ގައުމަށްޓަކައި ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު މަގާމުން ވަކިކުރަން ޖެހޭ ކަމަށާއި، އޭނާގެ މައްޗަށް ހުށަހަޅާފައިވާ އިތުބާރު ނެތްކަމުގެ މައްސަލަ ކާމިޔާބުވެއްޖެނަމަ މުއައްސަސާތަކުގެ މިނިވަންކަން ކަށަވަރުވެ، ރައްޔިތުންގެ މަޖިލީހުގެ ގާނޫނީ ޒިންމާ އިފުލަން މަގުފަހިވެގެން ދާނެ ކަމަށް އިދިކޮޅު އިއްތިހާދުގެ ހިޔަނި ކެނބިނެޓް މިނިސްޓަރ ޝިދާތާ ޝަރީފް އެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ޝިދާތާ ވިދާޅުވީ މި މަހުގެ 27 ވަނަ ދުވަހަށް ތާވަލްކޮށްފައިވާ މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ކާމިޔަބުވެއްޖެނަމަ ދިވެހިރާއްޖޭގެ ސިޔަސީ މަސްރަޙަށް ބޮޑަތި ބަދަލުތަކެއް އަންނާނެ ކަމަށެވެ. ދިވެހި ރާއްޖޭގެ ހާލަތު ބަދަލުކުރުމަށް ދިވެހި ރައްޔިތުންގެ ޙައްގުގައި ސަރުކާރަށް ނިސްބަތްވާ މަޖިލިސް މެމްބަރުން މަޖިލީހުގެ ރައީސްގެ އިތުބަރު ނެތް ކަމަށް ވޯޓް ދޭންޖެހޭ ކަމަށް އޭނާ ވިދާޅުވިއެވެ.
މިވޯޓް ކާމިޔާބު ވެއްޖެނަމަ ދިވެހިން ބޭނުންވާ ފަދަ އިންސާފްވެރި ފަނޑިޔާރުގެއެއް ލިބި އަދުލުއިންސާފްގެ ނިޒާމް ހަރުދަނާ ވެގެންދާނެކަމާއި އަދި ކުރިއަށް އޮތް ލޯކަލް ކައުންސިލް އިންތިހާބުވެސް އިންސާފްވެރިކަމާއެކު ދެފުށް ފެންނަ ގޮތަށް ބޭއްވޭނެ ކަމަށް އޭނާ ވިދާޅުވިއެވެ.
"މަޖިލީސް ރައީސްގެ އިތުބާރު ނެތްކަމުގެ މައްސަލައަކީ، ގިނަ ކަންތައްތަކަކާއި ގުޅިފައިވާ ވޯޓެއް. އެންމެ ކަމަކަށްވުރެ ގިނަ ކަންތައްތަކާއި، އެ ވޯޓް ގުޅިފައިވޭ. މިނިވަން މުއައްސަސާތައް މިނިވަންވެގެންދާނެ. އޭގެއިތުރުން ޖުޑީޝަރީގެ މިނިވަންކަންވެސް އިތުރުކުރެވިގެންދާނެ. އަދިވެސް ގިނަ ކަންތައްތަކެއް ހުރީ މި ވޯޓާއި ގުޅިފައި،" ޝިދާތާ ވިދާޅުވިއެވެ.
ޝިދާތާ ވިދާޅުވީ ރައްޔިތުންގެ މަޖިލީހުގެ ރައީސް މަސީހު ކަންކަން ކުރައްވަނީ ގާނޫނާއި ގަވާއިދުތަކާ ހިލާފަށް ކަމަށް ގިނަ މެމްބަރުން ގަބޫލުކުރާ ކަމަށެވެ.
ޝިދާތާ ވިދާޅުވި ގޮތުގައި ރައީސް އަބްދުﷲ ޔާމީންގެ ސަރުކާރުން ހިންގާ ކޮރަޕްޝަނާއި ޖަރީމާތަކަށް ސަރުކާރަށް ނިސްބަތްވާ މަޖިލީހުގެ މެމްބަރުން ތާއިދު ނުކުރާ ކަމަށެވެ. އެހެން ނަމަވެސް އަބަދުވެސް އަޑުއިވެނީ ސަރުކާރަށް ތާއިދުކުރާ މަޖިލީހުގެ މެމްބަރުންނަން މިނިވަންކަމާއެކު ވޯޓްލުމުގެ އިޙްތިޔާރެއް ނޯންނަ ވާހަކަ ކަމަށް ވީނަމަވެސް، މިފަހަރުގެ ވޯޓުން ތަފާތު ފެންނާނެ ކަމަށް އޭނާ ވިދާޅުވިއެވެ.
މަސީހުގެ އިތުބާރުގެ މައްސަލަ މަޖިލީހަށް ހުށަހެޅީ އެމްޑީޕީ އާއި ޕީޕީއެމްގެ ރައީސް މައުމޫންގެ ފެކްޝަންގެ މެމްބަރުންނާއި ޖުމްހޫރީ ޕާޓީގެ މެންބަރުން ހިމެނޭ ގޮތަށް މިމަހުގެ އަށް ވަނަ ދުވަހު އެވެ. މި މައްސަލައިގައި އެމްޑީއޭއަށް ނިސްބަތްވާ ނޮޅިވަރަމް ދާއިރާގެ މެމްބަރު ހުސައިން އަރީފް ސޮއިކުރައްވާފައިވެ އެވެ. ޖުމުލަ 26 މެމްބަރުންގެ ސޮޔާއެކު ހުށަހެޅުއްވި މި މައްސަލަ ކާމިޔާބު ވާނެ ކަމަށް ގުޅިފައިވާ ކޯލިޝަންގެ މެމްބަރުން ވިދާޅުވެ އެވެ.
