް ތައްޔާރު ކަމަށް ފާރިސް ވިދާޅުވި އެވެ.
"މަޖިލީހުގެ މެމްބަރުންގެ އަތުގައި މިހާރު މިއޮތީ ގައުމުގެ މުސްތަގުބަލު،" ފާރިސް ވިދާޅުވި އެވެ.
އެހެންވެ، މިކަމަށް ވިޔަފާރިވެރިންގެ ފަރާތުންނާއި ރައްޔިތުންގެ ފަރާތުން މެމްބަރުންނަށް ހިތްވަރު ދެއްވުމަށް އޭނާ އެދިވަޑައިގެންނެވި އެވެ.
މެމްބަރު އަލީ ހުސައިން ވިދާޅުވީ، ކޮންމެ ރައްޔިތަކު ވެސް އެ ބޭފުޅެއްގެ ދާއިރާގެ މެމްބަރަކަށް ގުޅާފައި މަސީހުގެ އިތުބާރު ނެތް ކަމަށް ފާސްކުރަން ތާއިދުކޮށް ދިނުމަށް އެދެން ޖެހޭ ކަމަށެވެ. އެކަން ކުރަން ޖެހެނީ ދައުލަތް ޒިންމާދާރުކުރަން ކަމަށާއި އޭރުން، މަސްވެރިންނަށް ބެޔަސް ނުބެޔަސްގެ 10،000 ރުފިޔާ ނުލިބޭ މައްސަލައިގައި މިނިސްޓަރާ ސުވާލު ކުރެވޭނެ ކަމަށެވެ.
އޭގެ އިތުރުން ރައީސް ޔާމީން ޒިންމާދާރު ކުރެއްވޭނެ ކަމަށް ފާރިސް ވިދާޅުވި އެވެ.
މަޖިލީހުގައި އެންމެ ގިނަ ދުވަސްވީ އެއް މެމްބަރު މަސީޙު، މަޖިލީހުގެ ރައީސްކަމުން ދުރުކުރުމަށްފަހު އެ މަޤާމަށް އައްޔަން ކުރާ ފަރާތެއްގެ ރިޔާސަތުގައި މަޖިލީހުގެ މަސައްކަތްތައް އަވަސް ކުރެވި، ރައްޔިތުންގެ ވިންދާއި އެއްގޮތަށް، ކަންކަން އިސްލާހު ކުރައްވާނެ ކަމަށް ފާރިސް ވިދާޅުވިއެވެ. ރައްޔިތުންގެ ޙައްޤުތައް ގެއްލޭ ގޮތަށް މިހާރު ފާސްކޮށްފައި ހުރި ޤާނޫނުތައް، ރައްޔިތުންގެ ޙައްޤުތައް ނުގެއްލޭ ގޮތަށް ބަދަލުކޮށް، މަޖިލީހުގެ ތެރެއިން މުއައްސަސާތައް ޒިންމާދާރު ކުރެވޭނެ ކަމަށްވެސް އޭނާ ވިދާޅުވިއެވެ.
މަޖިލީހުގެ ރައީސް ކަމަށް އާ ބޭފުޅަކު އައްޔަން ކުރުމުގެ ވާހަކަ ފާރިސް ފާހަގަ ކުރެއްވި ނަމަވެސް، އެ މަޤާމަށް ވަކި ބޭފުޅަކު އައްޔަން ކުރުމަށް ނިންމާފައިވާކަން ފާރިސް ހާމަކުރައްވާފައެއް ނުވެއެވެ.
